युवराज श्रेष्ठ, लमजुङ - बाबु आमाले सानै उमेर देखि विदेशी सेनामा भर्ति गर्ने सपना बोकेका सृजन गुरुङ एकाएक पत्रकारितामा लाग्छन् । पटक– पटक सेनामा भर्ति गराउन छोरालाई भर्तिकेन्द्र लैजाँदा पनि अन्तिम सयममा भर्ति हुन छोडेर पढाईलाई निरन्तरता दिन्छन् सृजनले । अनि पत्रकार बनेर गाउँमा प्रवेश गर्छन् ।

यो कहानी बास्तविकता नभई हालै निर्माण सम्पन्न भएको गुरुङ संस्कृतिमा आधारित चलचित्र ‘कर्म’ को हो । चलचित्र ‘कर्म’ को मुख्य भुमिकामा रहेका लमजुङ बाहुन डाँडाका विष्णु गुरुङ चलचित्रमा सृजन नामले खेलेका छन् । सधै लाहुरे हुने परम्परालाई छाडेर उच्च शिक्षा अध्यन गरी अन्य क्षेत्रमा पनि लाग्नुपर्ने चलचित्रले सन्देश दिएको छ । यस अघि पनि विभिन्न चलचित्रमा सहायक भुमिकामा अभिनय गरिसकेका विष्णु चलचित्र ‘कर्म’ मा भने पहिलो पटक मुख्य भुमिकामा देखा परेका हुन् । 

चलचित्रमा विष्णु उच्च शिक्षा अध्ययन गरी प्रकाशित आदर्श समाज दैनिकमा जनजाति विट हेर्ने पत्रकार बनेका छन् । पत्रकारिता कै दौरानमा नायिका लमजुङको पसगाउँ निवासी शान्ति गुरुङसँग उसको विवाह हुन्छ । तर घर परिवारले गुरुङ जाति भित्र पनि सानो जात भन्दै शान्तिलाई घरमा प्रवेश दिँदैन । र पछि पत्रकारको रुपमा गाउँ फर्किँदा गाउँमा भब्य स्वागत गर्छन र उनका परिवारले पनि शान्तिलाई स्विकार्न बाध्य हुन्छन् । गाउँ फर्कदा आफुसँगै अध्यन गरेका साथी लाहुरे हुने आशामा पढाई छाडेको तर लाहुरे नभई गाउँमा रक्सीमा मात्तिएको देख्दा सृजन दंग पर्छन् । यसरी चलचित्र ‘कर्म’ मा पहिलो फटक शिर्ष भुमिकामा देखाा परेका विष्णुले चलचित्रमा धेरै मिहिनेत गरेकाले सफल हुनेमा आशावादी छन् ।

विष्णुले भने ‘मुख्य भुमिकामा पहिलो पटक खेल्ने अवसर पाएको छु, कथा राम्रो भएको र चलचित्र युनिटले धेरै नै दुःख गरेकाले सफल हुने विश्वास लिएको छु ।’ चलचित्र गुरुङ भाषामा भएपनि पत्रिकारसँग सम्बन्धित केही अंशलाई नेपालीकरण गरिएको छ । यसअघि बनेका गुरुङ भाषाका चलचित्र भन्दा भिन्न शैलीको प्रस्तुतिबाट दर्शकलाई मनोरञ्जन प्रदान गर्नका लागि चलचित्रको केही अंश नेपालीकरण गरिएको निर्माता कुमार गुरुङको भनाइ छ । 

मस्यँकुकोट आमा समूह लवाङको पहिलो प्रस्तुति रहेको चलचित्रको पोष्ट प्रोडक्सनको जिम्मेवारी श्री ब्ल्याक फ्रेम पोखराले लिएको छ । पोखरासहित तनहुँको राङ्दी गाउँ, कास्कीको लवाङ, घान्द्रुक, धम्पुस लगायतका विभिन्न पर्यटकीय गाउँमा पुगेर चलचित्रको छायाड्ढन गरिएको निर्माता गुरुङले जानकारी दिए । बोनी गुरुङको कथा एवं निर्देशन रहेको सो चलचित्रको छायाड्ढन पोखरेली सिनेकर्मी श्रीकान्त सिग्देलले गरेका छन् । 

पत्रकार हरि भट्टराईको सम्वाद लेखन रहेको कथालाई खुशीमान गुरुङले भाषानुवाद गरेका हुन् । कथामा विष्णु गुरुङ, अजय गुरुङ, शान्ति गुरुङ, ऋष्मा गुरुङ लगायतका कालकारले अभिनय गरेका छन् । चलचित्र आउँदो भदौ महिनाको अन्तिम सातादेखि प्रदर्शनी गरिने निर्माण पक्षले जनाएको छ । चलचित्रमा एक नेपाली भाषाको र तिन गुरुङ भाषाको गरी चार गित समावेश छन् । उक्त चलचित्र यही भाद्र १४ गते सदरमुकाम बेसीशहरमा प्रदर्शन हुँदैछ । गुरुङ समुदायको उद्गम स्थल मानिने लमजुडमा चलचित्रले सफलता पाउनेमा निर्माण पक्ष विश्वस्त छन् ।