‘चपली हाइट’ गर्ल विनिता बरालको नयाँ परिचय थपिएको छ । कृषि पेशामा आवद्ध विनिता उपन्यासकार बनेकी छिन् । ‘जुइनो’ नाम जुराइएको विनिताद्धारा लिखित उपन्यासको लेखक कृष्ण अविरलले अन्तिम सम्पादन गर्दै गरेको विनिताले सुनाइन् ।

नायिका, कृषक र लेखिकाको परिचय बनाएकी विनिताले भनिन्, ‘एकदिन हिरोइन बन्छु भन्ने चाहिं थियो । यो सँगै म लेखनमा पनि रुचि राख्थें । बेलाबेलमा मेरो आर्टिकल प्रकाशनमा पनि आएका छन् ।’ ५५ हजार शब्दको विनिताको ‘जुइनो’ ले कृषि, युवा र देशलाई एकतामा बाध्ने काम गर्छ । उपन्यासको ‘कन्टेन्ट’ बारे विनिताले भनिन्, ‘शिक्षित बेरोजगार युवा र कृषिमा आवद्ध युवतीको प्रेम कथामा उपन्यास आधारित छ । मेरो उपन्यासले देशमै केही गर्नु पर्छ भन्ने सन्देश दिन्छ ।’ 

करिब दुई महिनापछि ‘जुइनो’ लाई बजारमा ल्याइसक्ने विनिताको लक्ष्य छ । उनले भनिन्, ‘भव्य समारोहबिच ‘जुइनो’ विमोचन हुनेछन् ।’ लेखिका विनिताले बिचमा ‘उमङ्ग’ नामक फिल्मको छायाँकन पनि सकाएकी छिन् । पहिलो फिल्म ‘चपली हाइट’ बाट चर्चामा आएकी विनिता कृषि पेशामा आवद्ध भएसँगै उपन्यास लेखनबाट युवा पुस्तालाई उर्जा दिने प्रेरक बन्ने पथमा छिन् ।