दशैंको गीत गाउन नमानेको भन्दै चर्को आलोचना भएपछि चर्चित गायिका अञ्जु पन्तले रुँदै खण्डन गरेकी थिइन् । सबैको सम्मान गर्छु भन्दै समाजिक सञ्जालमा हस्तलिखित पत्र पोष्ट गरिन् । तर, तीनै अन्जुले क्रिश्चियनको एक कार्यक्रममा हाँसी हाँसी हिन्दू गीत नगाउने घोषणा गरेको भिडियो सार्वजनिक भएको छ । जसमा उनले म प्रभुलाई चिनिसकेको मान्छेले अरु भजन गाउन मिल्दैन भनेको सगर्व घोषणा गरेकी छन् । भारतबाट आएको एउटा टोलीले प्रस्ताव गरेको गीतबारे उनले भनेकी छन्-‘यसो शब्द हेर्छु मेरे साइ, मेरे अल्लाह, शिवजी यस्तै-यस्तै थियो । म एकदमै खङग्रङ भएँ ।’

परमेश्वरलाई मैले चिनिसकेपछि अब त्यो ठाउँमा अरुलाई राख्न नसक्ने भन्दै उनले गीत गाउन नमानेको बताएकी छन् । ‘मैले भनेँ तपाईलाई भगवानको अर्थ पनि थाहा छैन होला । माइण्ड नगर्नुहोला भनेर मैले भनेँ’ उनले हाँस्दै भनेकी छन् ।

कुराकानीका क्रममा प्रस्तावकले गीतको शब्दमा प्रभुको नाम पनि छ भन्दै देखाएको र गाउन आग्रह गरेको उनले बताइन् । रचनाकारको किड्नी फेल छ, उहाँका लागि गाइदिनुस्, सबै धर्म एउटै हो भन्दै प्रस्ताव गरेको सुनाउँदै भिडियोमा अञ्जुले भनेकी छन्-सबै धर्म एउटै होइन, तपाईले बुझ्नुहोला यो कुरा ।’

त्यसपछि आफूले प्रस्तावित गीतमा रहेका शब्दहरुमा मेरे इश्वर, मेरे प्रभु परमेश्वर जस्ता शब्द राख्न लगाएको भन्दै अन्जुले बेलिस्तार लगाएकी छन् । उनले सगर्व भनेकी छन्-‘दुई वटा अन्तरापछि अल्लाह आयो । मलाई फेरि ढुकढुक भयो । रेकडिङमा गएपछि अल्लाहको ठाउँमा मेरे मसिह गाएँ ।’

 

अन्जु भन्छिन्-यसलाई धेरै नउचालौं

यसैबीच भिडियोबारे  कुरा गर्दै पन्तले पहिलाको कुरा कोट्याउँदै जाने हो भने धेरैको धेरै कुरा आउने बताइन् ।

टेलिफोन कुराकानीमा उनले भनिन्-‘यस्ता कुरालाई बढवा दिएर कसले के हुन्छ ? के तपाईहरुले धर्मयुद्ध गराउन खोज्नु भएको ?’ यसबारे आफूले धारणा सार्वजनिक गरिरहेको भन्दै उनले धेरै नउचाल्न आग्रह गरिन ।

साभार : अनलाइनखबरडटकम