आफ्नै फिल्म ‘कोहिनूर’ को ऐतिहासिक सफलताको ५१ दिने उत्सवमा निर्मात्री एवं अभिनेत्री श्वेता खड्का सहभागी भइनन् । ‘कोहिनूर’ को ५१ दिने सेलिव्रेसनमा कोहिनूर श्वेता नै अनुपस्थित भएपछि उनको खोजी हुनु सामान्य थियो । शनिबार ‘कोहिनूर’ को सेलिव्रेसनमा श्वेताको अनुपस्थितिलाई उनको अस्वस्थता भनी ढाकछोप गरिएको थियो ।

तर, श्वेता अस्वस्थ नभइ सेलिव्रेसनको माहोललाई सामाना गर्न नसक्ने भएपछि ‘कोहिनूर’ को ५१ दिने सेलिव्रेसनमा सहभागी नभएको पारिवारीक श्रोतबाट जानकारी प्राप्त भएको छ । पारिवारीक श्रोतकको अनुसार श्वेताले नै कार्यक्रममा सहभागी हुने ईच्छा नदेखाएकी हुन् । श्वेताको पारिवारीक श्रोतले भन्यो, ‘सेलिव्रेसनको वातावरण खल्लो नहोस् भनेर श्वेताले शनिबारको कार्यक्रममा आउन चाहिनन् । किनकी कार्यक्रममा श्वेताको आँसु थामिने थिएनन् ।’

मिडियामा सम्प्रेषण भएजस्तो श्वेतालाई निमोनिया नभएको समेत ती पारिवारीक सदस्यले बताए । उनले भने, ‘श्वेतालाई निमोनिया भएको छैन । श्वेतालाई निमोनिया भयो भनेर आएको समाचार गलत हो ।’

श्वेता र श्रीकृष्णबिच गत असार २३ गते धुमधामका साथ बिहे भएको थियो । बिहे भएको एक महिनामै साउन २३ गते श्रीकृष्णको भातरको गंगाराम अस्पतालमा बोन क्यान्सरका कारण निधन भयो । स्व.श्रीकृष्णको राष्ट्रिय सम्मान सहित पशुपती आर्यघाटमा अन्तिम दाह संस्कार गरियो । नेपाली फिल्मका शालिन अभिनेताले श्वेतालाई मात्रै होइन सिङ्गो मुलुकलाई नै दुःखी बनाएर सदाका लागि बिदा लिए ।

यीनै स्व. शालिन अभिनेता श्रेष्ठको अन्तिम उपहार ‘कोहिनूर’ ले असोज ११ गते देशका ११ वटा हलमा प्रदर्शनको ५१ दिन पार गर्यो । आकाश अधिकारीको निर्देशन एवं लेखन रहेको फिल्मले हालसम्म १० करोड माथिको व्यापार गर्दै नयाँ व्यापारिक किर्तिमानी कायम गर्न सफल भएको छ । यही ऐतिहासिक सफलतालाई फिल्म निर्माण युनिटले असोज ११ गते शनिबार मिडिया र सम्बन्धित पक्षसँग साट्यो । जुन सेलिव्रेसनलाई स्व.श्रीकृष्ण पत्नी श्वेता खड्काले ‘फेस’ गर्न सकिनन् ।