उत्सव रसाईली

लोक, पप र आधुनिक गरी एक सय बढी नेपाली म्यूजिक भिडियोमा मोडलिङ गरेकी शिल्पा पोखरेल छविराज प्रोडक्सनको ‘लज्जा’ फिल्मबाट रजतपटमा नायिकाको रुपमा प्रवेश गरेकी छिन् । नवल नेपाल निर्देशित फिल्म ‘लज्जा’ मा शिल्पाले शिर्ष भूमिका निभाएकी छिन् । शिल्पाको अपोजिटमा अभिनेता आर्यन सिग्देल छन् । आउँदो कार्तिका ७ गते ‘लज्जा’ रिलिजको छेको पारेर न्यूजपेजथ्रीडटकमले शिल्पा पोखरेलसँग गरेको कुराकानीलाई उनकै शब्द शैलीमा प्रस्तुत गरिएको छ ।    

डरको सिमा छैन

फिल्म रिलिजको मिति नजिकिदै छ, डरको सिमा नै छैन । म्यूजिक भिडियोमा ‘रिजल्ट’ आइहाल्थ्यो । ‘लज्जा’ फिल्ममा लागेको ‘वर्कसप’ देखि झन्डै एक वर्ष भयो होला । पहिलो फिल्म के होला ? कसो होला ? भन्ने एकदम डर लागेको छ । फिल्मको स्टोरी एकदम ‘स्ट्रोङ’ छ । नवल नेपाल दाईले एकदम राम्रो बनाउनु भएको छ, त्यसकारण राम्रो हुनेमा चाहिं ढुक्क छु । तरपनि म्यूजिक भिडियोमा खेलि रहेको थिएँ । एक्कासी ठूलो फिल्ममा खेलेको छु । डायलग बोलेको छु दर्शकहरुले मन पराउनु हुन्छ कि हुँदैन ? यसमा डर छ । 

‘लज्जा’ मा तिरस्कृत नारी 

‘लज्जा’ मा मैंले समाजबाट तिरस्कृत नारीको भूमिका निभाएको छु । घरबाट अफिस जाँदादेखि घर नर्फकञ्जेलसम्म एउटा युवतीले भोग्ने उतार चढावको भूमिका छ । यो समाजमा घटिरहेको घटना हो ।

सुटिङ सकिएको पत्तै भएन

सुटिङको बेला अरु सबैले सहयोग गर्नु भयो । सुटिङ कतिबेला सकियो । मलाई पत्तै भएन । सुटिङको पहिलो दिनमै आर्यन जीसँग टेक पर्यो । मैंले नवल दाईलाई भने, ‘दाई म त सक्तिनं होला सुटिङ गर्न । मेरो त मुखबाट डायलग नै निस्किदैंन होला ।’ उहाँले ‘लाटी मैंले सिकाएको यही हो । मेरो बेइज्जत हुन्छ । आर्यनलाई आर्यन नसम्झ । उ तिम्रो लागि फिल्मको पात्र दया मात्रै हो’ भनेर सम्झाउनु भयो ।

 

सुने भन्दा फरक आर्यन सिग्देल 

मैंले सुनेको थिएँ , आर्यन सिग्देल एकदम घमण्डी हुनुहुन्छ रे । नयाँलाई ‘सर्पोट’ गर्नुहुन्न रे भन्ने पनि सुनेको थिएँ । तर सुटिङमा मैंले उहाँलाई एकदम फरक पाएँ । सुरुमा सुटिङमा आउने वित्तिकै गाडीमा आएर टक्क कुर्सीमा बस्नु भयो । मलाई लाग्यो, ‘ला सुनेको जस्तै हुनुहुँदो रहेछ’ तर जब हाम्रो टेक सुरु भयो, उहाँ एकदमै ‘सपोटिभ’ लाग्यो । डायलग यसरी बोल्दा राम्रो हुन्छ भनेर समेत आर्यनजीले मलाई सिकाउनु भयो । आर्यन जीसँग काम गर्न एकदमै सजिलो भयो । मलाई त सुटिङ गरे जस्तै भएन । म उहाँको पहिल्यैदेखिको फ्यान हुँ । पहिलो फिल्म नै उहाँसँग खेल्न पाएँ म एकदमै खुसी छु ।

ढोका थुनेर रोएँ 

म भन्दा अगाडी छविराज प्रोडक्सनमा नारी प्रधान फिल्ममा रेखा जीले अभिनय गरिरहनु भएको थियो । अब एक्कासी ‘स्ट्रोङ’ भूमिकामा म आउँदैछु भने मिडियामम ‘गसिप’ आउँछ नै भन्ने लाग्छ । छविराज जीसँग नाम जोडेर मिडियामा आउँदा सुरु सुरुमा घरमा निकै समस्या भएको थियो । ‘फिल्म लाइन नै यस्तै हो’ भनेर सम्झाएपछि घरमा अहिले कुनै समस्या छैन । सुरु सुरुमा त म आफैं पनि ढोका थुनेर रुन्थें । राती सुत्दा पनि आँखाबाट आँसु आफै खस्थ्यो । फिल्ममा काम गरेको मान्छेसँग कसरी नाम जोडिन्छ ? भनेर घरमा कराउने गर्नु हुन्थ्यो । छवि जीकै ‘लोफर’ मा अभिनय गर्नु भएको रजनी केसीसँग छवि जीको नाम जोडिएको सबै समाचार देखाएपछि घरका मान्छेहरु शान्त हुनुभयो ।

फिल्म चलाउन गसिप आवश्यक छैन 

छविराज ओझा २५ वर्षदेखि फिल्म बनाउँदै आउनु भएको छ । उहाँको नामैले दर्शक फिल्म हेर्न जान्छन् । नवल नेपाल त्यस्तो राम्रो फिल्म निर्देशन गर्ने मान्छे । उहाँको फिल्म परिवारमा बसेर हेर्न मिल्ने हुन्छ । हाम्रो फिल्म सामाजिक छ । फिल्म चलाउन नामै जोडेर गसिप बनाउन आवश्यक छैन । छविजी र मेरो नायिका अनि निर्माताको मात्रै सम्बन्ध हो । हाम्रो सम्बन्ध राम्रो छ । सबै टिम प्रचारमा लागि रहेको बेलामा हामी दुइ जनाको मात्रै नाम जोड्नु राम्रो हो ?

 

छविजीसँगको बिहेलाई मिडियाले उचाल्यो

हाम्रो बिहे हुँदैछ भनी मिडियामा आएको समाचार गलत हो । एउटै प्रश्न सोधेको सोध्यै गरेपछि छवि जीले पनि ‘हामफालेर’ जान्छु भन्नु भएको हो । मैंले पनि दिक्क लागेर सोचौंला भनेको हुँ । ‘लज्जा’ सुरु गरेको एक वर्ष भैसक्यो उहाँले कहिल्यै मलाई बिहे गर्छु भनेर भन्नु भएको छैन । मिडियाले मात्रै यो कुरालाई उचालेको उचाल्यै गरेको हो ।

फिल्ममै निरञ्तरता

मैंले फिल्म लाइनमा पाइला टेकी नै सके । अब निरञ्तर यही क्षेत्रमा लाग्ने योजना छ । ‘लज्जा’ मा मेरो भूमिका एकदमै बलियो छ । फिल्ममा मैंले निभाएको भूमिका यही समाजको हो । त्यसैले दर्शकले फिल्मलाई मन पराउनु हुन्छ । फिल्म सफल या असफल जे भएपनि यही क्षेत्रमा लाग्छु । 

‘सेलेक्टेड’ म्यूजिक भिडियो मात्रै

म्यूजिक भिडियो  र फिल्म भनेको एउटै घरको दुई वटा कोठा जस्तै हुन् । म आफ्नो घरको दुवै कोठामा जान पाउँछु । कसैले रोक्न पाउँदैन । फिल्मसँगै ‘सेलेक्टेड’ म्यूजिक भिडियो पनि खेल्छु । 

नाम र इज्जतका लागि फिल्म क्षेत्र

नाम र ईज्जत कमाउन फिल्म क्षेत्रमा आएको हुँ । फिल्म खेल्न थालेपछि शिल्पा पोखरेल को हो भनेर नचिन्नेले पनि चिन्न थालेका छन् । खुसी लाग्छ । नामसँगै सन्तुष्ट मिल्न दाम पनि आइरहेको छ । तर मलाई दाम भन्दा नाम नै ठूलो लाग्छ ।

रेखा थापा नै नम्वर वान

रेखा थापासँग मेरो तुलना गर्ने मान्छे नै मुर्ख हो । रेखा जी भनेको १३ वर्ष भैसक्यो । कति संघर्ष गरेर त्यो स्थानमा पुग्नुभएको छ । म त भर्खर पाइला चाल्लै छु । सिधा उभिन पनि पाएको छैन । मेरो फिल्म नै रिलिज भएको छ । म आफैं उहाँलाई नम्वर वान मान्छु भने किन मलाई उहाँसँग दाँज्ने ? एउटा पत्रिकाले त म रेखा जीसँग म टक्कर दिन आएको भनेर पनि छाप्यो । जो मलाई मन पर्छ ऊ सँग म टक्कर दिन आउँछु होला त ?

अब आफ्नै स्थान बनाउँछु 

नायिका बन्न आउने मान्छे सबैको म रेखा थापा जस्तै बन्छु भन्ने सपना हुन्छ । मेरो सपना पनि त्यही हो । तर म उहाँको स्थान खोस्न आएको होइन । निरुता सिंह, झरना थापा र रेखा थापा सबैको आ आफ्नै स्थान छ । र, म शिल्पा पोखरेलेको पनि छुट्टै स्थान बनाउँन चाहान्छु । म रेखा जीको स्थान खोस्न आएको होइन् । मलाई दर्शकले रेखाको ठाउँ खोस्न आएको केटी भनेर नचिनुन् ।