अभिनेत्री नम्रता श्रेष्ठ अभिनित फिल्म ‘ताण्डव’ भदौ ६ गतेदेखि देशभर प्रदर्शन भैरहेको छ । बेलायती निर्देशक मुर्रे केर निर्देशित यो फिल्ममा नम्रताले र्यापर आशिष राना ‘लाउरे’ सँग जोडी जमाएकी छिन् । मोहन डोटेल निर्मित फिल्म ‘ताण्डव’ ग्याङस्टारमा आधारित छ । फिल्म ‘सानो संसार’ बाट नेपाली फिल्मको अभिनय यात्रामा प्रवेश गरेकी नम्रतालाई फिल्म ‘मेरो एउटा साथी छ’ ले युवा दर्शकमाझ लोकप्रिय बनायो । 

नम्रता अभिनित ‘मिस यू’, ‘छड्के’, ‘मौन’, ‘मेघा’ र ‘नोभेम्वर रेन’ प्रदर्शनमा आइसकेका छन् । नम्रता अभिनित अर्को फिल्म ‘सम्बोधन’ को प्रदर्शन मिति भदौ ६ बाट पोस्टपोन्ड भएको छ । ‘ताण्डव’ रिलिजको अवसर पारेर अभिनेत्री नम्रतासँग न्यूजपेजथ्रीडटकमले लामो अन्र्तवार्ता लिएका छ । 

एउटा सच्चा कलाकार हुँ । फरक टिम र फरक विषय भएको फिल्ममा अभिनय गर्न रुचाउँछु । सँगै म समामाजिक र व्यावसायिक पक्षसँग घुलमिल हुन रुचाउँछु । एउटा केटी, जो हरेक दिन केही सिक्न खोजिरहेको छ । म रेष्टुरेन्ट व्यावसायी पनि हुँ । मैंले आफुलाई खुला राखेको छु । यही गर्छु भनेर बस्दिनं । म स्वतन्त्र छु । मेरो विचार पनि स्वतन्त्र नै छ । 

अहिले सम्मको जिवनले के पाठ सिकायो जस्तो लाग्छ ? 

हरेक दिन केही न केही सिकीरहेको हुन्छ । हिजो भन्दा आज फरक  हुन्छ । अस्ति भन्दा हिजो फरक हुन्छ । यदि बाँच्न जान्यो भने जिन्दगी साँच्चिकै सुन्दर छ । अर्को मैंले सिकेको कुरा के हो भने यदि भित्रि संसार ठिक हुन्छ भने बाहिरी संसार आफैं ठिक हुन्छ  र अर्को महत्वपूर्ण कुरा भनेको जिन्दगी आफ्नो हातमा छ । आफुलाई कसरी बाँच्न मन छ, जिन्दगी आफुले जस्तो बनायो त्यस्तै हुन्छ । सबैसँग खुसी भएर सकारात्मक व्यावहार गरेर अगाडी बढ्यो भने जिन्दगी आफैं सुखी हुन्छ । 

तपाइको जिवनमा कसले सबैभन्दा बढी महत्व राख्छ ?

मेरो लागि सबैभन्दा बढी महत्व मेरो परिवारले राख्छ । तरपनि मेरो जिन्दगी मेरै लागि महत्वपूर्ण छ । सुरुमा म एफ.एम.मा काम गर्थें । त्यहाँ म तीन चोटी अडिसन दिएर सेलेक्ट भएर गएको थिएँ ।  फिल्म क्षेत्रमा आउँदा पनि म अडिसन दिएरै आएको हो । ‘सानो संसार’ मा तीन पटक अडिसन दिएको थिए । यसलाई राख्दिउँ न त भनेर म कुनै पनि क्षेत्रमा आएको छैन । त्यसैले मेरो लागि म नै महत्वपूर्ण छु । 

यो क्षमता कहाँबाट आयो ? 

परिवारले मलाई जहिल्यै पनि सकारात्मक परिवेशमा हुर्कायो । मेरो मम्मी र बुवाले मलाई जहिल्यै साथ दिनु भयो । फिल्म क्षेत्रमा आउँदा म कतिपय ठाउँमा दोधारमा थिएँ । एच.आइ.भी एड्सको बारेमा मैंले एउटा सर्ट फिल्ममा अभिनय गर्नु पर्ने थियो । त्यस्तो फिल्मको अफर आउँदा सुरुमा म हिच्कीचाएको थिएँ । किनकी मैंले त्यो सर्ट फिल्ममा ‘सेक्स ओर्कर’ को भूमिका गर्नु पर्ने थियो । के गर्ने भनेर मैंले बुवालाई सोधें । उहाँले भन्नु भयो, ‘तिमीलाई के भनेर चिनिन मन छ नम्रता श्रेष्ठ कि फिल्मको पात्र ? तिमीले हरेक फिल्मको पात्रलाई जिवन्तता दिनु सक्नु पर्छ । यसलाई नै कलाकारिता भन्छन् ।’ बुवाले भनको यो सिद्धान्तलाई म जहिल्यै फलो गर्छु । यसपछि कुनै पनि पात्रको अभिनय गर्न म हिच्कीचाइन ।  

अहिलेसम्म परिवारबाट भएको महत्वपूर्ण सहयोग कुन हो ? 

हरेक क्षणमै सहयोग हुन्छ । फिल्मको पहिलो अडिसन, रेष्टुरेन्ट खोल्दा होस् यो अन्य कुनै काममा उहाँहरुको सहयोग छ । परिवार नै मेरो लागि ‘क्रिटिक्स’ हो ।  

विगतको कुनै कालो दिनलाई सम्झनु हुन्छ ? 

म कालो दिनलाई कहिल्यै सम्झन्नं । ममा सकारात्मक सोचको विकास भैसक्यो । म वर्तमानमा खुसी छु । मेरो जिन्दगीलाई लिएर म खुसी छु । दुःखी बनाउने कुरा म दिमागमा ल्याउँदिन । मेरो विगत के भयो ? सम्झन आवश्यक ठान्दिनं । आजको दिनलाई कसरी राम्रो बनाउने भन्ने कुरा सोच्दछु । 

सबैभन्दा बढी माया कसलाई गर्नुहुन्छ ?

सबैभन्दा धेरै माया मेरो परिवारको लाग्छ । मलाई बच्चाहरु एकदमै मन पर्छ । फुर्सदमा म उनीहरुसँग बिताउँछु । म सोच्छु मेरो मन जहिल्यै मायाले भरिएको होस् ।

व्यक्तिलाई कसरी विश्लेषण गुर्न हुन्छ ? 

पहिला व्यक्तिको विश्लेषण गर्थें तर अहिले छोडिसकें । किनभने कसलाई के को आधारमा विश्लेषण गर्ने ? भन्ने कुरा मनन गरेपछि मैंले कुनै व्यक्तिलाई विश्लेषण गर्दिनं । म बाट पनि गल्ती हुन सक्छ । बिग्रेको घडिले पनि दिनको दुई घण्टा सही समय दिन्छ भने हामी मान्छे हौं गल्ती नहुने कुरै छैन । त्यसैले अरुको के राम्रो के नराम्रो भनेर विश्लेषण गर्नु ठिक हो जस्तो मलाई लाग्दैन । म आफैं पनि आफ्नो विश्लेषण गर्दिनं । 

वर्तमान अवस्थाबाट कत्तिको सन्तुष्टि हुनुहुन्छ ? 

म एकदमै सन्तुष्टि छु । फिल्म राम्रो पाइरहेको छु । मिडियाको सपोर्ट छ । एउटा कलाकारले त्यो भन्दा बढी के खोज्ने ? परिवार मसँग छ । साथीभाई छ । सन्तुष्टिको लागि यो भन्दा अरु के नै चाहिन्छ र ? 

फिल्मले गर्ने हिट र फ्लपको व्यापारले तपाइलाई कत्तिको असर गर्छ ? 

म सधैं राम्रो गर्न खोज्छु । पुरै फिल्म नै राम्रो होस् भन्ने मेरो चाहना हुन्छ । तर समय, सन्दर्भ र राजनीतिले गर्दा राम्रो फिल्म पनि फ्लप भैदिन्छ । त्यसैले मलाई फिल्मको हिट र फ्लपको व्यापारले कुनै असर गर्दैन् । 

जिवनमा पाएको सबैभन्दा ठुलो खुसी ? 

हरेक पल नै म खुसी हुन्छ । पहिलो फिल्मे ‘सानो संसार’ को प्रिमियरमा म धेरै खुसी भएको  थिएँ । 

दुःखको पल ? 

दुःखको पल धेरै छन तर म सम्झन चाहान्नं । दुःखलाई सम्झिएर किन समयलाई बर्बाद गर्ने ? 

अफयेरको बारेमा बताइदिनुस् न । 

अहिले म सिङगल छु । कोहीसँग पनि डेट गरिहरहेको छैन । भविष्यमा हुन सक्ला त्यो आफ्नो ठाउँमा छ । आफुलाई सहज नलागेसम्म रिलेसनसिपमा बस्नु राम्रो हो जस्तो लाग्दैन । तर म रिलेसनसिपको विरुद्धमा गएको भने होइन । 

विगतको रिलेसनसिपालई कसरी लिनुहुन्छ ? 

विगतको रिलेसनसिपबाट धेरै कुरा सिकेको छु । मेरो लाइफमा जति रिलेसनसिपमा रहे उहाँहरुप्रति आभारी छु । उहाँहरुले मलाई धेरै कुरा सिकाएर जानु भएको छ । 

प्रेमको सम्बन्ध किन दिगो हुन सकेन ? 

सायद परिस्थितिसँग ट्याकल गर्न नजान्दा सम्बन्ध दिगो हुँदैन । हरेक कुराको निश्चित परीधि हुन्छ । त्यसमा हामीले ट्याकल गर्न सक्नु पर्छ । परिस्थितिलाई ‘ह्याण्डल’ गर्न नजान्दा हातबाट बाहिर जान्छ ।  हाँस्दै...मेरो हकमा अब भने राम्रो हुन्छ होला । लभ रिलेसनलाई हेर्ने मेरो दृष्टिकोणमा परिवर्तन आएको छ । 

अब तपाइको जिवनमा आउने व्यक्ति कस्तो हुनुपर्छ ? 

मैंले भनिसकें कोहीको पनि म जज् गर्दिन । मलाई मनदेखि यो व्यक्ति मेरो लागि फिट हुन्छ जस्तो लाग्यो भने डेट हुन सक्छ । तर, हाइट यति र यस्तो कास्टको व्यक्ति होस् भन्ने मेरो चाहना छैन । मलाई लाग्थ्यो लभ रिलेसनमा माया, सर्पोट र विश्वसा होस् । तर अहिले चाहिं मनले हुन्छ भनेपछि हुन्छ । 

बिहे कहिले गर्ने ? 

बिहेको सोच बनाएको छैन । अहिले म ‘करिअर फोकस’ हुन चाहान्छु । पहिला चाहिं म आफ्नो जिन्दगीप्रती ‘कम्प्लेन’ मात्रै गर्थे । तर अहिले जिन्दगी आफैले बनाउने हो जस्तो लाग्छ । जस्तै पहिला म फिल्म अवार्डमा जान्नथें अहिले जान्छु । 

‘ताण्डव’ मा तपाइको भूमिका बारे बताइदिनुस् न ?

नेपालको बोर्डरमा महिला वेश्यको भूमिका ‘ताण्डव’ मा निभाएको छु । बाँकी थाहा पाउन हलमै गएर फिल्म हेर्नु पर्ने हुन्छ । यो फिल्मलाई लिएर म एकदमै उत्साहित छु । ‘ताण्डव’ पूर्ण रुपमा मनोरञ्जनले भरिएको छ । हामी कलाकार र नेपाली फिल्मलाई माया गरिदिनूस् ।