अभिनेत्री करिश्मा मानन्धरले संयम पुरीको मुख्य भूमिका रहेको फिल्म ‘लभ सब्’ लाई ‘क्यूट’ भनी मिठो प्रतिक्रिया दिएकी छन् । मंगलबार सिभिल मलको सवा ४ बजेको नियमित शोमा संयमको ‘लभ सब्’ हेरेपछि करिश्माले भनिन्, ‘फिल्म संयम जस्तै क्यूट रैछ । संयमको क्यारेक्टरले मलाई हँसायो पनि रुवायो पनि ।’ संयमको विशेष निमन्त्रणामा करिश्मा सिभिल मलमा फिल्म हेर्न पुगेकी थिइन् । 

करिश्मा सँगै हाँस्य व्याङ्ग्य कलाकारद्धय विल्सन विक्रम राई, केदार घिमिरे, नायिका छुल्ठिम गुरुङ, संगीतकार चेतन सापकोटा, कोरियोग्राफर गोविन्द राई अनि सहपाठी नायकद्धय गौरव पहारी र आभाष अधिकारीलाई फिल्म हेर्न संयमले निमन्त्रणा दिएका थिए । उनीहरुले फिल्म सामान्य कथामा रमाइलो बनेको र संयमको अभिनय उत्कृष्ट रहेको प्रतिक्रिया दिए । अग्रज र सहपाठी फिल्मकर्मीको यस प्रकारको प्रतिक्रियाले आफुलाई निकै नै खुसी मिलेको फुच्चे हिरोले बताए । उनले भने, ‘यस प्रकारको हौसला र माया बाट म निकै नै खुसी छु । भोलिका दिनमा अझै राम्रो गर्ने प्रयास गर्नेछु ।’ पर्दामा संयम बोल्न र सुन्न नसक्ने भूमिकामा प्रस्तुत भएका छन्, जुन भूमिकालाई उनले न्याय दिएका छन् । 

निकटतम अग्रज र सहकर्मी फिल्मकर्मीलाई संयमको ‘लभ सब्’ देखाउने चाँजोपाँजो भने कलाकार अनुरागमान सिंह कुँवरले गरेका थिए, जो संयमको निकै निकट छन् । गएको शुक्रबार देखि प्रदर्शनमा आएको फिल्म ‘लभ सब्’ लगानी रिकभरको दौडमा छ । देवकुमार श्रेष्ठ निर्देशित फिल्ममा संयम सँगै सलोन बस्नेत, करिश्मा श्रेष्ठ र शिशिर भण्डारीको मुख्य भूमिका रहेको छ । फिल्मलाई सुशिल पौडेल र नरेन्द्र महर्जनले संयुक्त रुपमा निर्माण गरेका हुन् । सुखद् सुरुवाती व्यापार गर्न सफल ‘लभ सब्’ लाई हरितालिका तीजमा दर्शकको उल्लेख्य साथ मिल्ने अपेक्षा गरिएको छ ।