‘नेपाली आइडियल २०६९’ को उपाधी जितेपछि गायक बादल लिम्बु साँगीतिक क्षेत्रमा ‘नोटिस’ भए  । तर उपाधी जितेपछि पाउनु पर्ने नगद पुरस्कार बादलले पाएनन् । साढे दुई लाख बराबरको नगद पुरस्कार नदिई ‘नेपाली आइडियल २०६९’ को आयोजक नै फरार भयो । यद्पी बादल निराश भएनन । उनी आफ्नो साँगीतिक करिअर चम्काउनतर्फ लागे । नेपाली साँगीतिक क्षेत्रमा आफ्नो करिअर चम्काउन संघर्षरत यिनै बादल लिम्बुबारे छोटो चर्चा गर्रौ ।

पहिलो रेकर्डिङ्मा नर्भस

हुन् त बादलको सांगितिक करिअर ‘नेपाली आइडियल’ बनेपछि शुरु भएको होइन् । वि.स. २०६६ सालमा पुर्वाञ्चल आधुनिक गायन प्रतियोगितामा पनि उनले तेश्रो स्थान हाँसिल गरेको थिए । सोहि वर्ष उनले उषा राईको एल्बम ‘उषा’ मा ‘इश्वर सामु’ बोलको गीतमा आफ्नो स्वर दिएका थिए । ‘त्यो नै मेरो पहिलो रेकर्डिङ थियो’, उनले सम्झिए । ‘त्यत्तिबेला म निकै नर्भस भएको थिए’, पहिलो रेकर्डिङ अनुभव सुनाए । 

बादलको सांगितिक कक्षा 

कक्षा ५ मा पढ्दाको कुरा हो । बादलले आफ्नो विद्यालय कन्काई बोर्डिङ स्कुल (विर्तामोड) को स्टेज कार्यक्रममा गाउने मौका पाएका थिए । त्यही मौकाले उनलाई आज गायक बनाएको उनी बताउँछन् । ‘पहिलो पटकको प्रस्तुति देखेपछि सबैले राम्रो गरेको भन्दै हौसला दिनुभयो, परिवारले पनि समर्थन गर्दै जानुभयो र आज यँहासम्म आइपुगेको छु’, उनले भने । बादल हौसलाको भरमा मात्र गायक बनेका भने होइनन् । उनले कक्षा ९ मा अध्ययन गर्दागर्दै विर्तामोडको सनलाईट संगित विद्यालयमा पनि संगीत कक्षा लिन्थे । उनले त्यँहा दुईवर्ष कक्षा लिएको बताए । २०६७ सालमा एसएसली पास गरेपछि गायक बन्छु भनेर राजधानी छिरेका बादलले ‘मधुरीमा नेपाल’ मा पनि केही महिना कक्षा लिएको बताए । 

एकदिन स्टार बन्छु

बादल भन्छन्– ‘अहिले जमाना प्रतिस्पर्धाको छ । जसले राम्रो गर्छ त्यो नै अगाडी बढ्छ ।’ मिहनेत र कर्ममा विश्वास राख्ने बादलले एक सय बढी स्टेज प्रस्तुती दिइसकेको बताए । तपाईको लक्ष्य के त ? उत्तरमा बादल भन्छन्– ‘म पाश्र्व गायनमा जम्न खोज्दै छु, एकदिन यो क्षेत्रको स्टार बन्ने सपना छ ।’ पाश्र्व गायनमा स्टार बन्ने सपना बोकेका बादलले हालसम्म चारवटा फिल्ममा आफ्नो स्वर दिइसकेका छन् । प्रदशर्न भइसकेको फिल्म ‘पुन्टे परेड’ को ‘डुब्दै गए म’ र ‘अलविदा’ को ‘मैले जसको’ बोलको गीत उनले गाएका हुन् । यि दुवै फिल्मका सेन्टीमेन्टल गीत रुचाइएका छन् । त्यस्तै गोपिकृष्ण ब्यानरको ‘होमवर्क’ र उदय सुब्बाको ‘अग्नी’ मा पनि उनले स्वर दिएका छन् । बादललाई पाश्र्व गायनको क्षेत्रमा ल्याउन संगितकार ताराप्रकाश लिम्बुले धेरै नै सहयोग गरिरहेको उनले बताए । ‘अहिलेसम्म जति फिल्महरुमा गाउने मौका पाए, त्यो उहाँकै कारणले हो’, उनी गुरुप्रति कृतज्ञ सुनिए । 

आफ्नै एल्बम ल्याउँछु 

अर्काको एल्बममा स्वर दिएपनि हालसम्म आफ्नो एल्बम नल्याएका बादलले अब ‘पहिलो धोका’ एल्बम ल्याउने तयारी गरिरहेको बताए । यो एल्बमको ‘तिमीलाई फुल सम्झेर’, ‘भो माया लाउँदिन’ र ‘जिन्दगी’ बोलको गीत भने सार्वजनिक भइसकेको छ । ‘अब ‘यो कस्तो यात्रा’, ‘पहिलो धोका’ र ‘आँखामा गाजल लाउनेले’ बोलको गीतसहित एल्बम सार्वजनिक गर्ने क्रममा छुँ’ , उनले सुनाए । 

रेखा थापाको फ्यान

तपाईलाई कसको फिल्ममा गाउने चाहना छ भन्ने एक प्रश्नमा उनले यस्तो रहस्य खुलाए । भने– ‘म सानैदेखि रेखा थापाको फ्यान हु, वहाँको प्राय फिल्म हेर्न म छुटाउँदिन किनभने वँहाको अभिनय मलाई साह्रै मनपर्छ ।’ रेखा अभिनित फिल्मका प्रायः गीतहरु आफुले गाउने गरेको पनि उनले सुनाए । ‘त्यसैले मलाई रेखा थापाको फिल्ममा गाउने चाहना छ’, उनले भने । ‘सुनेको छु रेखाजीले हामीजस्ता संघर्ष गरिरहेका कलाकारलाई सधै स्थान दिनुहुन्छ, मैले पनि त्यही आशा राखेको छु’, उनले थपे । 

संगीत नै सबथोक 

अन्त्यमा, बादललाई सोधिएको एक पश्न थियो । तपाईको विचारमा संगीत के हो ? उनले भने– ‘संगीत मेरो लागि पेशा मात्र होइन, नशा पनि हो । त्यसैले संगीतबाट अब म टाढा रहन सक्दिन, अब यो नै मेरो सबथोक हो ।'