नेपाल चलचित्र निर्माता संघ र विभाजित चलचित्र निर्माता संघ नेपालको एकीकरण

काठमाडौँ

नेपाली चलचित्र उद्योगको छाता संगठनको रूपमा रहेको नेपाल चलचित्र निर्माता संघ र विभाजित अवस्थामा रहेको चलचित्र निर्माता संघ नेपाल विधिवत रूपमा एकीकरणको प्रक्रिया पुरा भएको छ ।

नेपाली चलचित्र उद्योगको सर्वांगीण विकासलाई मार्गप्रशस्त गर्ने दिशामा यो एक ऐतिहासिक दस्तावेजका रूपमा इतिहासमा दर्ज हुने र विगतका तमाम असमझदारीहरूको अन्त्य हुने निर्माता संघको विश्वास रहेको छ । नेपाल चलचित्र निर्माता संघ र विभाजित अवस्थामा रहेको चलचित्र निर्माता संघ नेपाल बीच ९ बुँदे सहमति गरिएको छ ।

९ बुँदे सहमति यस्तो छ,
१. यस सहमति मार्फत नेपाल चलचित्र निर्माता संघ र चलचित्र निर्माता संघ नेपालबीच ऐतिहासिक एकीकरण सम्पन्न भएको छ । यसलाई आजकै मितिदेखि लागू हुनेगरी बैधानिक्ता प्रदान गरिएको छ ।
२. नेपाल चलचित्र निर्माता संघको मिति २०७५ साल चैत्र २ गते शनिवार सम्पन्न हुने १५औं वार्षिक साधारण सभा अगावै चलचित्र निर्माता संघ नेपालको दर्ता खारेजी गरिने छ ।
३. चलचित्र निर्माता संघ नेपालले तोेकेको ३ जना व्यक्तिलाई नेपाल चलचित्र निर्माता संघको विधान अनुसार कार्यसमिति सदस्य पदमा मनोनीत गरिने छ ।साथै, चलचित्र निर्माता संघ नेपालले तोकेको अर्को २ जना व्यक्तिलाई नेपाल चलचित्र निर्माता संघ विधान अनुसार वरिष्ठ उपाध्यक्ष सहित १ उपाध्यक्ष पदमा मनोनीत गरिने छ ।
४. राष्ट्रिय चलचित्र नीति २०७१ लाई कार्यान्वयन गराउनका लागि प्रतिवद्धभई पहल गरिने छ ।
५. बक्स अफिस कार्यान्वयनमा जोड दिइने छ ।
६. चलचित्र निर्माताले सिनेमा भवनबाट ६०% शेयर पाउने वातावरण तयार पार्न पहल गर्ने ।
७. चलचित्र निर्माताहरूले भुक्तानी गर्दै आएको सर्वर शुल्क शत प्रतिशत मिनाहा गराउन उचित पहलीकदम चाल्ने ।
८. आजको मितिबाट सम्पूर्ण कामकारवाही नेपाल चलचित्र निर्माता संघको छातामुनी रहने गरी सम्पूर्ण निर्माताहरूलाई गोलबन्द गरिने छ ।
९. नेपाल चलचित्र निर्माता संघको विधानमा भएको व्यवस्थालाई समयानुकूल संशोधन गरिने छ ।

यस्तो सहमति पश्चात नेपाल चलचित्र निर्माता संघका अधक्ष आकाश अधिकारीले फुटेर होइन जुटेर अघि बढ्ने बताए । उनले भने "मेरो कार्यकाल अगावै घरबाट बहिरिनु भयका परिवारलाई मेरो कार्यकालमा पुन: घर भित्र (चलचित्र निर्माताहरुको छाता संघठन, “नेपाल चलचित्र निर्माता संघ”) मा स्वागत गर्न पाउँदा निकै हर्सित छु।"

 

---