एक समयको हिट रेखा थापा र निखिल उप्रेतीको जोडी पुनः पर्दामा दोहोरिने सम्भावना देखिएको छ । अभिनेता निखिल उप्रेतीले निर्माण एवं निर्देशन गर्ने नयाँ नेपाली फिल्ममा अभिनय गराउने प्रस्ताव लिएर अभिनेत्री रेखा थापा समक्ष निखिल स्वयम् पुगेपछि यो हिट जोडी पुनः पर्दामा दोहोरिने सम्भावना देखिएको हो ।

शनिबार, भदौ ७ गते अभिनेता उप्रेती चावाहिलस्थित रेखा निवासमा आफुले निर्माण एवं निर्देशन गर्ने नयाँ नेपाली फिल्ममा अभिनय गराउने प्रस्ताव लिएर पुगेका थिए । भेटमा रेखाले पनि समय मिलेसम्म आफ्नो फिल्ममा अभिनय गर्ने वचन दिएको निखिलले बताए । फिल्म छायाँकनको लोकेशन बुझ्न सर्लाही पुगेका निखिलले न्यूजपेजथ्रीडटकमसँग भने, ‘हो, म फिल्म खेल्ने प्रस्ताव लिएर रेखा समक्ष पुगेको हुँ । समय मिलेसम्म रेखाले मेरो फिल्ममा अभिनय गर्ने बचन दिएकी छिन् ।’

एक समय निखिल र रेखाबिच शितयुद्ध थियो । रेखाले निखिलसँग फिल्म नखेल्ने घोषणा नै गरेकी थिइन् भने निखिलले पनि आफुले खेल्ने फिल्ममा रेखाको ‘अप्सन’ मा अन्य हिरोइनलाई अवसर दिएका थिए । तर, विगतको शितयुद्धलाई बिर्सदैं यी स्टार एकै पर्दामा अभिनय गर्न राजी भएको प्रवल सम्भावना देखिएको छ । यो सम्भावनाले नेपाली फिल्म हेर्न गुमेका दर्शक समेत फिर्ता आउने एक थरी फिल्मकर्मीबिच विश्लेषण सुरु भैसकेको छ । 

निखिलले फिल्मको प्रस्ताव लिएर आएको बारे ‘हिम्मतवाली’ रेखाले भनिन्, ‘निखिल दाई फिल्म खेल्ने प्रस्ताव लिएर मसँग आउनु भएको हो । यो मेरो लागि भन्दा पनि सम्पूर्ण फिल्म क्षेत्रको लागि गर्वको कुरा हो । निखिल दाईको पुनरागमनलाई हृदय देखि नै स्वागत गर्दै समय मिलेसम्म उहाँले निर्माण एवं निर्देशन गर्ने फिल्म खेल्ने वचन दिएको छु ।’ 

अभिनेता उप्रेतीसँग फिल्म नखेल्ने भनी एक समय रेखाले दिएको अभिव्यक्ती बारे उनको प्रष्टोक्ती छ, ‘कुनै समय थियो जतिबेला हामी व्यावसायिक प्रतिस्पर्धामा थियौं । तर, अहिले समय फेरिएको छ । नेपाली फिल्म क्षेत्रमा निखिल दाईजस्तो हिरोको अभाव भैरहेको छ । निखिल दाईसँग मेरो व्यक्तिगत रिसिवि कहिल्यै थिएन । त्यसैले अहिले उहाँसँग फिल्म खेल्न मलाई कुनै आपत्ती छैन ।’

रेखासँगको शितयुद्धको बारेमा निखिलले पनि रेखाको जस्तै भनाई राखे । निखिलले भने, ‘मेरो रेखासँग कहिल्यै व्यक्तिगत रिसिवी थिएन । एक समय हामी व्यवासायिक प्रतिस्पर्धामा थियौं । अहिले त्यो समय छैन । सँगै फिल्म नखेल्दा पनि हामी भेट्दा एक अर्कासँग बोलिरहेका  हुन्थ्यौं ।’ आफुले निर्देशन गर्ने हिन्दी फिल्ममा समेत रेखालाई विशेष भूमिकामा प्रस्तुत गर्ने जमर्को गरिरहेका निखिलले वर्तमान फिल्म बजार रेखाले नै धानिरेको समेत भने । 

निखिलले भने, ‘फिल्म बजार पहिलाको जस्तो छैन । हाम्रो समयका दर्शक कहाँ गए ? फिल्म क्षेत्र हाक्ने अहिले रेखा मात्रै एक्लो व्यक्ति हो ।’  निखिल र रेखाले अभिनय गरेको ‘धड्कन’, ‘बरमाला’, ‘कर्मयोद्धा’, ‘कर्णविर’, ‘हामी तीन भाई’, ‘निखिल दाई’, ‘क्रोध’ लगायत दर्जन फिल्म व्यवसायिक रुपमा सफल छन् । निखिल र रेखाको जोडीलाई फिल्म नगरीमा स्वागत् । नाम सार्वजनिक नगरिएको निखिलको फिल्मको छायाँकन एक महिनापछि हुँनेछ । निखिलेले निर्देशन गर्ने भनेको हिन्दी फिल्मको निर्माण कार्य भने तिहार पछि मात्रै सुरु हुने भएको छ ।