उनी नेपाली फिल्मका उम्दा भिलेन हुन् । ‘के यो माया हो’, ‘फेसबुक’, ‘माइ प्रमिस’ र छायाँकन सकाईएका दुई फिल्म ‘वडा नं ६’ र ‘रातो घर’ मा अनुरागमान सिंह कुँवरलाई नकारात्मक भूमिकामा देख्न सकिन्छ ।

फिल्मका नकारात्मक पात्र अनुरागमा सिंह कुँवरले सामाजिक कार्यतर्फ भने सकारात्मक हात फैलाएका छन् । फेब्रुअरी १४ अर्थात् प्रणय दिवसमा विश्व प्रेममय भैरहंदा फिल्मका ‘भिलेन’ अनुराग भने गोंगबुँमा रहेको हिमालय वृद्धाश्रममा रहेका वृद्धवृद्धासँग प्रेम बाँड्न पुगेका थिए । विगत दश वर्षदेखि सञ्चालनमा आएको उक्त आश्रममा रहेका २४ जना वृद्धवृद्धालाई झन्डै एक महिनासम्म पुग्ने खाद्यन्न लिएर अनुराग प्रणय दिवसको दिनमा त्यहाँ पुगेका थिए ।

प्रेम दिवसको दिनमा किन त वृद्धाश्रममा ? फिल्मका खलपात्रले गहकिलो उत्तर दिए, ‘प्रेम दिवसको भनेको माया बाँड्ने दिन हो । माया केटीमै पोखिनु पर्छ भन्ने होइन् । मलाई माया पोख्ने ठाउँ वृद्धाश्रम उचित लाग्यो ।’ उसो त अनुराग प्रेम दिवसको दिनमा मात्रै हिमालय वृद्धाश्रममा माया बाँडन् आएका होइनन् । उनी आफ्नो जन्मदिन र विशेष चाडपर्वमा लत्ताकपडा र खाद्यन्न लिएर आउने यो वृद्धाश्रम गर्दछन् । हिमालय वृद्धाश्रम केन्द्रकी  अध्यक्ष सरला पन्थीले कलाकार कुँवर सँगै अन्य नेपाली फिल्म क्षेत्रका व्यत्तिले पनि आश्रममा आएर सहयोग र सद्भाव देखाएको बताइन् । 

अध्यक्ष पन्थीका अनुसार नायिका अरुणीमा लम्साल हास्यव्याङ्ग्य कलाकार किरण केसी, दीपकराज गिरी र दीपाश्री निरौला, जितु नेपाल लगायतका कलाकारले वृद्धाश्रममा पुगेर खाद्यन्न तथा लत्ताकपडा सहयोग गरेका छन् । दाता, सहयोग र चन्दाबाट सञ्चालन हुँदै आएको हिमालय वृद्धाश्रम केन्द्रको आफ्नै भवन समेत निर्माण भएको छ । जसको हाल तला थप्ने कार्य भैरहेको छ । कलाकार अनुरागमान सिंह कुँवरले थला थप्न २० बोरा सिमेण्ट समेत वृद्धाश्रमलाई उपलब्ध गराउने वाचा गरे । हिमालय केन्द्रमा रहेका वृद्धवृद्धालाई आफ्नै हातबाट फलफूल समेत बाँडेका अनुरागले आगामी दिनमा पनि सकारात्मक सामाजिक कार्यलाई जारी राख्ने बताए । 

केही नेपाली फिल्मको लगानीमा समेत सहकार्य गरेका अनुरागलाई सामाजिक सेवामा सरिक हुँने प्ररणा चाहिं कहाँबाट मिल्यो त ? अनुरागले भने, ‘फिल्मको कुनै पात्र निभाउन प्रेरणा आवश्यक पर्ला तर सामाजिक कार्य गर्न प्रेरणा आवश्यक पर्छ जस्तो मलाई लाग्दैन । यो त भावना जागृत भएर आउनु पर्ने कुरा हो ।’