चैत २७ गते प्रदर्शनमा आउने फिल्म ‘नाईं नभन्नू ल ३’ लाई वितरक सुनिल मानन्धरले न्यूनतम ३५ लाख रुपैयाँ (एमजी) दिने सर्तमा काठमाण्डू वितरणको जिम्मा लिएका छन् । न्यूनतम नै यति मोटो रकम दिएर वितरकले काठमाण्डूमा फिल्म वितरणको जिम्मा लिएको नेपाली फिल्म इतिहासमा सम्भवतः पहिलो हो । 

वितरक मानन्धरले नै फिल्म ‘कोहिनूर’ लाई १७ लाख रुपैयाँको एमजीमा काठमाण्डू वितरणको जिम्मा लिएका थिए । जसलाई हालसम्मकै सर्वाधिक मानिएको थियो । विकास आचार्यको निर्माण रहेको फिल्म ‘नाईं नभन्नू ल ३’ लाई ३५ लाख एमजीमा काठमाण्डू वितरणको जिम्मा लिइनुको कारणबारे प्रष्ट्याउँदै सुनिल मानन्धरले भने, ‘यो नामको पहिलो र दोश्रो दुवै फिल्म चलेका छन् । स्टार कास्ट भएको ‘नाईं नभन्नू ल ३’ को सार्वजनिक गीतलाई पनि युट्युवमा छोटो समयमै धेरै पटक हेरिएको छ । फिल्म चल्छ भन्ने विश्वासले नै मैंले न्यूनतममै मोटो रकम दिएको हुँ ।’ आर्यन सिग्देल, प्रियंका कार्की, संचिता लुइँटेल, सुरजसिंह ठकुरी, अनुभव रेग्मीको मुख्य भूमिका रहेको फिल्मको शिर्ष गीतलाई सार्वजनिक गरिएको एक सातामै ६० लाख बढीले भिजिट गरेका छन् । विकासका मुख्य सहायक निर्देशक मुस्कान ढकालले निर्देशन गरेको ‘नाईं नभन्नू ल ३’ लाई मोफसल वितरणको जिम्मा एफडी कम्पनीले लिएको छ । 

‘नाईं नभन्नू ल ३’ लाई ३५ लाख एमजी काठमाण्डू वितरकले दिएसँगै प्रदर्शन अगावै आफ्नो लगानी लगभग सुरक्षित भएको लेखक एवं निर्माता विकास आचार्यले बताए । फिल्म प्रदर्शनसम्म ७० लाख लगानी पुग्ने दाबी गर्ने विकास आचार्यले भने, ‘फिल्म पारिवारीक बनाएको छु । दर्शकलाई पक्कै मन पर्नेछ । व्यापार राम्रो हुनेमा म ढुक्क छु ।’ फिल्ममा संगीत बसन्त सापकोटाले दिएका छन् । 

गत वर्षको नयाँ वर्षमा रिलिज भएको विकासको ‘नाईं नभन्नू ल २’ ले काठमाण्ठूबाट मात्रै ८५ लाख बढी र मोफसलबाट ८० लाख बढीको सेयर दिएको थियो । काठमाण्डूमा सर्वाधिक एमजीमा वितरण गरिने ‘नाईं नभन्नू ल ३’ ले पनि यस्तै व्यापारिक रेकर्ड कायम गर्ला ?