दिल्लीमा उपचाररत निर्माता एवं अभिनेता श्रीकृष्ण श्रेष्ठको गए शनिबार राती दिल्लीको अस्पतलामा निधन भएको खबर निर्देशक आकाश अधिरकारीले पुष्टि गरेका हुन् । असार २३ गते अभिनेत्री श्वेता खड्कासँग बिहे गरे लत्तगै श्रीकृष्ण हनिमुन यात्राको लागि भन्दै भारतर्फ निस्किएका थिए । एक्कासी सुख्ख खोकीले च्यापेको भन्दै श्रीकृष्णलाई दिल्ली अस्पतालमा उपचारको लागि भर्ना गरिएको थियो । केही साता पछि श्रीकृष्णलाई ‘डिप निमोनिया’ देखिएको पारिवारीक श्रोतले जानकारी गराएको थियो । ‘डिप निमोनिया’ भएको बताएपनि पारिवारीक श्रोतले श्रीकृष्णको निधनको खास कारण भने बाहिर ल्याउन चाहेको छैन ।

श्रीकृष्णका दाजु केही दिन अगाडी मात्रै उनको स्वास्थ्य अवस्था थप बुझ्न दिल्ली पुगेका छन् । दर्शक तथा शुभ चिन्तकलाई सम्बोधन गरिएको अडियो रेकर्ड गरी फिल्म ‘कोहिनूर’ प्रदर्शनमा आउने साउन २३ गते नेपाल पठाएका थिए । निर्माता एवं अभिनेता श्रीकृष्ण श्रेष्ठको निधनले सिङ्गो चलचित्र क्षेत्र मर्माहत भएको छ । स्व. निर्माता एवं अभिनेता श्रीकृष्ण श्रेष्ठको आत्माको चिर शान्तिको कामना गर्दैै शोकाकुल परिवारप्रती धैर्य धारणको कामना गर्दछौं । प्रदर्शनरत फिल्म ‘कोहिनूर’ प्रदर्शन अगाडी श्रीकृष्णले दिल्लीबाट रेकर्ड गराएर पठाएको अडियो अंशको शब्द शैलीमा तल प्रस्तुत गरेका छौं ।

"मेरो भगवान् रुपी दर्शक महानुभावहरु नमस्कार म श्रीकृष्ण श्रेष्ठ लगायत नेपा मुभिजको तर्फबाट । नेपा मुभिजले बनाएको पहिलो चलचित्र ‘कहाँ भेटिएला’ लाई माया र स्नहेले सफलताको शिखरसम्म पुर्याइदिनु भयो । त्यो सफलताको शिखरसम्म पुगेको चलचित्रको बोझलाई काँधमा राखेर म अगाडी बढेको छु । त्यही अनुरुप तपाइँहरुको मायाले मैंले ‘कोहिनूर’ चलचित्र बनाएको छु । चेलीहरुको विषयमा देशदेखि विदेशसम्म पुगेर सुटिङ गर्ने मेरो एउटा सपना थियो । मेरो कल्पना र सपनालाई निर्देशक आकाश अधिकारीले साकार पारिदिनु भएको छ । उहाँले असाध्ये मिहेनत गरेर सिनेमा बनाउनु भएको छ । यसको रिलिज पनि तपाईहरुसँग बसेर एकदमै जोडका साथ गर्रौ भन्ने सोच थियो । त्यो पूरा गर्न सकिनं । जसरी ‘कहाँ भेटिएला’ प्रदर्शन हुँदा मलाई मिडियाका साथीहरुले सहयोग गर्नु भएको थियो । यो चलचित्रमा पनि त्यति नै सहयोग गरिरहनु भएको छ । उहाँहरुलाई धेरै धेरै धन्यवाद । यो चलचित्र मेरो होइन, यो चलचित्र तपाइँहरुको हो । हाम्रो हो त्यसकारण तपाइँहरुले म र श्वेता जी नभएतापनि, यो चलचित्रलाई आफ्नो सम्झेर माया गरिदिनुस् । बच्चा सम्झेर काखमा राखिदिनुस् । त्यो नै मेरो लागि तपाइहरुले दिएको औषधी हुनेछ, माया हुनेछ । मेरो परिवार सबैजना नेपालमा बसेर तपाईहरुको लागि ‘कोहिनूर’ उपहार दिन लागि पर्नु भएको छ । म लाग्नु र उहाँहरु लाग्नु एउटै हो । तपाईहरुले म नै सम्झेर उहाँहरुलाई सहयोग गरिदिनु होला भन्ने हल, वितरक, मिडियाकर्मी तथा दर्शकसँग अनुरोध गर्दछु । र, आकाश जीलाई धेरै धेरै धन्यवाद । उहाँले धेरै नै मिहेनत गरेर ‘कोहिनूर’ रिलिज गर्ने तर्फ लागि पर्नु भएको छ । म के मा ढुक्क छु भने त्यहाँ हामी भएपनि नभएपनि चलचित्र जुन तरिकाले रिलिज हुनु पर्ने हो, त्यही हिसाबले रिलिज हुन गइरहेको छ । मान्छेको जिवनमा तल र माथि अनि सुख र दुःख हुन्छ । सुख र दुःख जिवनको चौतारी हो भन्छन् त्यही चौतारीमा म बसिरहेको छु । तर, तपाईहरुबाट म धेरै टाढा छैन, नजिक छु । सायद फिल्म रिलिज भएको केही दिनमै तपाइहरुसँग बसेर फिल्म हेर्न सुख दुःखको साथमा म आउँछु धन्यवाद नमस्कार । "