'मारुनी'को नयाँ प्रचार शैली

काठमाडौँ

भदौ १३ गते फिल्म 'मारुनी' रिलिजको तरखरमा छ । रिलिज नजिकिदै गर्दा फिल्मको प्रचार प्रसार पनि तिव्र रुपले भईरहेको छ । फिल्मको दुइ गीत सार्वजनिक भईसकेको छ । दुवै गीतले मार्केटमा राम्रो छाप छाडिरहेको छ । 

प्रचारकै क्रममा प्रशिक्षक तथा कलाकार माधव केसीको सहयोगमा इटहरीमा विभिन्न सिप मुलक तालिमको प्रशिक्षण लिइरहेका प्रशिक्षार्थीहरुलाई 'मारुनी'को बारे जानकारी दिइरहेका छन् । कुक,सिलाइ बुनाइ ,प्लम्बर,इलेक्ट्रीसियन सम्बन्धी प्रशिक्षण लिइ रहेका स्थानीय व्यक्तिलाई मारुनी सम्बन्धि जानकारी दिदै फिल्म जनामानस सम्म पुर्याउने प्रयास भएको छ ।

कार्यक्रम झापा,मोरङ्ग,सुनसरी,धनकुटा र संखुवासभा लगायत स्थानमा समेत जारी रहने निर्देशक नवल नेपालले जानकारी दिएका छन् । नवलको यो टेक्निक निकै गज्जबको छ । खर्च पनि कम हुने खबर पनि धेरै पुग्ने ।

पुनम इन्टरटेन्मेन्टको ब्यानरबाट पुनम गौतमले निर्माण गरेको फिल्ममा दर्शना केसी, मिना क्षेत्री र राजा प्रधान सह-निर्मातामा रहेका छन । फिल्ममा पुष्प खड्का, साम्राज्ञी राज्य लक्ष्मी शाह, रेबिका गुरुङ, विनोद भट्टराई, शंखर सेढाइ, अर्जुन श्रेष्ठ लगायतका कलाकारको अभिनय रहेको छ ।

नवल नेपालको निर्देशन र गोविन्द फुयालको कथा रहेको फिल्ममा अर्जुन पोखरेल र कृष्ण काफ्लेको संगीत रहेको छ । सञ्जय लामाले यस फिल्म खिचेका हुन् भने मित्र डी गुरुङले सम्पादन गरीरहेका छन् ।

---