भदौ ११ गते, शुक्रबार देखि नायक निखिल उप्रेती अभिनित, निर्देशित एंव निर्मित फिल्म ‘भैरव’ प्रदर्शनमा आएको छ । निखिलको यो फिल्म काठमाण्डू र मोफसल गरी करिब पचास हलबाट एकसाथ प्रदर्शनमा आएको हो । तराई केन्द्रित हलमा भने निर्माण पक्षले फिल्मलाई प्रदर्शनमा ल्याएको छैन । 

वितरक गोपाल कायस्थले दिएको जानकारी अनुसार राजधानीको बिहानी शोमा ‘भैरव’ ले हलमा हाउसफूल दर्शक तान्न सफल भएको छ । पाँच वर्ष पछि नेपाली रजतपट फिल्मको निर्माण एवं निर्देशनको समेत जिम्मेवारी सम्हाल्दै फर्किएका निखिलको फिल्मलाई प्रतिक्षित रुपमा हेरिएको छ । चलचित्र जाँस पास समितिबाट पिजी प्रमाण पत्र प्राप्त निखिलको फिल्म एक्सनले भरिपूर्ण भनिएको छ । एक्सन सँगै तराईमा हुने राजनीतिक खिचातानी, घुसखोरी र त्यसमा नेपाल पुलिसको भूमिका बारेको कथा फिल्ममा उठाइएको छ । निखिलको अपोजिटमा नायिका अनु शाह प्रस्तुत भएकी छन् । एक समयका एक्सन स्टारको फिल्मले रजतपटमा कस्तो व्यापार गर्ला भन्ने आँकलन फिल्म क्षेत्रमा भैरहेको छ ।

‘भैरव’ सँगै फिल्म ‘रेशम फिलिली’ पनि प्रदर्शनमा आएको छ । बैशाख १२ गते आएको भूकम्प पछि प्रदर्शन मितिलाई स्थगन गरिएको यो डार्क कमेडी फिल्मको दोश्रो प्रदर्शन हो । प्रवन जोशी निर्देशित यो फिल्ममा विनय श्रेष्ठ, कामेश्वर चौरसिया, मेनुका प्रधान लगायतको भूमिका रहेको छ । माधव वाग्ले निर्मित यो फिल्म पनि राजधानी तथा मोफसलमा एकसाथ प्रदर्शनमा आएको छ । पहिलो प्रदर्शनको पहिलो दिनमा रेकर्ड तोडको व्यापार गरेको ‘रेशम फिलिली’ ले पुर्न प्रदर्शनमा कस्तो व्यापार गर्ला ? प्रतिक्षा गरौं ।

त्यस्तै फिल्म ‘होस्टेल रिटन्र्स्’ ले दोश्रो हप्ताको प्रदर्शन यात्रा तय गरेको छ । निर्माता रावलले दोश्रो हप्तामा पनि आफ्नो फिल्म करिब पचास पर्दामा प्रदर्शन हुने जानकारी दिएका छन् । यो फिल्मले पहिलो हप्तामा करिब डेढ करोडको व्यापार गर्न सफल भएको छ ।