फिल्म ‘छ एकान छ’ ले व्यापारको लाभाशं रकम फिल्ममा आवद्ध स्पट व्वोयदेखि निर्देशकसम्म लाई बाँडेको छ । फिल्म प्रदर्शनको ८ महिनापछि सक्सेस पार्टीको आयोजना गर्दै निर्माता त्रेय दिपकराज गिरी, दिपाश्री निर्रौला र निर्मल शर्माले फिल्मले गरेको लाभाशंको हकदारी स्पट व्वोयदेखि निर्देशकसम्मलाई दिएका हुन् । नयाँ बानेश्वरस्थित ईन्द्रेणी होटलमा रात्री भोजको आयोजना गर्दै फिल्ममा आवद्ध सदस्यहरुलाई खामबन्दी गरेर लाभाशं रकम हस्तान्तरण गरियो । 

निर्माता, लेखक एवं कलाकार दिपकराज गिरीले छोटकरीमा भने, ‘टोकन अफ लभ भन्दा फिल्मले गरेको नाफाको केही प्रतिशत फिल्ममा आवद्ध सदस्यलाई हस्तान्तरण गर्नु उचित हुने ठानेर यस्तो गरेका हौं ।’ प्रचार प्रसार सहित ६५ लाख लगानी रहेको कमेडी फिल्म ‘छ एकान छ’ ले लगानी जतिकै नाफा कमाउन सफल भएको थियो । दिपक, दिपा र निर्मलले ‘छ एकान छ’ का कलाकारसँगै फिल्मले गरेको नाफाको रकम सुनकोशी बाढी प्रभावित (रु.२५ हजार), स्व. शिव रेग्मी परिवार (रु.५१ हजार) र चलचित्र पत्रकार संघ (रु. १५ हजार) लाई वितरण गर्ने निर्णयको घोषणा समेत गरे । 

निर्मात्री दिपाश्री निर्रौलाले भनिन्, ‘फिल्म व्यापारिक रुपमा सफल हुँदा फिल्मसँग जोडिएका सदस्य पनि फाइदाको हकदार हुनुपर्छ भन्ने हाम्रो मान्यता हो । ‘छ एकान छ’ लाई सफल बनाउन सहयोग गर्ने सबैलाई हृदय देखि नै धन्यवाद ।’

‘छ एकान छ’ को सक्सेस पार्टीमा फिल्म ‘वडा नं ६’ निर्माणको घोषणा पनि गरियो । दिपक, दिपा र निर्मलको लगानी रहने यस फिल्मको निर्देशक तथा कलाकार भने पक्का भैसकेको छैन । यसको पटकथा अभिमन्यू निरवीले लेख्दैछन् । वैशाखमा प्रदर्शन गर्ने गरी फिल्म ‘वडा नं ६’ को निर्माण तयारी हुँदैछ । ‘फिल्म छ एकान छ’ को सक्सेस पार्टीमा निर्देशक दिनेश डिसी र अभिनेत्री निता ढुङ्गाना भने निमन्त्रणा पुग्दा पनि सहभागी भएनन् ।