चलचित्र निर्देशक आलोक नेम्वाङको आत्महत्यापछि नेपाली चलचित्र क्षेत्रमा विभिन्न खाले बहस सुरु भएको छ । चलचित्रकर्मीहरू आलोकको आत्महत्याको कारण फरक–फरक अनुमान गरिरहेका छन् ।धेरैले उनलाई एक्लोपनको कारण आत्महत्याको बाटो रोजेको बताएका छन । कतिपयले भने शारीरिक संरचनाको कमजोरीका कारण आत्महत्या गरेको अनुमान लगाएका छन् । ४३ वर्षको उमेरमा पनि विवाहको चाहना नदेखाउनुले पनि उनी जीवनदेखि निराश थिए भन्ने केही सहकर्मीहरूको विश्लेषण छ । कुकुर र बिरालोलाई सन्तानका रूपमा पाल्दै आएका आलोकले केही समययता आफ्ना साथीहरूलाई अब धेरै बाँच्दिनँ भन्ने गर्थे । आत्महत्यापछि भेटिएको उनको ‘सुसाइट नोट’ ले पनि यही कुरा पुष्टि गर्छ । तर, उनले किन आत्महत्या गरे भन्नेबारे प्रहरीको अनुसन्धान जारी छ । यद्यपि, आलोकको आत्महत्या नै नेपाली चलचित्र तथा गीत–संगीत क्षेत्रका लागि पहिलो भने होइन ।

नेम्वाङ अघि उनकै जस्तो निराशाको सिकार भएर निर्देशक ज्ञानेन्द्र देउजाले पनि आत्महत्याको बाटो रोजेका थिए । आत्महत्याको कोसिस गरेका देउजालाई समयमै अस्पताल पु¥याइएकाले दुर्घटना भने हुन पाएन । नेम्वाङलाई पनि समयमै मनोविश्लेषकद्वारा परामर्श दिइएको भए सायद यस्तो अवस्था आउने थिएन भन्ने अधिकांश चलचित्रकर्मीहरूको भनाइ छ ।नेपाली सिने तथा गीत–संगीत क्षेत्रमा यस्ता घटना पहिले पनि धेरै भइसकेका छन् । त्यसो त हलिउड र बलिउडमा पनि धेरै चर्चित कलाकारले आत्महत्याको बाटो राजेर यो धर्ती छाडेका छन् । हलिउडका चर्चित कलाकार रोबिन विलियम्स, मार्लिन मुनरो, विश्वप्रख्यात पपगायक माइकल ज्याक्सनको मृत्युलाई पनि चिकित्सकहरूले आत्महत्या नै मानेका छन् । बलिउड अभिनेत्री दिव्या भारती, जिया खान, पार्विन बबी, दक्षिण भारतीय अभिनेत्री सिल्क स्मिता लगायतले पनि यही मार्ग अपनाएर जीवनलीला समाप्त पारेका थिए ।

तस्बिरमा क्रमशः आत्महत्या गरेका अभिनेत्रीद्धय जेसिका खड्का, श्रीषा कार्की र गायिका योगिता मोत्तान ।

अन्तर्राष्ट्रिय जगत्मा लोकप्रियताको उच्च शिखरमा रहेका बेला उनीहरूले लागू पदार्थको सेवनलगायत अन्य कारणले आत्महत्याको बाटो रोजेका थिए । ती कलाकारका निजी चिकित्सकका अनुसार यी सबै मानसिक रोगका सिकार भएका थिए । करिब दुई दशकअघि अभिनेत्री गीताञ्जली सुनारले पनि आत्महत्या गरिन् ।

निर्माता छविराज ओझाकी दोस्री श्रीमती गीताञ्जलीको मृत्यु अझै रहस्य नै बनेको छ । ओझाले नै निर्माण गरेको चलचित्र नाताबाट गीताञ्जलीले अभिनेत्रीको रूपमा सिनेयात्रा थालेकी थिइन् । त्यतिबेलै नेपाली चलचित्र क्षेत्रमा शिलु, पछ्यौरी लगायतका चलचित्रमा अभिनय गरेकी नवीना केसीको मृत्यु भयो । जसलाई पनि आत्महत्या भनियो । जुन रहस्य अहिलेसम्म खुलेको छैन ।

१२ वर्षअघि अर्की अभिनेत्री श्रीषा कार्कीले पनि आत्महत्या गरिन् । एक दर्जनभन्दा बढी चलचित्रमा अभिनय गरेकी कार्कीको आत्महत्याको कारण पत्रिकामा छापिएको उनको नग्न तस्बिर मानियो । सो आत्महत्याले सिंगो नेपाली चलचित्र आन्दोलित बन्यो । तर, वास्तविकता कहिल्यै बाहिर आएन । पत्रिकामा छापिएको नग्न तस्बिरकै कारण श्रीषाले आत्महत्या गरेको आधार कहीँबाट पुष्टि भएन ।

यस्तै, यौन भिडियो बाहिर आएपछि त्यसको सिकार भएकी अर्की कलाकार थिइन जेसिका खड्का । तीन वर्षअघि उनले विष सेवन गरी आत्महत्याको मार्ग रोजिन् । उनको आत्महत्याको कारण यौन भिडियो मानियो । सोही भिडियोका कारण मानसिक तनावले उनले आत्महत्या गरेको त्यतिबेला चलचित्रकर्मीले विश्लेषण गरे । आत्महत्या गर्नुअघि अभिनेत्री खड्का पनि मानसिक समस्यामा थिइन् ।

नेपाली गायन क्षेत्र पनि आत्महत्याको रोगबाट मुक्त छैन । पपगायक कुल पोखरेल, आधुनिक गायक सुदेश खवास, लोक–पप गायिका योगिता मोक्तानले पनि आत्यहत्या नै गरेका हुन् । यसरी यौनको सिकार, एक्लोपन, लागूऔषध सेवन र उच्च महत्वकांक्षा पूरा नहुँदा कलाकारहरूले आत्महत्याको बाटो रोज्ने गरेको देखिन्छ ।

राजधानी दैनिक, डब्बु क्षेत्री