रेखा थापा स्टारर फिल्म ‘तथास्तु’ ले सार्वजनिक बिदाको दिन शनिबार राजधानी र मोफसलका हलमा आक्रमक व्यापार गर्न सफल भएको वितरकले बताएका छन् । वितरकले जानकारी दिए अनुसार प्रदर्शन भएका अधिकाशं हलमा ‘तथास्तु’ को शनिबारको शोज हाउसफूलको रह्यो । 

‘तथास्तु’ को शनिबारको व्यापार बारे काठमाण्डू वितरक गोपाल कायस्थले भने, ‘गुण, गोपि, गंगा, अष्ट, पुष्पाञ्जली र कलंकीको सबै शोज हाउसफूल भएको छ । बिना पर्व ‘तथास्तु’ ले गरेको व्यापारलाई निकै राम्रो मान्नुपर्छ ।’ त्यस्तै वितरक नरेन्द्र महर्जनका अनुसार शुक्रबार भन्दा शनिबार ‘तथास्तु’ को व्यापार मोफसलमा दोब्बर छ । वितरक महर्जन भन्छन्, ‘शुक्रबार चिसो मौसम, महोत्सब र बन्दको प्रभाव परेपनि शनिबार फिल्मको व्यापार निकै राम्रो छ ।’ विभिन्न भातृ संगठनले गरेको बन्दका कारण मोफसलका कतिपय हल खुल्न  सकेका छैनन् । यसको प्रत्यक्ष असर प्रदर्शनका तीन फिल्मलाई पर्न आएको छ ।
सबिर श्रेष्ठको निर्माण एवं निर्देशन रहेको फिल्म ‘तथास्तु’ मा रेखा थापाको मुख्य भूमिका रहेको छ । रेखासँगै सुवास थापा, किशोर खतिवडा, विज्ञान जोशी, शिरु बिष्ट, सुशिल पोखरेल र किरण थापा लगायतको अभिनय छ । फिल्म निर्माणमा निर्देशक श्रेष्ठले रामहरी धितालसँग सहकार्य गरेका छन् । ‘तथास्तु’ को इनिसियल व्यापारसँगै होम प्रोडक्सन भन्दा बाहिरका फिल्ममा रेखा थापा चल्दिनन् भन्ने आरोप मेटिएको छ भने निर्देशक सबिर श्रेष्ठ पनि सफल निर्माताको रुपमा दहरिएका छन् । रेखाले शनिबार ‘तथास्तु’ प्रदर्शन भएका गोपिकृष्ण, अष्टनारायण, पुष्पाञ्जली र कलंकी हलका दर्शकसँग केही समय फिल्म हेरकी थिइन् ।

यता युवा दर्शक लक्षित फिल्म ‘आभाष’ को व्यापार भने शुक्रबारको तुलनामा शनिबार सुखद् देखिएको छ । यो फिल्मको व्यापार शनिबार विशेषतः राजधानीको गोपिकृष्ण हलमा उच्च देखियो । ६ सय बढी सिट क्षमता भएको गोपिकृष्णको कृष्ण हलमा ‘आभाष’ को शनिबारको प्रत्येक जसो शोज हाउफूल नजिक रह्यो । निर्माता तथा वितरक गोविन्द शाहीले ‘आभाष’ ले हरेक हलमा दर्शकको साथ उल्लेख्य रहेको दाबी गरेका छन् । सम्पादक सुरेन्द्र पौडेल निर्देशित फिल्म ‘आभाष’ मा निशा अधिकारी, संयम पुरी, आश्मा डिसी, प्रकृति श्रेष्ठ र सलोन बस्नेतको मुख्य भूमिका रहेको छ ।

‘तथास्तु’ र ‘आभाष’ को तुलनामा फिल्म ‘अलबिदा’ को शुक्रबार र शनिबार दुवै दिन व्यापार उच्च हुन सकेन । आर्यन सिग्देल अभिनित यो फिल्मले प्रतिक्षा गरेभन्दा न्यूनको व्यापार गरेको हलवालाले बताएका छन् । सार्वजनिक बिदाको दिन शनिबार समेत ‘अलबिदा’ ले उल्लेख्य दर्शकको साथ नपाएपछि आर्यन सिग्देलेको क्रेज माथि नै प्रश्न चिन्ह् लागेको छ । लक्ष्मण रिजाल निर्देशित फिल्म ‘अलबिदा’ मा आर्यनसँगै निर्माता हसन खान र नायिका अनिता आचार्यको पनि अभिनय छ । 

सुरुवाती व्यापारले देखिएको सुखद र दुःखत संकेतले प्रदर्शनमा आएका तीन वटै फिल्मलाई हिट र फल्प भन्न हतारो हुन सक्छ । दर्शक प्रतिक्रिया र आइतबारको व्यापारले फिल्मलाई हिट र फल्पको निर्धारण गर्नेछ ।  तर, सुरुवाती व्यापारमा ‘तथास्तु’ माथि छ ।