दिपकराज गिरी, दीपाश्री निरौला र निर्मल शर्माले निर्माण गरेको फिल्म ‘वडा नं ६’ असोज १ गते, शुक्रबार देखि देशभरका फिल्म हलहरुबाट प्रदर्शनमा आउँदैछ । उज्वल घिमिरे निर्देशित यो फिल्ममा टेलिभिजनका चर्चित हाँस्य व्याङ्ग्य कलाकारहरु दिपकराज गिरी, जितु नेपाल, केदार घिमिरे, सिताराम कट्टेलको मुख्य अभिनय रहेको छ । टेलिभिजनका हाँस्य व्याङ्ग्य कलाकारहरु अभिनित पहिलो फिल्म ‘६ एकान ६’ लाई साथ दिइसकेका दर्शकले दोश्रो फिल्म ‘वडा नं ६’ लाई पनि साथ दिने फिल्म विश्लेषकको विश्वास छ । फिल्म ‘वडा नं ६’ व्यापारिक रुपमा चल्न सक्ने ६ आधारहरुलाई न्युजपेजथ्री डटकमले प्रस्तुत गरेको छ ।

१.प्रचार रणनीति : निर्माण पक्षले फिल्मको प्रचार प्रसार गर्न कुनै कसर बाँकी राखेको छैन । एकेडेमीमा सम्पन्न भएको गाईजात्रा महोत्सव देखि राजधानीका मुख्य चोक चोकमा कलाकारहरु पुगेर फिल्म ‘वडा नं ६’ को प्रचार प्रसार गरिरहेका छन् । कमेडी कलाकारको कार्यक्रम हेर्न शहरका चोकमा सर्वसाधरणको ठूलै भिड लागिरहेको छ । चोकमा देखिएको भिड हलको टिकट काउन्टरसम्म लाग्ने अपेक्षा गर्न सकिन्छ । 

२.आकर्षक प्रोमो तथा पोस्टर : ‘वडा नं ६’ को प्रोमो तथा पोस्टरले पनि यतिबेला दर्शकको ध्यान खिचिरहेको छ । फिल्मका मुख्य ६ जना पात्रहरुलाई पोस्टरमा विभिन्न तवरले प्रस्तुत गरिएको छ जुन निकै रमाइलो देखिन्छ । यस्तै सार्वजनिक प्रोमोले नै एक प्रकारको मनोरञ्जन दिन्छ । हालसम्म फिल्मको प्रोमोलाई २ लाख बढीले युट्युवमा भिजिट गरिसकेका छन् । प्रोमो हेर्नुस् :

३.दिपाको सुर्के थैली : प्रोमो तथा पोस्टरसँगै ‘वडा नं ६’ मा समावेश ‘सुर्के थैली खै’ बोलको गीतलाई दर्शक तथा श्रोताले निकै रुचाएका छन् । फिल्मको प्रचार प्रसारमा पनि निर्माण पक्षले यही गीतलाई प्राथमिकता दिएको छ । निर्मात्री दिपाश्री निरौला समेत फिचरिङ ‘सुर्के थैली’ लाई युट्युवमा झण्डै साढे तीन लाखले भिजिट गरिसकेका छन् । गीत हेर्नुस् :

४.व्यवस्थित वितरण अनि सोलो रिलिजः व्यापाक प्रचार प्रसार र आकर्षक प्रोमो तथा प्रोस्टरले मात्रै फिल्म व्यापारिक रुपमा सफल हुन्छ भन्ने पक्का छैन् । यी दुई कुरामा अब्बल देखिएका फिल्महरु फितलो वितरण प्रणालीका कारण चिप्लिएका उदाहरणहरु फिल्म क्षेत्रमा प्रशस्तै छन् । तर, यो मामलामा फिल्म ‘वडा नं ६’ बलियो देखिएको छ । यो फिल्मलाई मोफसलमा एफडी कम्पनी जो फिल्मको व्यवस्थित वितरणमा अगाडी देखिएको छ, यसैले वितरणको जिम्मा लिएको छ । काठमाण्डूमा वितरक गोपाल कायस्थले वितरणको जिम्मा लिएका छन्, जसलाई ‘लक्की’ वितरक मानिन्छ । असोज १ मा एक मात्र नेपाली फिल्म ‘वडा नं ६’ रिलिज हुँदैछ । जसले स्वतः प्रशस्त हल संख्या पाउनेछ ।

५.चल्तिका दया र प्रियंकाको जोडी : नायक दयाहाङ राई र नायिका प्रियंका कार्की वर्तमान नेपाली फिल्मका चल्तीका पात्रहरु हुन् । हिट फिल्म ‘झोले’ जोडीको अभिनयले ‘वडा नं ६’ लाई पक्कै पनि फाइदा पुर्याउनेछ । ‘कबड्डी’ र ‘नाईं नभन्नू ल’ जस्ता ब्ल्कबस्टर फिल्ममा अभिनय गरेका दयाहाङ र प्रियंकाका फ्यानको लागि शुक्रबारे रिलिज यो फिल्म कोशेली बन्न सक्दछ । 

६.चलायमान बजार : कुनै पनि फिल्म व्यापारिक रुपमा सफल हुन फिल्म बजार कस्तो छ ? भन्ने कुरा महत्वपूर्ण हुन आउँछ । नेपाली फिल्म बजार यतिबेला चलायमान छ, ठप्प छैन । पछिल्लो केही महिनायता विशेषगरी नेपाली फिल्ममा दर्शकहरुको आकर्षण राम्रो देखिएको छ । भूकम्प पछि बन्दको स्थितिमा रहेका नेपाली फिल्म चल्ने हलहरुमा ‘होस्टेल रिटन्र्स्’, ‘भैरव’, ‘रेशम फिलिली’, ‘लभ् सब’ (सुरुवाता राम्रो) जस्ता फिल्महरुले आक्रमक एंव सुखद् व्यापार गरिरहेका छन् । त्यसैले फिल्म ‘वडा नं ६’ को पनि व्यापार आक्रमक या सुखद् नै हुने अपेक्षा गर्न सकिन्छ ।