'द भ्वाइस अफ नेपाल सिजन–२' को डिजिटल अडिसनको समय अब एक सातामात्र

काठमाडौँ

द भ्वाइस अफ नेपाल सिजन–२ को डिजिटल अडिसनमा सहभागी हुने समय चैत १० गते सकिने भएको छ ।

हिमालय टेलिभिजनको एचडी सेवा शुभारम्भसँगै गत माघ १ गतेबाट सुरु भएको डिजिटल अडिसनमा अहिलेसम्म झण्डै १० हजार प्रतिभाहरुले आफ्नो आवाजबाट पहिचान बनाउने उद्देश्यसहित अडिसन दिइसकेका छन् ।

देश बिदेशमा रहेका प्रतिभाहरुले सिजन २ मा सहभागिताका लागि द भ्वाइस अफ नेपालको मोबाइल एप डाउनलोड गरी गीत रेकर्ड गरेर अडिसन दिन सक्नेछन् । एपमार्फत् अडिसन दिन असमर्थ प्रतिभाहरुले फेसबुक वा भाइबरजस्ता म्यासेजिङ एपमार्फत् पनि आफ्नो स्वर रेकर्ड गरी पठाएर अडिसनमा सहभागिता जनाउन सक्नेछन् ।

अडिसनलाई सहज र सर्वसुलभ बनाउन यसपटकदेखि सामाजिक सञ्जालमार्फत् पनि आफ्नो स्वर पठाउन सकिने ब्यबस्था गरिएको द भ्वाइस अफ नेपालका निर्देशक एवं निर्माता लक्ष्मण पौडेलले जानकारी दिनुभयो । मोबाइल फोन वा इन्टरनेटको पहुँचमा नभएका प्रतिभाहरुले फोन गरेर पनि भ्वाइस निर्माण टीमलाई आफ्नो आवाज सुनाई सहभागी हुन सक्नेछन् ।

डिजिटल अडिसन दिने तरिका –
एपमार्फत् – द भ्वाइस अफ नेपालको मोबाइल एप डाउनलोड गरी फर्म भर्नुहोस् र आफ्नो स्वर रेकर्ड गरी पठाउनुहोस्।
  
फेसबुकमा– आफ्नो आवाज रेकर्ड गरी द भ्वाइस अफ नेपालको भेरिफाइड फेसबुक पेज https://www.facebook.com/TheVoiceofNepal.official/मा पठाउनुहोस् । 

भाइबरमा– आफ्नो आवाज रेकर्ड गरी भाइबरमार्फत्  9823614185 नम्बरमा पठाउनुहोस् ।

टेलिफोनमा– यदि तपाईँले आफ्नो नजिक रहेका प्रतिभाहरुलाई द भ्वाइस अफ नेपालको अडिसनमा सहभागी गराउन चहानुहुन्छ र त्यस्तो प्रतिभा इन्टरनेटको पहुँचमा हुनुहुन्न भने हामीलाई सिधै कल गरी त्यसको जानकारी गराउनुहोस् त्यसका लागि हाम्रो नम्बर रहेको छ –9823614185

पहिलो सिजनमा दर्शकहरुबाट पाएको अपार माया र सुझावलाई ख्याल गर्दै दोस्रो सिजनमा धेरैभन्दा धेरै प्रतिभाहरुको सहभागिताका लागि डिजिटल अडिसनको प्रक्रियालाई सहज बनाइएको निर्देशक पौडेलले बताउनुभयो ।

जुनसुकै माध्यमबाट प्राप्त भएका स्वरहरुको परिक्षणपश्चात छानिएका प्रतिभाहरुले ब्लाइन्ड अडिसनमा सहभागिता जनाउन पाउनेछन् । द भ्वाइसको फर्म्याटअनुसार कोचहरूको कुर्सी घुमेसँगै प्रतिभाहरुको भाग्य पनि बदलिनेछ ।

यही असारबाट प्रसारण सुरु हुने दोस्रो सिजनलाई हिमालय टेलिभिजन एचडी प्रसारण गर्नेछ । भ्वाइसजस्तो बिश्वको नम्बर एक गायन रियालिटी सो प्रसारण गर्न पाउनु हिमालय टीभीका लागि महत्वपूर्ण जिम्मेवारी र अवसर रहेको टेलिभिजनका कार्यकारी निर्देशक श्याम कँडेलले बताउनुभयो ।

पहिलो सिजनको तुलनामा सबै पक्षलाई मजबुद बनाउने गरी टेलिभिजन र उत्पादक टीमले गृहकार्य गरिरहेको निर्देशक कँडेलले जानकारी दिनुभयो ।

---