अभिनेता श्रीकृष्ण श्रेष्ठले बोलेका संवाद अनि पर्दामा गरेको अभिनय अब इतिहास बनेका छ इमेज टेलिभिजनबाट प्रसारण हुने ‘ब्ल्याक एण्ड ह्वाइट’ कार्यक्रममा प्रस्तोताको रुपमा प्रस्तुत भएका कलाकार विजय लामासँग स्व.श्रीकृष्णले प्रेम, जिवन, प्रदर्शनरत फिल्म ‘कोहिनूर’को बारेमा बोलेका छन् । उक्त कार्यक्रममा विजय लामासँग श्वेता र स्व.श्रीकृष्णले गरेको कुराकानीलाई हामीले यहाँ शब्द शैलीमा प्रस्तुत गरेका छौं ।

विजय : तपाइहरु दुई जनाको भेट बारे बताउनुस् न ।   

श्रीकृष्ण : हाम्रो भेटघाट भएको लगभग ६ वर्ष जति भयो । ‘कहाँ भेटिएला’ मा हाम्रो भेट भएको थियो । त्यसपछि हामी राम्रो साथी बन्यौं । ‘कोहिनूर’ मा हामी राम्रो कोहनिूर जोडी भएर जिवनसाथीमा परिवर्तन भएका छौं । 

विजय : पहिलो भेटमा श्रीजीले तपाइँलाई के भन्नु भएको थियो ? 

श्वेता : विजय नकर्मी भन्ने सर हुनुहुन्छ । उहाँले मेरो साथी श्रीले फिल्म बनाउँदैछ तिमी जसरी पनि उसँग भेट भन्नुभयो । भेटमा मैंले भनें ‘फिल्म खेल्दिन, मलाई घरबाट फिल्म खेल्न स्विकृती छैन’ तरपनि उहाँले एकचोटी भेट भन्नु भयो । श्री भनेको कोही निर्माता होला भन्ने मैंले सोचेको थिएँ । उहाँलाई भेट्दा त म आश्चर्यमा परें । सरले श्री मात्रै भन्नु भएको थियो, कृष्ण भन्नु भएको थिएन । हिरो श्रीकृष्णसँग भेट्दा त म अचम्ममा परें । मैंले भने, ‘तपाइहरुको बिग बजेटको फिल्म होला । एउटा एक्टरले फिल्म बनाउँदै हुनुहुन्छ । म त केही पनि गर्न सक्तिनं । भोली मैंले काम गर्न सकिनं भने के गर्ने ? मलाई केही पनि आउँदैन ।’ पहिलो भेटमा मैंले यही कुरा गरेको थिएँ । मेरो कुराले उहाँहरु एकदमै ‘इम्पे्रस्ड’ हुनुभएछ । उहाँहरुले खोजेजस्तो ‘सिम्पल’ क्यारेक्टर ममा पाउनु भएछ ।

श्रीकृष्ण : ‘कहाँ भेटिएला’ को लागि हामीले खोजेको सिम्पल केटी, कथामा चाहिने एउटा मुना भन्ने पात्र हामीले पायौं । पछि थाहा पाएँ उहाँ विज्नेस चलाउनु हुँदो रहेछ । उहाँको त्यो प्रकारको क्षमता थाहा पाएपछि हामीलेसँगै मिलेर व्यापार गर्न थाल्यौं । भगवानको कृपा र तपाइँहरुको सहयोगले व्यापार राम्रो हुँदै गयो । साउनको २३ गते ‘कोहिनूर’ फिल्म प्रदर्शन हुँदैछ । यो अवधीमा घरबाट ‘कि त हामीले छानेको केटी बिहे गर् या त आफुले छानेको केटी बिहे गर्’ भनेर दबाब आउन थाल्यो । त्यसपछि अफिसमा हामीले सल्लाह गर्यौं, ‘तिमीले पनि एकदिन बिहे त गर्नैपर्छ, मैंले पनि बिहे गर्नैपर्छ । के छ त विचार ?’ भन्दा दुई जनाको सहमती भयो अनि बिहेलाई ‘ओके’ गर्यौं ।

विजय : त्यती सजिलो भयो ? 

श्वेता : हो त, त्यति सजिलो भयो । 

श्रीकृष्ण : सजिलो कसरी भयो भने उहाँ मेरो पहिल्यैदेखि ‘बिग फ्यान’ हुनुहुँदो रहेछ । 

श्वेता : म त उहाँको एकदमै फ्यान हुँ । उहाँको फिल्म धेरै नै गर्ने गर्थें । सुरुमा शिव रेग्मी निर्देशक सापले अन्र्तवार्ता लिंदा पनि मैंले उहाँ र शिव सरको धेरै फिल्म हेरेको भनेको थिएँ । हेरेको फिल्मको सबै क्यारेक्टर थाहा छ । 

विजय : सुन्दरी श्वेतालाई चलचित्रमा अरु नायकसँग अभिनय गर्न दिने कि नदिने ? 

श्रीकृष्ण : त्यो मेरो हातमा छैन । किन छैन भने, काम उहाँको हो । सिप उहाँको हो । यदि कुनै राम्रो चलचित्र खेल्न उहाँलाई ईच्छा लाग्छ भने उहाँलाई कुनै पनि बन्देज हुने छैन । अहिले पनि छैन र पछि पनि हुँदैन । जुन काम उहाँले गरिरहनु भएको छ त्यो काम निरन्तर हुन्छ चाहे चलचित्र होस् या व्यवासाय । 

विजय : तपाइँ के भन्नुहुन्छ ? 

श्वेता : उहाँले त झन् मलाई फिल्म खेल्न उत्प्रेरित गरिरहनु भएको छ । राम्रो फिल्म खेल्न अफर पनि आएको थियो ।  म बढी व्यवसायमा आवद्ध छु । चलचित्र क्षेत्रबाट टाढा पनि जान सक्तिनं । किनभने मेरो वेस नै यही हो । तर पहिल्यैदेखि आफ्नो अनुभवको आधारमा विज्नेस गरिरहेको छु । विज्नेस अहिले एकदमै सफल भइरहेको छ । सबै जनाले विश्वास गरिरहनु भएको छ । मेरो इन्जिनियरीङ कम्पनी छ । यसले ठूलो ठूलो भवनको एक्सटेरियर कन्सट्रक्सन र फिनिसिङको काम गर्छ । यसमा हाम्रो संयुक्त लगानी छ । साथमा हामीले होटल ईन्द्रणी हिमालय पनि सञ्चालनमा ल्याएका छौं ।

विजय : दुई जना मिलेर कस्तो फिल्म दिने रहर छ ? 

‘कहाँ भेटिएला’ बाट श्वेता जीले जुन प्रकारको सन्देश दिनु भयो । ‘कोहिनूर’ बाट पनि दर्शकलाई त्यस्तै सन्देश दिन खोजेको छौं । ‘कोहिनूर’ भित्र दर्शकले श्रीकृष्ण श्रेष्ठ र श्वेता खड्का पाउनु हुने छैन । सन्देश दिने पात्र मात्रै फिल्ममा पाउनु हुन्छ । म नारीलाई बहुत इज्जत गर्छु । हामीले नारी प्रधान फिल्म बनाएका छौं । श्वेताजीको क्यारेक्टरले नारीलाई समस्या पर्दा संघर्ष गर्ने सन्देश दिएको छ ।

विजय : बिहे चाँडै हुँदैछ के भन्नु हुन्छ ?

श्रीकृष्ण : म भगवान, मिडियाकर्मी र दशर्क सबैलाई धन्यवाद दिन्छु । ‘कहाँ भेटिएला’ रिलिजको ताको हामी प्रत्येक हल हलमा जान्थ्यौं । ‘कहाँ भेटिएला’ को अन्तिममा हाम्रो विवाहको दृश्य छ । हलमा गुञ्जिन्थ्यो, ‘साँच्चिकै यो जोडीको बिहे भैदिए हुन्थ्यो’ त्यतिबेला हामी एक अर्कालाई हेरेर हाँस्थ्यौं । मिडियाको साथीहरुले पनि हाम्रो बिहे हुन लागेको हो ? भनेर प्रश्न गर्नु हुन्थ्यो । मैंले ‘होइन’ नै भन्थें । हामीलाई बिहेको स्थानसम्म पुर्याउनुे लमी मिडियाकर्मी नै हुनुहुन्छ । जे छ भगवानको हातमा छ । आजको दिनसम्म जतिपनि मलाई आशिवार्द दिनु भएको छ । अबको दिनमा झन् बढी मात्रामा आर्शिवाद चाहिन्छ । हामी अहिलेसम्म पनि संयुक्त परिवारमा छौं । आश छ, श्वेता जी भित्रिएपछि मेरो परिवारको नेचरमा उहाँ पनि आउनु हुन्छ । म दर्शकलाई प्रश्न गर्छु के म तिम्रो होइन र ? मेरो लागि ‘कोहिनूर’ भनेको दर्शक नै हुन् । तपाइहरु हुनुहुन्छ हामी छौं । एउटा बच्चा आमाको न्यानो काखमा सुत्दा जति आनन्द आउँछ । त्यती नै आनन्द तपाइहरुको न्यानो काखमा सुत्दा आउँछ । तपाइँहरुको न्यानो काखमा सुत्न पाउँ ।