स्क्रिप्ट राइटर प्रदिप भारद्वाजले निर्माण गरेको फिल्म ‘चलेछ बतास सुस्तरी’ आउँदो शुक्रबारदेखि प्रदर्शनमा आउँदैछ । उनको सँगै अन्य दुई फिल्महरु ‘प्रेम गीत’ र ‘क्लासिक’ पनि प्रेम दिवसको अवसर पारेर प्रदर्शनमा आउँदैछन् । यी तीन फिल्मको प्रदर्शन प्रतिस्पर्धालाई लिएर फिल्मी बजारमा व्यापक चर्चा चलिरहेको छ । यसै सेरोफेरोमा रहेर उत्सव रसाईलीले स्क्रिप्ट राईटर तथा निर्माता प्रदीप भारद्वाजसँग कुराकानी गरेका छन् ।

१.तीन फिल्मको प्रतिस्पर्धामा आफुलाई कत्तिको बलियो रुपमा प्रस्तुत गर्नु भएको छ ?

युद्धमा होमिएको योद्धाले आफुलाई कमजोर ठान्दैन । नराम्रै फिल्म बनाउनेहरुले त आशा गरि राखेको हुन्छन् भनेपछि मेरो इतिहास हेर्ने हो भने म त्यति नराम्रो फिल्म बनाउनेमा पर्दिनं । सफलताको आशा गर्नु म त्यति अनुचित ठान्दिंन । राम्रै होला भन्ने आशा लिएको छु । म कमजोर छैन । 

२.बजारमा त तपाईंलाई तीन मध्ये कमजोर प्रतिस्पर्धीको रुपमा हेरिएको छ नि ? 

त्यो किन ठानियो मलाई थाहा छैन । कमसेकम फिल्म हेरेर यस्तो ठानिदिएको भए हुन्थ्यो । पब्लिसीटिको आधारले बलियो र कमजोर ठान्ने हो भने हावा भरिएको बेलुनलाई ठुलो भनिए जस्तै हो । एउटा सानो पिनले पनि घोचेर फुट्छ । फिल्म हेरेपछि भन्ने कुराहरु थिए, फिल्म नहेरेरै यसो भन्ने टप्परटुइँयाहरुलाई मेरो भन्नु केही पनि छैन । अब विद्वानहरुले नै पब्लिसीटिको आधारमा विश्लेषण गर्नु भएको हो भने त्यो एउटा मुर्खयाँइ हो ।

३.प्रतिस्पर्धालाई व्यवस्थापन पनि गर्न सकिन्थ्यो होला नि हैन ?

निर्माता भएको हिसाबले मिलाउन सकिन्थ्यो । मिलाउन खोजेको हो मिलेन । 

४.सुदर्शन थापा र दिनेश राउत तपाईंकै मित्र हुन् क्यारे ! मित्रहरुसँग किन जुध्न आउनु भयो ?  

दुईटा मित्रहरुको फिल्म लाग्दैछ, अर्को मित्रको फिल्म थपिएको छ । जोसँग पनि जुध्नै पथ्र्यो । यो चोटी मित्रहरुसँग जुध्नु पर्यो । जुध्नु भन्दा पनि एकै मितिमा हाम्रो फिल्म लाग्दैछ ।

५.यो प्रतिस्पर्धालाई ‘ईगो’ को लडाईंको रुपमा लिइएको छ नि ? 

तपाईंले जो जो मित्रहरुको नाम लिनु भयो । त्यो फिल्ममा उहाँहरुको पैसा परेको छैन । यसमा त मेरो पैसा परेको छ नि । मैंले धेरै सोच्नु पर्ने थियो र मैंले धेरै सोचेर नै त्यो मितिमा फिल्म हालेको हुँ ।

६.यसो हो भने विजयी र पराजयीले तपाईंलाई खास अर्थ राख्ने भयो ? 

यही भएर पनि मैंले यो मिति रोजेको हो । मैंले धेरै नै गणितिय हिसाब गरेर यो मितिमा फिल्म चलाउने निर्णय गरेको हुँ । एउटा लभ स्टोरी फिल्मको लागि एउटा राम्रो मिति ‘भ्योलेनटाइन्स डे’ हो । केही राम्रो होला भन्ने हिसाबले हालिएको हो । अरुको कमजोरी र बलियो पक्ष केलाएर हालेको चाहिं होइन । 

७.तपाईंको फिल्ममा त ‘स्टार कास्ट’ छैनन् ! 

म छु नि त स्टार । म भन्नुको मतलब स्क्रिप्ट छ हाम्रो स्टार । विषयवस्तु बलियो छ । स्टार भएका फिल्महरु पनि असफल भएका हामीले देखेका छौं । स्टार बोकेर फिल्म बनाउनेमा म पर्दिनं । म आफुमा विश्वास गर्ने मान्छु हु । मलाई आफ्नो उत्पादनमा विश्वास छ । मैंले एउटा राम्रो फिल्म बनाएको छु । मेरो फिल्मको कथामा को मिल्छ मैंले त्यो लिने हो । त्यो होइन कि चलेको स्टारको लागि फिल्म बनाएर आफ्नो स्क्रिप्टलाई बिगार्नु पर्छ या जर्बजस्ती मिलाउनु पर्छ । को ‘कास्ट’ गर्दा सही हुन्छ विचार गरेर हामीले छनोट गरेका छौं । मेरो लागि यो कास्टिङ नै ‘म्याच’ भयो मैंले यो नै गरें । 

८.उसो भए भाई (प्रमोद) को लागि फिल्म बनाइदिनु भयो ? 

प्रमोद एकदमै राम्रो एक्टर हो । पछि फिल्म हेर्दा पनि थाहा हुन्छ । अघिल्लो फिल्ममा पनि ठुला ठुला राष्ट्रिय दैनिकका आधा पेज प्रमोदको अभियनको तारिफमा भरिएका थिए । उ नाटकबाट आएको मान्छे हो । एउटा एक्टर पछि नपरोस् भनेर पनि सहयोग चाहिं गरेको हो । 

९.नायिकामा सुस्मा कार्की ‘मिस कास्ट’ भयो भन्ने पनि भनिन्छ नि ।

सुस्माको विकल्पमा मैंले कोही देखिन । रेखा (रेखा थापा) प्रमोदसँग ‘म्याच’ हुन्नथिन । रेखाको पछि मैंले देखेको भन्या सुस्मा नै हो । उसको ठाउँमा मैंले अरु देखिन । डराउने मान्छेहरुले के के भन्छन् होला । मलाई सुस्माले असाध्यै राम्रो काम दिएको छ । कमसेकम फिल्म हेरेर भन्नु पर्ने कुराहरु थिए नहेरिकन भन्नु भनेको चाहिं पागलपन हो । पागलहरुले के भन्छन्, त्यो विषयमा बहस गर्नु त्यति जरुरी पनि छैन ।

१०.सुस्माको निकै नै तारिफ गर्नु भयो नि ?

किनभने उसलाई मैंले बच्चादेखि चिनेको छु । मैंले उसँग भएको प्रतिभालाई लिएको हो । सुस्मा कार्कीको अभिनयको क्षमता के हो यो फिल्मले देखाएको छ । ऊ एउटा सानो आइटममा साँघुरेर बस्नु हुँदैन भन्ने मेरो चाहना हो । मैंले सुस्मासँग यो क्षमता पनि छ है, भनेर निकाल्न खोजेको हुँ । हिजोको दिनमा विकास चौधरी संगीतकार लिंदा यस्तो केटा किन लिएको ? एक सय एक संगीतकार पाउँनुहुन्छ भनेका थिए । आज उ मेरो फिल्मबाट ‘ब्रान्ड’ बन्यो । झरनामा माथिबाट पानी नै झरेको छ, तपाईंले के थाप्नु हुन्छ भन्ने हो । कचौरा थाप्नेको कचौरा भरिन्छ बाल्टी थाप्नेको बाल्टी भरिन्छ । आफुसँग कुन भाँडो छ त्यसमा भर पर्छ ।

११.फिल्मको कथावस्तु चाहिं के छ ?

तपाईंले बाटामा हिंडेका सय जना केटा या केटीहरुलाई तेरो लभ स्टोरी के भनेर सोध्नु भयो भने मेरो लभ स्टोरी ‘चलेछ बतास सुस्तरी’ को हो भनेर भन्नेछन् । त्यो मध्येपनि साँचो माया गर्नेहरुको कथा हाम्रो फिल्ममा छ । यो नयाँ स्टोरी होइन । यसलाई मान्छेहरुले याद गरेका थिएनन्, मैंले तिमीहरुको लभ स्टोरी यो हो भनेर देखाइदिएको मात्रै हो ।

१२.यसको लागि पनि हलमा दर्शक त आउनु पर्यो नि ? 

त्यो डेटको लागि एउटा माहोल बनेको छ । चार वटा कपडा पसल भाको ठाउँमा पाँच वटा बन्छ । त्यो पनि स्वतः बजार बन्छ । लगेर छुट्टै राख्दा चल्ने नचल्ने सम्भावना हुँदैन । मैंले आफ्नो तरिकाले मार्केटिङ गरेको छु । लगभग एक करोडको पब्लिसीटि भएको मितिमा दर्शकहरु पक्कै पनि आउनु हुन्छ होला । अब दर्शकको मुड नै भएन भने कसैको केही लाग्दैन । यदि दर्शक आउनु भयो भने हाम्रो पनि फिल्म त्यहाँ छ । मैंले पनि दर्शकलाई मेरो फिल्मको बारेमा जानकारी दिएको छु । फिल्म हेरेपछि उहाँहरुले के भन्नुहुन्छ ? मेरो फिल्म भनेको ‘वर्ड अफ माउथ पब्लिसीटि’ मा भर पर्ने फिल्म हो । मैंले यसको लागि ठुलो धनराशी खर्च गरेको छैन । किनभने पचास लाख प्रचार प्रसारमा खर्च गर्यो भने त्यो उठाउन मात्रै दुई करोडको व्यापार गर्नुपर्छ । अरुको पब्लिसीटिको खर्च खठ्दा म सुरक्षित हुन्छु ।

१३.फिल्मको निर्देशन चाहिं किन आफैले गर्नु भएन ?

निर्माता र निर्देशन एकै जना बन्दा ठुलो अभिभारा बोक्नु पर्ने भयो । निर्माताको रुपमा आफ्नो पहिलो फिल्म भएको हुदा सजिलोको लागि निर्देशक आर्कैलाई लिदा राम्रो हुन्छ जस्तो लाग्यो ।