'द प्रिसियस गिफ्ट' रिलिज

काठमाडौँ

विश्वभर लघु चलचित्र निर्माणको लहरजस्तै चलेको छ । केही वर्षयता नेपालमा पनि लघु चलचित्रको निर्माणले बिस्तारै निर्माता, कलाकार, प्राविधिक र दर्शकको ध्यान तान्दैछ । किम्फ र एकादेशमा जस्ता फेस्टिभलहरूले तिनमा अझ ऊर्जा थपेका छन् ।

हालै मात्र क्रिस्मसको अवसर पारेर एउटा लघु चलचित्र युट्युबबाट सार्वजनिक गरिएको छ । बाह्र मिनेट लामो यो चलचित्र 'द प्रिसियस गिफ्टमा' बाबु छोरीको मायालु सम्बन्धलाई लिएर कथा अघि बढ्छ । चलचित्र कथा सुनाउने एउटा माध्यम हो र यो लघु चलचित्रले छोटो समयमा धार्मिक सहिष्णुता लगायतका केही पक्षहरूमा नबोलेरै धेरै कुरा बोलेको छ ।

 कथाको प्लट रोचक र प्रेरणादायी छ । यो लघु चलचित्रमा सफर पोखरेल, गिर्वाणी पोखरेल र अनुप चापागाईंको अभिनय देख्न सकिन्छ । गिर्वाणीको बालसुलभ अभिनय प्रसंशायोग्य छ । चलचित्रको कथा मनिष बशिष्ठले लेखेका हुन् । यसलाई उत्सव दाहालले खिचेका छन् । रोमी बस्नेतले पार्श्व संगीत भरेका छन् भने, चलचित्रलाई रुपेश खड्काले सम्पादन गरेका छन् । निर्देशन अनुप चापागाईंले गरेका हुन् । 

 

---