डा.बाबुराम भट्टराईले खोलेको नयाँ पार्टी नयाँ शक्ति प्रवेशका कारण चर्चामा रहेकी अभिनेत्री करिश्म मानन्धरले निर्माण गरेको फिल्म ‘फागु’ आउँदो फागुन ७ गतेदेखि प्रदर्शनमा आउँदैछ । ‘बाबु साहेव’ पछि फिल्म निर्माणमा फर्किएकी करिश्मा यतिबेला आफ्नो पछिल्लो फिल्मको प्रचार प्रसारमा व्यस्त छिन् । उनै अभिनेत्री, निर्माता तथा नयाँ शक्तिकी सदस्य करिश्मा मानन्धरसँग उत्सव रसाईलीले कुराकानी गरेका छन् । 

तपाईंको फिल्म ‘फागु’ रिलिजको क्रममा छ, नयाँ शक्ति प्रवेशले दर्शक भड्केलान् जस्तो लाग्दैन ? 

मलाई त्यस्तो लाग्दैन । कला भनेको सर्वव्यापी चिज हो । भारतसँग रुष्ट थियौं तर हामीले हिन्दी फिल्म हेर्न छोडेका त थिएनौं । किनभने हामी फिल्मलाई माया गर्छौ । म यो राम्रोको लागि गर्दैछु । राम्रोको लागि गर्दैछु भनेपछि फिल्मलाई यसले असर गर्छ जस्तो लाग्दैन । राजनीति र फिल्म अलग क्षेत्र हुन् । राजनीतिक पार्टीप्रति वितृष्णा जागेर केही व्यक्तिहरुले नराम्रो भन्नु भयो होला । ‘विचरा करिश्मा किन गएको होला’ भन्नु भयो होला ।म ‘विचरा’ होइन । 

फिल्ममा दर्शकको ध्यान तान्न चाहिं कत्तिको पापड बेलिरहनु भएको छ ?

म अरुको जति त्यति पापड बेलिरहेको छैन । तर पापड जति बेलेतापनि दिने भनेको जानकारी नै हो । मलाई लाग्छ, हामीले पुग्ने जानकारी चाहिं दिइसकेका छौं । रिलज हुनु भन्दा एक हप्ता अगाडी चाहिं अझै व्यापक हुन्छ किनभने यसले दिमागमा अझ रुपमा राख्छ । 

लामो समयपछि निर्मातको रुपमा फर्कन भयो तर सहकार्यमा । किन एक्लै फिल्म निर्माण गर्ने आँट नभएर हो ? 

आँट नभएको होइन । म योजनामै थिएँ । हाम्रो यहाँ मात्रै होइन, विदेशमा पनि सहकार्यमै काम भैरहेको हुन्छ । जसले गर्दा जोखिम कम हुन्छ । सबैको सल्लाह सुझाव आउँछ जसले गर्दा राम्रो पनि हुन्छ । अब आउने प्रोजेक्ट चाहिं म सोलो रुपमा गर्छु ।

तर तपाईं सोलो भएको भए अझ धेरै महत्व हुन्थ्यो होला नि ? 

आफुले गरेका साना चिजको पनि महत्व राख्न जान्नुपर्छ । यो प्रोजेक्ट बिचमा नघुसेको भए म त्यो गर्ने योजनामै थिएँ । तर म सम्झनाप्रति कृतज्ञ छु किनकी उसले एउटा सुतिरहको बाघलाई उठाए जस्तो भएको छ ।

 भनेपछि ‘फागु’ चाहिं तपाईको परिक्षण फिल्म हो ? 

त्यस्तो पनि होइन । एउटा फिल्म बनाउँ भने सकिन्छ । तर, यसरी गर्दा ठिक हुन्छ जस्तो लाग्यो । परिक्षण गरेर या डराएर ‘फागु’ बनाएको होइन ।

भोलि ‘फागु’ असफल भएको खण्डमा त्यसले तपाईंको अर्को प्रोजेक्टलाई कुनै असर पार्छ ? 

मलाई कुनै पनि खालको असर पर्दैन । किनभने मैंले नयाँ फिल्मको योजना बनाइरहेको छु, जसमा म निर्देशकको रुपमा पनि रहनेछु । ‘फागु’ जे भएतापनि फागु पूर्णिमा सबैलाई स्वागत छ । फागु पूर्णिमा मनाउन नै रोकिदैन भनेपछि अर्को प्रोजेक्ट त कसरी रोकिन्छ ?

‘फागु’ चाहिं कस्तो बनेको छ त ?

एकदमै फरक छ भनेर त म भन्दिंन । तर म के भन्छु भने फिल्म निकै नै रंगिन बनेको छ । फिल्मप्रति म एकदमै आशावादी छु । सम्भवतः शिल्पा (नायिका शिल्पा पोखरेल) को यो ह्याट्रिक हुनेछ । नयाँ नायक सुवासले पनि राम्रो गर्नु भएको छ । 

तपाईं राजनीतिक रुपमा पनि संलग्न भैसक्नु भएको छ । फिल्म निर्माण एवं निर्देशन र राजनीतिलाई कसरी तालमेल मिलाएर अगाडी बढ्नु  हुन्छ ?

हामी नयाँ शक्ति निर्माणको क्रममा छौं । राजनीति मेरो ‘प्यासन’ हो । यसमा म रमाउँछु । त्यसैले म दुवैलाई मिलाएर अगाडी बढ्छु । 

नयाँ शक्ति प्रवेशलाई लिएर बढी नै टिकाटिप्पणी भैरहेको छ नि । 

कुनै पनि राम्रो ठाउँमा पुग्नको निम्ति सजिलो कहिले पनि हुँदैन । अप्ठ्यारोहरु धेरै आइपर्छन् र त्यसले मलाई विचलित बनाएको छैन । किनकी म आफु के गरिरहेको छु, त्योप्रति म ‘क्लियर’ छु । तर आलोचनालाई पनि सल्लाहकै रुपमा लिइरहेको छु । राजनीति भनेको यस्तो एउटा क्षेत्र हो जहाँ धेरै नै आलोचना हुन्छ किनभने त्यहाँ पक्ष र विपक्षहरु धेरै नै हुन्छन् ।

तपाईं वहकाउमा नयाँ शक्ति प्रवेश गर्नु भयो भन्ने पनि सुनिन्छ । के यो सत्य हो ?

मेरो गड मदरले त मेरो फोटो आएपछि मात्रै थाहा पाउनु भएको थियो । यसको लागि मैंले विनोद जीलाई पनि सोधेको थिइँन । मैंले नितान्त आफैंले सोचेर यो गरेको हुँ । कसैले बल गरेर कुनै चिज पनि हुँदैन । म चाहदिन कि मेरो विचारमा अरु कसैको अवरोध ल्याओस् । हुन त मैंले एक वर्षदेखि नै राजनीतिमा जाने बारे सोचिरहेको थिएँ । म राम्रो समुहको पर्खाइमा थिएँ । मैंले यो अवसर पाएँ, म आफुलाई भाग्यमानी ठान्छु । किनभने म राम्रो व्यक्तिहरुको समुहमा सामेल भएको छु । 

नयाँ शक्तिको के कुरा चाहिं चित्त बुझ्यो ? 

हाम्रो राजनीतिक कालखण्ड हेर्ने हो भने राजतन्त्र आयो, लोकतन्त्र आयो, गणतन्त्र आयो । तर सत्तामा कोही पनि राम्रोसँग टिक्न नपाउने र काम गर्नै नपाउने । हरेक राजनीतिक पार्टी आउने जाने मात्रै भैरह्यो । संविधान समयमा बन्न सकेन । युवाहरु विदेशिएका छन् । नेपाल एकदम पछि परेको छ । अर्थतन्त्र खस्किदैं गएको छ । त्यसैले विकास आवश्यक छ भन्ने सोच उहाँको सोच छ, मलाई यो मन पर्यो । आउने पुस्तालाई केही दिएर जाउँ भन्ने सोचले पनि म गएको हुँ ताकि हाम्रो युवाहरु पलायन हुन नपरोस् । 

केहीले नयाँ शक्तिलाई पुरानाहरुको संगठन पनि भनिरहेका छन् नि ।

कुनै पनि एउटा क्षेत्रमा लागेर उत्कृष्टता हासिल गरिसकेका व्यत्तिहरुको जमात हो नयाँ शक्ति । एउटा मान्छे सय चोटी जन्मदैंन । म त नयाँ शक्ति नयाँ सोचको शक्ति पनि भन्छु । शक्ति भनेको सोचमा हुन्छ । जे चिज पनि कामले देखाउने हो । अरुले भनेको कुरालाई मैंले त्यति गम्भिर भएर लिएको छैन ।