कार्तिक १४ गतेबाट प्रदर्शनमा आउने फिल्म ‘टलकजंग भर्सेस टुल्के’ ले गत शुक्रबार ट्रेलर सार्वजनिक गर्न एक औपचारिक कार्यक्रमको आयोजना गर्यो । जहाँ फिल्म निर्माता, निर्देशक, कलाकार एवं वितरकले फिल्म, कथा, बजार, व्यवस्थापन र भूमिका बारे आ आफ्नो भनाई राखेका थिए । प्रेस समारोहमा ‘टलकजंग भर्सेस टुल्के’ सदस्यले राखेको भनाईलाई यहाँ प्रस्तुत गरिएको छ ।

निश्चल बस्नेत, निर्देशक : पारिवारीक समस्या भएकाले ‘लुट’ पछि तत्कालै फिल्म निर्देशन गर्न सकिंन । ‘टलकजंग भर्सेस टुल्के’ लाई ‘लुट’ सँग नजाँज्नु होला । यो फिल्म ‘लुट’ भन्दा भिन्दै छ । यसमा आफ्नै किसिमको मज्जा छ । नेपाली फिल्ममा आफ्नोपनको अभाव छ । ‘टलकजंग भर्सेस टुल्के’ मा हामीले आफ्नोपन दिएका छौं । स्क्रिप्टमा लेखिएको मध्ये हामीले ७० प्रतिशत भिजुअललाई पर्दामा उतारेका छौं । त्यसैले फिल्म राम्रो बनेको छ । फिल्म नराम्रो भएपनि म दर्शकको गाली खान तयार छु ।

रविन्द्रसिंह बानियाँ, कार्यकारी निर्माता : म कागताली परेर ‘टलकजंग भर्सेस टुल्के’ को निर्माता भएको हुँ । सुरुमा यो फिल्मको निर्माता मोहन डोटेल हुनुहुन्थ्यो । उहाँले नै यो फिल्म बनाउने वातावरण सृजना गर्नु भएको हो । निश्चल जीलाई पनि उहाँले नै फिल्म निर्देशन गर्न ‘कन्भिन्स’ गर्नु भएको हो । बिचमा केही कुरा नमिलेर मोहजी छुट्टिनु भयो । फिल्म निर्माण गर्ने वातावरण सृजना गरिदिनु भएकोमा मोहनजीलाई धन्यवाद । 

फिल्म क्षेत्रमा मैंले सबै बसेको डुङ्गा प्वाल पर्दा पनि खुसी हुने प्रवृत्ति पाएँ । एउटाको फिल्म नचल्दा अर्को खुसी हुने । हामीबिच नै यस्तो प्रवृत्ति छ भने नेतालाई गाली गर्नुको सिद्धान्त नै के रह्यो र ? 

फिल्म वितरणमा पनि त्यस्तै समस्या । सबै जना चोर नै चोर । चोर मध्ये कम चोरलाई छानेर हामीले पपकर्नलाई फिल्म वितरणको जिम्मा दिएका हौं । यहाँ ‘इगो’ प्रोब्लम हावी भएको पाएँ । मेरो अनुरोध सबैजना मिलेर अगाडी बढौं । हामीले कसैको पनि सपनालाई शहिल बनाएका छौनौं ।

खगेन्द्र लामिछाने, लेखक एवं कलाकार : दश वर्ष अगाडीदेखि नै मैंले ‘टलकजंग भर्सेस टुल्के’ मा अभिनय गर्छु भन्ने सोच बनाएको थिएँ । मेरो सोच पूरा भएको छ, म एकदमै खुसी छु । यो अवसर मिलाइदिनु भएकोमा मोहन डोटेल ज्यूलाई धेरै धेरै धन्यवाद । फिल्म र मेरो आफ्नो कहानी उस्तै उस्तै छ । म कलाकार बन्न संघर्षरत छु । फिल्मको टुल्के पात्र पनि समाजमा आफ्नो अभिभाज्य स्थापित गर्न संघर्षरत छ । एकजना निर्देशकले मलाई खुट्टादेखि टाउकोसम्म हेरेर तिमी पनि कलाकार हो ? भनेर पश्न गर्नु भएको थियो । ‘टलकजंग भर्सेस टुल्के’ मा अभिनय गरिसकेपछि पनि एकजनाले मेरै अगाडी यसको कलाकार चाहिं को त ? भनी प्रश्न गर्दा ‘म’ भनी उत्तर दिएँ । उहाँले त तपाइँको फिल्म नै हेर्दिनं पो भन्नु भयो । जे होस् म कलाकार बन्न संघर्षरत छु । फिल्मको टुल्के पात्र आफ्नो स्थायित्व स्थापित गर्न संघर्षरत छ । 


मावध वाग्ले, वितरक : पैसाले फिल्म बन्दैन । फिल्म राम्रो टिमले गर्दा बन्छ । ‘टलकजंग भर्सेस टुल्के’ राम्रो टिमले बनेको फिल्म हो । नेपाली फिल्ममा राम्रो फिल्म बनाउने राम्रो टिम कमै छ । राजाको छोरो नाङ्गै हिंडेपनि राजकुमार हुन्छ भनेजस्तै निश्चल बस्नेतले बनाएको फिल्मपनि राम्रो नै हुन्छ । ‘टलकजंग भर्सेस टुल्के’ काठमाण्डू, काठमाण्डू बाहिर र विदेशमा पनि राम्रो चल्ने फिल्म हो ।

ऋचा शर्मा, अभिनेत्री : ‘टलकजंग भर्सेस टुल्के’ मा मेंलै फूली नाम गरेकी थारु युवतीको भूमिका निभाएको छु । यो पात्रको स्वभाव कम बोल्ने छ । मलाई थारु युवतीको ‘लुक्स’ मा उतार्न त्यति गाह्रो भएन जति थारु लवजमा बोल्न गाह्रो भयो । धेरै मिहेनत गरेर म आफैंले थारु युवतीको लवजलाई डविङ गराएको छु । हामी सबैले फिल्मलाई राम्रो बनाउने प्रयास गरेका छौं ।