उत्सव रसाईली

आर्यन सिग्देल नेपाली फिल्म हेर्ने दर्शकका लागि सजिलै चिन्ने नाम हो । कुनै सयम सडक नाटक प्रस्तुत गर्ने आर्यनले दुई दर्जन बढी नेपाली फिल्ममा अभिनय गरिसकेका छन् । उनले अभिनय गरेको डेव्यु फिल्म ‘किस्मत’ र ‘कसले चोर्यो मेरो मन’, ‘मेरो एउटा साथी छ’, आफैले निर्माण गरेको ‘नोभेम्वर रेन’ जस्ता फिल्महरुले व्यावसायिक सफलता सँगै चर्चा पनि कमाए । 

आर्यन अभिनित झन्डै आधा दर्जन फिल्महरु प्रदर्शनको पखाईमा छन् । आउँदो शुक्रबार, कार्तिक ७ गते आर्यन अभिनित ‘लज्जा’ फिल्म प्रदर्शनमा आउँदैछ । ‘लज्जा’ प्रदर्शनको अवसर पारेर अभिनेता एवं निर्माता आर्यन सिग्देलसँग गरिएको कुराकानी प्रस्तुत गरिएको छ । 

‘लज्जा’ को भूमिका अहिलेसम्म निभाउँदै आएको भन्दा फरक छ भनेर म भन्दिनं । लज्जामा मेरो समाजबाट तिरस्कृत नारीलाई मन पराउने युवकको भूमिका छ । साधारण परिवारको आम युवाको प्रतिनिधित्व गरेको छु । 

‘लज्जा’ ले सन्देश दिन्छ

फिल्मको पात्रले कहिले हँसाउला, कहिले रुवाउला । यद्पी म फिल्मले सन्देश दिनुपर्छ भन्ने कुरामा विश्वास राख्दिंन । यति हुँदाहुँदैपनि फिल्म ‘लज्जा’ सन्देशमुलक छ । एउटा नारीलाई दिनुपर्ने ईज्जत, नारीको स्थिति र महत्व लगायत सबै कुरालाई मेरो पात्रले सन्देश दिन्छ ।

बिहेपछि खुसी छु

काम त मैंले पहिल्यैदेखि राम्रो गर्दै आएको थिएँ । तर बिहेपछि नै राम्रो भएको जस्तो देखियो । एउटा फिल्म राम्रो हुँन धेरैको हात हुन्छ, म एक्लैको ‘लक’ ले राम्रो हुने कुरा पनि होइन । अरुको मिहेनतलाई म आफु मात्रै क्रेडिट लिन चाहान्नं । यदि बिहेपछि मलाई लक नै लागेको रहेछ भने पनि म खुसी नै छु । 

दबाबमुलक छैन बैवाहिक जिन्दगी

वैवाहिक जिवन ‘नर्मल’ नै छ । बिहेअघि जसरी काममा व्यस्त हुन्थें अहिलेपनि त्यसरी नै काममा व्यस्त छु । बिहे भएपछि दैनिकी चाहिं ‘रुटिन’ मा चल्दो रहेछ । अरु त उस्तै हो । सुटिङमा आऊ, जाऊ । थोरै ‘लाइफ सेड्युल’ मा हुन्छ । मेरो व्यक्तिगत जिन्दगीमा चाहिं त्यस्तो केही पनि फरक भएको छैन, म पहिला जस्तो थिएँ अहिले पनि त्यस्तै छु । अहिलेसम्म म दबाबमा परेको छैन । बिहे अघि र बिहे पछि केही फरक छैन अहिले एकजा साथीसँग जिवन बितिरहेको छ  फरक यति मात्रै हो । 

संघर्षकै जिन्दगी 

फिल्म क्षेत्रमा मेरो स्थान कहाँ छ ? मैंले तोक्न होइन । स्थान फिल्म क्षेत्रको मान्छे र दर्शकले तोक्ने हो । म एउटा कलाकार हुँ । हिजो फिल्मको लागि संघर्ष गरेको थिएँ, आज राम्रो फिल्मको लागि संघर्ष गर्दैछु । आफैले पनि फिल्म बनाउने संघर्ष गर्दैछु । जिन्दगी संघर्षमै बितिरहेको छ । कलाकार बाहेक म आफ्नो कुनै पनि स्थान देख्दिनं । 

मलाई १, २, ३ नम्बरमा पर्नु छैन । मेरो फिल्मलाई दर्शकले मन पराइदिए हुन्छ । मलाई नम्बर र तहमा विश्वास छैन । मलाई दर्शकले यही क्षेत्रमा जिवन वेतित गर्ने स्थिति बनाइदिनु भएको छ, यही नै मेरो सफलता हो । फिल्म क्षेत्रमा लागेर पश्चताप गर्ने बाटो मलाई दिनु भएको छैन । म दर्शकले सफल बनाइदिएको कलाकार हुँ ।

बुढेसकालसम्म फिल्म क्षेत्रमा 

फिल्म भन्दा बाहेक अरु मैंले केही पनि कुरा बुझेको पनि छैन र बुझ्ने प्रयास पनि गरेको छैन । व्यापार, व्यावसाय लगायत अन्य क्षेत्र मैंले नबुझेको र बुझ्न नचाहेको क्षेत्र हो । फिल्म निर्माणमा लागिसकें त्यसैले मेरो पूरै जिन्दगी फिल्म क्षेत्रमै बित्छ । आज मैंले जुन भूमिकामा फिल्ममा अभिनय गर्दैछु भूमिका परिवर्तन होला तर म बुढेसकालसम्म फिल्म क्षेत्रमै हुन्छु ।

भूमिका होइन फिल्म राम्रो हुनुपर्यो 

मेरो लागि भूमिका भन्दा पनि फिल्म महत्वपूर्ण हो । यदि फिल्म राम्रो छ भने म निरञ्तर लभर व्वोयको भूमिका पनि अभिनय गर्न सक्छु । नराम्रो फिल्मको मलाई भिन्नै भूमिका दिएपनि गर्दींन । अहिले चाहिं एक्सन फिल्मको भूमिका मलाई अप्रोच आइरहेको छ । यदि राम्रो फिल्मको स्क्रिप्ट एक्सन रोलको आउँछ भने म किन नखेल्ने ? भनेर एक्सन फिल्ममा पनि काम गरेको हुँ ।

आँखा नबिझाउने राम्रो फिल्म

हेर्दा आँखा नबिझाउने फिल्म नै मेरो लागि राम्रो फिल्म हो । दर्शकले दुई घण्टा हलमा बसेर हेर्दा फिल्म बोर नलागोस् । फिल्मको नाम कालान्तरसम्म पनि गर्वका साथ लिन सक्ने फिल्म नै राम्रो फिल्म हो । दर्शक हलबाट निस्कंदा गाली नखाने फिल्म नै राम्रो फिल्म हो ।

राम्रो स्क्रिप्टको पर्खाइमा 

आफ्नै ब्यानरबाट फिल्म निर्माण गर्ने योजनामा छु । मलाई राम्रो स्क्रिप्ट चाहिएको छ । ‘नोभेम्वर रेन’ बनाउँदा स्क्रिप्ट खोज्न मात्रै झन्डै डेढ बर्ष लागेको थियो । नयाँ फिल्मको पनि स्क्रिप्ट खोज्दैछु । राम्रो स्क्रिप्ट पाउने वित्तिकै फिल्मको काम सुरु गर्छु । दर्शकले नाक खुम्च्याउने फिल्म बनाउँदिनं ।