निर्माता सुवास गिरीसँगको सहकार्यमा नायक आर्यन सिग्देलले दोश्रो फिल्म ‘क्लासिक’ निर्माण गरेका छन् । जसलाई निर्देशक दिनेश राउतले निर्देशन गरेका छन् भने आर्यनको अपोजिटमा नायिका नम्रता श्रेष्ठ प्रस्तुत भएकी छन् । सुवास, आर्यन, दिनेश र नम्रताको टिमको पहिलो फिल्म ‘नोभेम्वर रेन’ ले व्यापारिक सफलता हात पारेको थियो । यसकै क्रेडिट लिएर यो टिम यतिबेला दोश्रो सफलता हात पार्ने दौडमा छ । प्रेम दिवस लक्षित गरी माघ २९ गतेदेखि दर्शकमाझ ल्याउन लागिएको फिल्म ‘क्लासिक’ दृष्टिविहिन युवा युवतीको प्रेम कथामा आधारित छ । फिल्म मुख्य दुई पात्रहरु आर्यन र नम्रता दृष्टिविहिन भूमिकामा प्रस्तुत भएका छन् । यस प्रकारको भूमिकामा यो जोडी पहिलो पटक पर्दामा निभाएका हुन् । यही सेरोफेरोमा रहेर न्युजपेजथ्री डटकमका उत्सव रसाईलीले नायक तथा निर्माता सिग्देलसँग संवाद गरेका छन् ।


१.बन्द आँखाले संसारलाई कस्तो महसुश गर्दो रहेछ ?

आँखा खोलेर भन्दा पनि आँखा बन्द गरेर हेर्दा संसार सुन्दर रैछ । आँखाले यो संसार जस्तो छ त्यस्तो नै देख्छ । तर, जब हामी आँखा बन्द गर्छौं, हामी आफ्नै तरिकाले संसारलाई कल्पना गर्छौं । कल्पनाको संसार कसलाई सुन्दर लाग्दैन र ? 

२.तपाईंले ‘क्लासिक’ को पर्दामा कल्पना गर्ने संसार चाहिं कस्तो हो ?

सुरुको जीवनबाट ठक्कर खाएर जुन एउटा नयाँ जीवन मैंले पाएको हुन्छु । नयाँ जीवन नितान्त नयाँ नै छ । नयाँ जीवनमा नयाँ मान्छे भेटिन्छ, जतिबेला मेरा आँखाहरु बन्द भैसकेका हुन्छन् । मैंले आफ्नो जीन्दगीलाई महसुश गरेरै बिताउने निर्णय लिएको हुन्छु । त्यो पल पनि साँच्चै नै मिठो हुन्छ । 

३.भनेपछि दृष्टिविहिनको जीन्दगी चम्किलो छ ?

जब हामीले दृष्टिविहिनहरुसँग भेट्यौं । त्यसपछि निष्कर्श निकाल्यौं कि उहाँहरुको जीन्दगी अन्धकार छैन । यसैगरी हामीले दृष्टिविहिनको जीन्दगीलाई उज्यालो रुपमा प्रस्तुत गरेका छौं । हामीले फिल्म एकदमै ‘कलरफुल’ बनाएका छौं ।

४.के ‘क्लासिक’ बाट आर्यन सिग्देलले आफ्नो ‘प्याट्रन’ परिवर्तन गरेको हो ?

मैंले उस्तै देखिने तर भिन्न भिन्न भूमिका निभाइरहेको छु । यस्तै भिन्न मध्येको ‘क्लासिक’ को अर्को भूमिका हो । मान्छेहरुलाई लाग्न सक्ला, म एउटै भूमिकामा अल्झिरहेको छु । तर, मेरो काम गर्ने तरिका नै यस्तै हो ।

५.उसो भए तपाई आफ्नो भूमिका मोडिरहनु भएको छ ?

मोड्न खोजेको भन्दा पनि ‘क्लासिक’ को समय क्यारेक्टरलाई न्याय गर्ने प्रयास मात्रै गरेको हुँ । म एकै प्रकारको भूमिका गर्न रुचाउँछु भनेर मैंले कहिले पनि भनेको छैन । भोलिको दिनमा राम्रो सोच र राम्रो भूमिका भएको फिल्मको प्रस्ताव आउँछ भने जस्तो पनि बन्न तयार छु । 

६.दृष्टिविहिनको भूमिका के तपाईंको रोजाईको थियो ?

पक्कै पनि यो भूमिका मेरै रोजाइको थियो । म जहिल्यै पनि चुनौतीपूर्ण भूमिका गर्न रुचाउँछु । हामीले ‘वर्कसप’ मा दृष्टिविहिनहरुलाई पनि सहभागी गराएका थियौं ।

७.तपाईले निभाउनु भएको दृष्टिविहिन पात्रलाई दर्शकले कत्तिको पत्याउँलान् ? 

हामीले जुन मिहेनत गरेका छौं यसले गर्दा दर्शकले पक्कै पनि पत्याउनु हुन्छ जस्तो लाग्छ ।

८.प्रोमो सार्वजनिक भैसकेको छ । प्रतिक्रिया कस्तो पाइरहनु भएको छ ?

प्रोमोको प्रतिक्रिया साह्रै नै राम्रो पाइरहेको छु । नढांटी भन्नु पर्दा ‘क्लासिक’ को प्रोमोको प्रतिक्रिया ‘नोभेम्वर रेन’ को भन्दा दोब्बर राम्रो पाइरहेको छु । 

९.फिल्मको व्यापरप्रति चाहिं कस्तो आशा राख्नु भएको छ ?

यो त फिल्म प्रदर्शनपछि थाहा हुने कुरा हो । तर, ‘क्लासिक’ चाहिं पहिलाका फिल्महरु भन्दा राम्रो चल्ने धेरै नै आशा र विश्वास छ । 

१०.‘क्लासिक’ लाई आफ्नो फिल्मी करिअरसँग कसरी हेर्नु भएको छ ?

करिअर भन्दा पनि धेरै कुरामा ‘क्लासिक’ मसँग जोडिएको छ । किनभने यो फिल्ममा म आर्थिक हिसाबमा पनि जोडिएको छु । नयाँ भूमिका निभाएको छु । नयाँ फिल्म प्रदर्शनमा आउँदैछ । यसले भोलि अर्को फिल्म निर्माणमा पनि असर पार्छ जस्तो मलाई लाग्छ ।

११.फिल्म चल्छ भन्नेमा चाहिं कत्तिको विश्वस्त हुनुहुन्छ ?

फिल्म चल्नेमा म यसकारण विश्वस्त छु कि, हाम्रो पहिलो फिल्म ‘नोभेम्वर रेन’ भन्दा ‘क्लासिक’ को रेस्पोन्स दोब्बर राम्रो छ । दर्शकको माया र साथले नै हामीले दोश्रो फिल्म बनाएका हौं । यसले पनि हामी फिल्म चल्नेमा ढुक्क छौं । 

१२.तर तपाईंलाई लाग्दैन्, यो फिल्को प्रदर्शन मिति आफ्नो लागि अलि चुनौतीपूर्ण छ भनेर ?

चुनौती त्यो बेला थियो जतिबेला हामीले स्क्रिप्ट चयन गरिरहेका थियौं । फिल्म छायाँकन गरिरहंदा स्क्रिप्ट अनुसारको भैरहेको छ कि छैन् भन्ने हामीलाई चुनौती थियो । हामीले कुनै पनि कुरामा सम्झौता नै गरेको छैनौं । त्यसैले हामी फिल्म चल्नेमा विश्वस्त छौं ।

१३.भनेपछि प्रतिस्पर्धीलाई लिएर तपाई त्यति धेरै चिन्तित हुनुहुन्छ ?

मैंले प्रतिस्पर्धी कोही पनि देखिरहेको छैन । किनभने हामीले बनाउने भनेको फिल्म बनाएका छौं र तोकेको मितिमा प्रदर्शन पनि गर्दैछौं । एक वर्ष अघि नै हामीले ‘क्लासिक’ को प्रदर्शन मिति तय गरेका थियौं । फिल्म राम्रो बनेको छ । हाम्रो प्रतिस्पर्धा भनेको हाम्रै फिल्म ‘नोभेम्वर रेन’ सँग हो । अरु फिल्महरु यसैपनि कोही न कोहीसँग त प्रतिस्पर्धा परि नै हाल्छ । यो पनि यस्तै भएको हो । 

१४.माघ २९ लाई फिल्मी बजारमा ‘इगो’ को लडाईंको रुपमा पनि हेरिएको छ नि ?

मसँग कसैको पनि इगो छैन । मैंले इगाले ‘क्लासिक’ बनाएको होइन । फिल्म बुझेर हामीले दर्शकको लागि फिल्म बनाएका हौं । मैंले अघिपनि भनिसकें एक वर्ष अघि गरेको प्रतिवद्धतालाई मात्रै हामीले पुरा गरेको हौं । मैंले अरुको मितिमा आफ्नो फिल्म जुधाएको होइन । मैंले त आफैंले घोषणा गरेको मितिमा फिल्म चलाउन लागेको हुँ ।

१५.वर्षमा तीन वटा मात्रै फिल्म खेल्छु भनेर घोषणा गर्नु भएको छ । यो आवश्यकता अहिले नै किन महसुश गर्नु भयो ? 

वर्षमा यति उति भन्दा पनि म आफैं संलग्न भएर फिल्म खेलौं भन्ने मेरो सोच हो । यस्तो भएपछि वर्षमा तीन वटा भन्दा बढी फिल्म खेल्न सकिन्छ जस्तो पनि लाग्दैन । 

१६.भनेपछि बाहिरी ब्यानरका फिल्महरु अब खेल्नु हुन्न ? 

खेल्छु किन नखेल्नु ! तर त्यसमा मेरो पनि साझेदारी हुनु पर्यो । कुनै पनि फिल्मको सुरुवातदेखि अन्त्यसम्म मेरो संलग्नता होस् भन्ने मेरो चाहना हो । सुन्दा एउटा, खेल्दा एउटा र प्रदर्शन भएको पत्तै नहुने फिल्म चाहिं गर्दिनं भन्न मात्रै खोजेको हो ।

१७.रजतपटमा भित्रिएका नव नायकहरुको आगमनलाई लिएर तपाईं के भन्नुहुन्छ ?

म त भन्छु, मेरो समकक्षी नै कोही हुनुभएन । कोही बाहिर हुनुहुन्छ, कोही भएर पनि सक्रिय हुनुहुन्न । यसकारणले गर्दा दर्शकलाई ‘मनोटोनश’ हुन सक्छ । धेरै नयाँ कलाकार आउनु पर्यो । मेरो चाहना यो हो । तर आएपछि तयारीका साथ आउनुस् । यहाँ आएपछि फर्किनु नपरोस् । 

१८.नव नायकहरुको आगमनले आफुलाई असुरक्षित महसुश त गर्नु भएको छैन ?

छैन, छैन । म आफुलाई असुरक्षित महसुश गर्ने भए त किन यस्तो घोषणा गर्थें होला र ? सकेसम्म धेरै फिल्म खेलिहाल्थें नि !