आइतबार, काठमाडौँको कुमारी हलमा केहि फरक दृश्य देखियो ।  रातो गुलाफ, चकलेट अनि ग्रिटिङ्स कार्ड सहित  केहि युवतीहरुको समुह हलमा कसैलाई कुरिरहेका देखिन्थे ।  प्रणय दिवस अगावै रातो गुलाफ सहित हलको छेवैमा उभिएकीहरुप्रति सबैको आँखा गईरहेको थियो ।  

तर, असामान्य मान्दै हेरिएका नजरहरुलाई पन्छ्याउदै अप्ठ्यारो नमानी ती समुह कसैको पर्खाईमा थिए, भनौ कसैलाई भेट्न आतुर थिए । कुमारी हलको च्यानल गेटतर्फ एकटक आँखा  पुर्याईरहेका ती कलेजगर्ल हरु कसैको बेजोड प्रतिक्षामा देखिन्थे ।  ‘कृ’ को हल रिपोर्ट बुझ्न गएका हामीले सोध्यौं, यो रातो गुलाफ लिएर कसलाई कुरीरहनु भएको ? ।

‘अनमोललाई...’, एकै स्वरमा, तिनीहरुले जवाफ दिए । अनमोल केसी अभिनित फिल्म ‘कृ’ चलीरहेको उक्त हलमा संजोग बस अनमोल  उपस्थित हुने कार्यक्रम नै रहेछ । ‘कृ’ को विशेष शो हुँदैरहेछ । अनमोल केसी उक्त कार्यक्रममा आउने मेसो पाएपछी आफुहरु अनमोललाई भेट्न उक्त हलमा आएको, उनिहरु मध्यकै एकले जनाईन् ।

 बिहानदेखि नै अनमोलको लागि भनेर ‘रोज’ किन्न दुकान धाएका कुरा उनिहारुले हामीलाई बताए । ‘हामी धेरै एक्साईटेड छौं, अनमोललाई भेट्न, विई लव यु अनमोल’ ,  एकै स्वरमा गुन्जिए युवतीहरुका आवाज ।  अनमोलको सबै फिल्म हेरिसकेको बताउने अनमोलका तिनै फ्यानले कृ अत्यन्तै राम्रो लागेको बताए । अनमोललाई भेट्न ३ बजेदेखि हलमा पुगेका उनीहरुलाई पनि थाह थियो, अनमोल पांच बजे आउंदै छ भनेर । तर, आफ्नो ड्रिम बोई अनमोललाई भेट्न उनीहरु केहि घण्टा अगावै त्यंहा पुगेका थिए  ।

 दिनको उज्यालोलाई कालो बादलले ढाक्दै गर्दा अभिनेता अनमोल कुमारी हलको च्यानल गेटमा देखा परे  । अनमोल सवार कार गेटमा देख्ना साथ ति युवतीहरु चर्को स्वरमा कराउन लागे, ‘अनमोल... अनमोल’, विई लव यु अनमोल’ ।

गाडीबाट ओर्लेर अनमोलले पनि त्यहि चर्को आवाजलाई पच्छ्याए  । युवतीहरु निकै खुशी देखिन्थे । अनमोल उनीहरु कै छेउ पुग्नासाथ कतिले अनमोलको हात समाए भने, कतिले आफुले ल्याएका रोज दिन भ्याए । अनमोललाई साक्षात भेटेका ती समुह कि एक युवती भने रुईन् पनि ।  

युवा दर्शकको ढुकढुकी नै अनमोल । त्याँहा, उपस्थित बच्चादेखि बुढोसम्मलाई अनमोल संगै फोटो खिचाउनु थियो । युवा फ्यान अनमोलसंग एक सेल्फी खिच्नका लागि लालायित थिए । शो सुरु हुनु अगाडी अनमोलले पनि कत्ति फ्यानहरु संग फोटो खिचाए । अनमोलसंग सेल्फी खिचेकाहरुको अनुहारमा छुट्टै मुस्कान झल्किएको थियो । खिचाउन नपाएका कत्ति भने, अनमोललाई साक्षात देख्न पाएकोमा खुशी देखिन्थे । अनमोल पनि आफ्ना फ्यानहरु संग सेल्फी खिच्न र अटोग्राफ दिन व्यस्त देखिन्थे ।

गुलाबी गाउनमा अनमोलको हात समाई त्याँहा देखा परेकी अदितीले यत्तिका धेरै मिडियासंग फेस गर्न पाउँदा खुशी लागेको  बताइन् ।  उता फ्यान फोलोवर्सले घेरिएका अनमोलले दर्शाको यस्तो माया पाएको आफु बिके खुशी भएको बताए ।

त्याँहा उपस्थित कतिले भने अनमोलप्रतिको युवतीको क्रेजलाई सहजै लिएनन् ।  निर्माण टिमले नै युवतीलाई त्याँहा खट्टाइएको हल्ला त्याँहा सुनियो पनि । तर जे होस् मान्छेलाई पत्याउनै गाह्रो हुने त्यस्ता फ्यान फोलोवर्स पनि अनमोलले कमाएका छन् ।

अभिनेता अनमोल युवा दर्शक माझ निकै प्रख्यात छन् । उनका डाईहार्ट फ्यान पनि निकै छन् ।

सायद, आफ्ना पांच फिल्मबाट अनमोलले कमाएको पनि यहि दर्शकको साथ् अनि माया नै हो । अनमोल अभिनित फिल्म ‘कृ’ लाई सुरेन्द्र पौडेलले निर्देशन गरेका हुन् । विशेष शो हेर्न आएका सबैले फिल्म मन परेको बताए । प्रदर्शनरत यस फिल्मले आक्रामक व्यापार गरेको निर्माण टिमले जनाएका पनि छन् ।