‘माला’ फिल्म निर्देशन गरेर प्रशंसा पाउन सफल निर्देशक बबी भूपाल सिंहले दोश्रो फिल्म ‘सयपत्री’ निर्देशन गर्ने भएका छन् । ‘हाम्रो सयपत्रीले घरको, आँगनको र मायाको कथा भन्नेछ’ बुधबार आयोजित प्रेसमिटमा निर्देशकले फिल्मबारे छोटकरीमा भने ।

फ्लाओरिङ फिल्मस्को प्रस्तुतीमा रोमन क्राफ्ट इन्टरटेनमेन्ट र इथ्री इन्टरटेनमेन्टको संयुक्त लगानी रहने फिल्म ‘सयपत्री’ मा सुरजसिंह ठकुरी, संदिप क्षेत्री र आकांक्षा कार्कीलाई मुख्य भूमिकामा तय गरिएको छ । आकांक्षा फिल्म क्षेत्रको लागि नयाँ कलाकार हुन् । थिएटरमा ब्याचलर गरेकी आकांक्षा पेशाले भने साइकोलोजिस्ट हुन् । उनले काउन्सिलिङ साइकोलोजीमा मास्टर्स समेत गरेकी छन् । रातो बङ्गला स्कूल पढ्दा एन्टेना फाउन्डेशन नेपालले उत्पादन गर्ने बाल कार्यक्रम ‘सुनौं बोलौं’ का लागि काठमाण्डूबाट बाल पत्रकार भएर काम गरेकी आकांक्षाले फिल्ममा अभिनय गर्न आफु निकै नै उत्साहित रहेका बताइन् । उनले भनिन्, ‘म नाटक प्रेमी हुँ तर जब मलाई निर्देशकले कथा सुनाउनु भयो, मलाई लाग्यो यो फिल्म मैंले नै खेल्नु पर्छ ।’ आफ्नो पारिवारिक पृष्ठभूमि आर्मीको रहेका कारण पनि आफु ‘सयपत्री’ खेल्न राजी भएको आकांक्षाले खुलाइन् । ‘सयपत्री’ आर्मी जवानको कथासँग सम्बन्धित छ ।

यता भिजे तथा एक्टर सुरजसिंह ठकुरीले भने आफ्नो आर्मी बन्ने सपना रिल लाइफा भएपनि पूरा हुन पाएकोमा खुसी व्यक्त गरे । उनले भने, ‘आर्मीको युनिफर्म लगाउने मेरो जीवनको सबैभन्दा ठुलो सपना थियो । आर्मीको भूमिका पाउँनु र नक्कली भएपनि फूली लाउन पाउनु मेरो लागि पर्याप्त भयो ।’ यस्तै प्रमुख प्रधानसेनापति राजेन्द्र क्षेत्रीले ‘सयपत्री’ लाई सफलताको शुभकामना दिए । उनले निर्देशक भूपालले निर्देशन गरेको पहिलो फिल्म ‘माला’ आफुलाई अत्यन्तै मन परेको समेत बताए । 

निर्देशक भूपाल स्वयमको पटकथा एंव संवाद रहेको फिल्म ‘सयपत्री’ लाई राजेश श्रेष्ठले खिच्नेछन् । जसले पछिल्लो समयका हिट फिल्महरु ‘प्रेम गीत’ र ‘क्लासिक’ बाट सिनेम्याटोग्राफीको तारिफ पाइरहेका छन् । फिल्ममा संगीत भने चेतन सापकोटाको रहनेछ । फिल्मको छायाँकन यो चैत महिनाको अन्त्यतिर सुरुवात हुनेछ ।