उत्सव रसाईली

केही वर्ष पहिले राजेश हमाल र रेखा थापा जस्ता स्टार कलाकार लिएर युवा निर्देशक दिवाकर भट्टराईले ‘मेरो जीवनसाथी’ नामक फिल्म निर्देशन गरे । निर्देशक भट्टराईको त्यो पहिलो फिल्म थियो । स्टार कलाकारको फिल्मले व्यापार ठिक ठाकको गर्यो । निर्देशक भट्टराईलाई पहिलो फिल्मबाट उत्साहप्रद प्रतिक्रिया भने मिलेन । 

दिवाकरले ‘मेरो जीवनसाथी’ पछि ‘स्टुपिड मन’ निर्देशन गरेका छन् । उनी निर्देशित दोश्रो फिल्मले भने दर्शकलाई हलसम्म तान्ने र फिल्म उत्कृष्ट्र बनेको अपेक्षा जगाइदिएको छ । यो फिल्मको गीत संगीत यतिबेला दर्शकको रोजाइमा परेका छन् । यही शुक्रबार कार्तिक ७ गते फिल्म रिलिजको छेकोमा दिवाकरसँगको कुराकानीलाई प्रस्तुत गरेका छौं । 

के हो ‘स्टुपिड मन’ ?

‘स्टुपिड मन’ लभ स्टोरी फिल्म फिल्म हो । यसमा सामाजिक यथार्थता छ । विदेशमा खिचिएपनि नेपालीपन छ । विदेशीएका नेपाली युवाको पिडा फिल्ममा छ । लामो समयदेखि नेपाल छोडेर थाइल्यान्डमा बस्नु भएका नेपालीको साँस्कृतिक र धार्मिक सम्बन्धलाई पनि फिल्ममा उतारिएको छ । समग्रमा भन्नुपर्दा रमाइलो र संवेदनाले भरिपूर्ण नेपाली फिल्म ‘स्टुपिड मन’ हो ।

सबैका लागि ‘स्टुपिड मन’

फिल्म यही वर्गको लागि मात्रै भन्ने नै हुँदैन । यहाँ मात्रै यो वर्गको लागि भन्ने हो । युनिभर्सल प्रमाणपत्र प्राप्त हाम्रो फिल्म सबै वर्गको लागि हो । फिल्म बनाउँदै पनि हामीले निश्चित वर्गका लागि भनेर बनाएका थिएनौं । हाम्रो फिल्म सबै वर्गका दर्शकको लागि हो ।

थाइल्यान्डमा समय मिलाउनै गाह्रो

‘स्टुपिड मन’ को पुरै जसो छायाँकन थाइल्यान्डमा गरिएको हो । फिल्मको छायाँकन  बाहिर गर्दा समय मिलाउन गाह्रो पर्यो । देश बाहिर गएपछि भनेकै समयमा सुटिङ स्थल पुग्नु पर्ने । नेपालमा हुँदा हामी समयलाई त्यती महत्व दिदैंन्थ्यौं । क्यामेरा बिग्रिको कारणले गर्दा झन्डै एक हप्ता जति हामी खाली बस्नु पर्यो । त्यसले गर्दा अनुमति लिएको मिति सकिंदा फिल्मको पूरै छायाँकन सक्न मुस्किल परेको थियो । यी सँगै भाषिक समस्या पनि आइपर्यो । यद्पी राम्रो युनिट, त्यहाँका सहयोगी नेपालीहरुको कारणले गर्दा पूरै सुटिङ थाइल्यान्डमा गर्न सम्भव भयो ।

दर्शकको मनको फिल्म

‘स्टुपिड मन’ को सबै गीत तथा संगीतलाई दर्शक तथा श्रोताले मन पराउनु भएको छ । यसलाई मैंले पहिलो सफलताको रुपमा लिएको छु । गीत संगीतसँगै हाम्रो फिल्मको अर्को बलियो पक्ष भनेको पटकथा पनि हो । यसमा सामिप्य जी (लेखक सामिप्य तिमल्सिना) को एकदम ठुलो हात छ । पटकथा राम्रो भएकाले कलाकारले एकदम राम्रो प्रस्तुती दिएका छन् । ‘स्टुपिड मन’ लाई दर्शकले मनले हेरिहेका हुनेछन् । नेपाली फिल्म हेरेर रमाउने दर्शकको लागि ‘स्टुपिड मन’ पर्फेक्ट प्याकेज नै हो ।

फिल्म भनेकै मनोरञ्जन हो 

फिल्म भनेकै मनोरञ्जनको लागि हेरिने हो । त्यसकारण फिल्म मनोरञ्जनात्मक नै हुनुपर्छ । नेपालमा बढी बलिउडको छाप छ । दर्शकको संवेदनासँग खेलवाड गर्न सक्ने फिल्म नै सफल हुन्छ । संसारमा फिल्मको कथामा हुने भनेकै हिरो र हिरोइन, मायाप्रेम अनि विछोड । फिल्मको मुल मन्त्र यही नै हो । एकाध फिल्ममा समाजिक मुद्धालाई पनि उठाइन्छ । तर समग्रमा फिल्म भनेकै हिरो र हिरोइनबिच हुने माया प्रेम अनि विछोडको कथा हो । नेपाली दर्शकलाई पनि मनोरञ्जनात्मक फिल्म हेर्न रुचाउँछन् । ‘स्टुपिड मन’ मा मनोरञ्जनसँगै रोदन पनि छ । दर्शकको संवेदनालाई छुने गरी फिल्म निर्माण गरेका छौं ।

 

दर्शकको संवेदना चोर्न चुक्यौं

वर्षमा कम्तीमा पनि एक सय वटा फिल्म प्रदर्शनमा आउँछन् तर पाँच वटा फिल्मले पनि लगानी उठाउने व्यापार गर्न सक्तैनन् । त्यसैले हामी दर्शकको मन जित्ने फिल्म निर्माण गर्न चुकिरहेका छौं । यसमा हिट भएका फिल्म किन हिट भए ? भनेर हेर्न आवश्यक छ । जुन फिल्ममा मनोरञ्जन छ, जसमा मानविय संवेदना छ ती फिल्महरु व्यावसायिक रुपमा पनि हिट भैरहेका छन् । नेपाली फिल्मलाई मध्यम वर्गीयले हेर्ने गर्दछन् । मध्यम वर्गिय दर्शकका लागि फिल्ममा मनोरञ्जन र संवेदना आवश्यक छ । पछिल्लो समय आएर नेपाली फिल्म निर्देशन र निर्माण एकदमै सस्तो भएर गयो । त्यसैले पनि नेपाली फिल्ममा स्टारडम भ्यालु कम भयो । दर्शकले एउटा स्टारको लागि फिल्म हेर्न जाने हो । पछिल्लो समय फिल्म फिल्म जस्तो बनेनन् । समाजको यथार्थ देखाउने वाहानामा अनावश्यक रुपमा उजागर गर्न खोजियो । जुन कुरा पच्नै सक्तैन । हामी दर्शकको संवेनदासँग खेल्नै नसकेको हो जस्तो पनि लाग्छ मलाई ।

रेखा थापामा स्टारडम छ 

स्टारको अभावले पनि नेपाली फिल्म चलिरहेका छैनन । दशैंमा रिलिज भएको ‘हिम्मतवाली’ स्टार भ्यालुकै कारण व्यावसायिक रुपमा सफल भएको हो । ‘हिम्मतवाली’ को कथा कस्तो छ ? भनेर दर्शक फिल्म हेर्न गएका होइनन् । रेखा थापाको स्टारडमको कारणले गर्दा दर्शक हलसम्म गएका हुन् । जुन बेलाबाट स्टार भ्यालु खस्कियो त्यो बेलादेखि नेपाली फिल्म व्यावसायिक रुपमा सफल भएको छैन । स्टार भनेको आइडल हो । आज बलिउडका शाहरुख, सलमान र आमिरको फिल्म किन चल्छन् त ? उनीहरु दर्शकका लागि आइडियल हुन् ।

निर्माताको हातमा लगाम

पहिला निर्माता फिल्म बनाउँनु पर्यो भनेर निर्देशक कहाँ पुग्थे । अहिले त्यस्को उल्टो छ । अहिले निर्देशकले निर्माता खोज्दै हिड्नु परेको अवस्था छ । यसकारणले गर्दा पनि फिल्महरु राम्रो बनिरहेका छैनन् । निर्देशकले फिल्म नराम्रो बनाउँ भन्दैन । फिल्म राम्रो नै बनोस् भन्ने उसको चाहना हुन्छ । अहिले फिल्मको लगाम निर्देशकको होइन निर्माताको हातमा छ । निर्माताहरु निर्देशकसम्म आउनु पर्यो । तब फिल्म राम्रो बन्छ । त्यसपछि निर्देशकको भिजन पर्दामा आउँछ ।