मंसिर ५ गते अभिनेत्री केकी अधिकारीद्धारा अभिनित दुई फिल्म एकसाथ प्रदर्शनमा आउने भएका छन् । फिल्म ‘माइ प्रमिश’ को पनि मंसिर ५ गते नै प्रदर्शन मिति तोकिएपछि केकीका दुई फिल्म एकआपसमा जुध्ने निश्चित भएका हुन् । यसअघि केकी अभिनित ‘श्री ५ अम्बरे’ ले सोही मितिमा आफ्नो प्रदर्शन मिति तोकिसकेको छ । 

विविध कारणवश फिल्म ‘माइ प्रमिश’ पटकपटक प्रदर्शन मिति रोकिएको थियो । सिंगापुरे लाहुरेहरुको कथामा केन्द्रित फिल्म ‘माइ प्रमिश’ आउँदो मंसिर ५ गतेलाई भने निर्माण युनिटले अन्तिम प्रदर्शन मिति भनेको छ ।

टिआरएएनजी प्रोडक्सनको ब्यानरमा निर्माण भएको फिल्म ‘माइ प्रमिश’ लाई सुरज सुब्बा नाल्बोले निर्देशन गरेका हुन । यो फिल्ममा रमेशचन्द्र राई, केकी अधिकारी, नरकुमार लिम्बु, विल्सन विक्रम राई ‘तक्मे बुढा’, अनुराग कुवंर लगायतका कलाकारहरुको अभिनय छ । बनिश शाहको सम्पादनमा तयार भएको फिल्म माइ प्रमिशमा महेश खडकाको सँगीत एवं रोशन श्रेष्ठको द्धन्द निर्देशन छ । गोविन्द राई यो फिल्मका नृत्य निर्देशक हुन् ।

जिवनसाथी फिल्मस्को व्यानरमा निर्माण भएको फिल्म ‘श्री ५ अम्बरे’ मा सौगात मल्लको शिर्ष भूमिका छ । फिल्मलाई दिपा बस्नेतले निर्देशन गरेकी हुन् । 

चलचित्र सेन्सर बोर्डबाट पिजी सर्टिफिकेट प्राप्त फिल्म ‘माइ प्रमिश’ को रिलिज अघि नै देश तथा विदेशका विभिन्न स्थानमा च्यारिटी शो समेत गरिएको छ । हङकङ, सिंगापुर लगायतका देशहरुमा फिल्मको च्यारिटीबाट राम्रो प्रतिक्रिया मिलेको थियो ।