स्व.श्रीकृष्ण श्रेष्ठको फिल्म ‘कोहिनूर’ पछि प्रदर्शनमा आएका अधिकाशं फिल्मले व्यापारिक सफलता पाएनन् । ‘काहिनूर’ सँगै प्रदर्शनमा आएको फिल्म ‘शीशा’ र त्यसपछि प्रदर्शनमा आएका ‘ताण्डव’, ‘ठूली’, ‘उत्सव’ र ‘यो कथा हो तिम्रो’ प्रदर्शनमा आए मात्रै सफल व्यापार गर्न सकेनन् । 

‘शीशा’ देखि सुरु भएको लगातारको फल्पको श्रृङ्खला फिल्म ‘बिर्खेलाई चिन्छस्’ सम्म आइपुग्दा भने रोकिएको छ । गत शुक्रबार भदौ २० गते देखि काडमाण्डू तथा मोफसलबाट एकसाथ प्रदर्शनमा आएको फिल्म ‘बिर्खेलाई चिन्छस्’ दर्शकलाई आफ्नो पक्षमा पार्न सफल भएको छ ।

मोफसल वितरणको जिम्मा लिएका एफडिका नरेन्द्र महर्जनका अनुसार ‘कोहिनूर’ रिलिजपछि प्रदर्शनमा आएका फिल्मले गरे जस्तो निराशजनक व्यापारको नियती फिल्म ‘बिर्खेलाई चिन्छस्’ भोग्नु परेको छैन । वितरक महर्जनले भने, ‘कोहिनूर पछि प्रदर्शनमा आएका फिल्मको जस्तो न्यून व्यापार ‘बिर्खेलाई चिन्छस्’ को छैन । बिर्खेलाई हेर्न दर्शक हलसम्म आएका छन् ।’ मोफसलका करिब दुई दर्जन हलमा फिल्म ‘बिर्खेलाई चिन्छस्’ प्रदर्शनरत छ ।

त्यस्तै काठमाण्डूमा पनि फिल्म ‘बिर्खेलाई चिन्छस्’ लाई दर्शकको साथ राम्रो मिलेको छ । काठमाण्डू वितरकको जिम्मा लिएको पपकर्नका प्रचण्डमान श्रेष्ठका अनुसार फिल्म ‘बिर्खेलाई चिन्छस्’ ले मल्टिप्लेक्समा मध्यम र सिङ्गल स्टेशनमा आक्रमक व्यापार गरिरहेको छ । काठमाण्डू वितरक श्रेष्ठका अनुसार फिल्म ‘बिर्खेलाई चिन्छस्’ हेर्न सिङ्गल स्टेशनमा दर्शकको चाप बढी छ । 

फिल्मको व्यापार सुखद देखिएपछि निर्माता सुवास थापा यतिबेला दङ्ग छन् । बिर्खे सुवासले भने, ‘दर्शकलाई हामीले जुन मनोरञ्जन दिन खोजेका थियौं त्यसमा हामी सफल भएका छौं ।’ दर्शकबाट आएको हाँसोको गुञ्जनले मलाई सन्तुष्टि दिएको छ ।’ सुवासले नेपाल प्रदर्शनबाटै फिल्मको लगानी सुरक्षित हुने समेत आशा व्यत्त गरे । 

अराज केशव निर्देशित फिल्म ‘बिर्खेलाई चिन्छ्स’ ले एउटा साधारण युवाको असाधरण कथा बोल्छ । जगदिश्वेर थापा यो फिल्मका लेखक हुन् । फिल्म ‘बिर्खेलाई चिन्छस्’ मा सुवास सहित आयुषा राई र विनिता खड्काको मुख्य भूमिका छ ।