राजेश हमाल र शिव श्रेष्ठ आफ्नो जमानाका हिट हिरोहरु हुन् । राजेशको स्टाइल अनि शिवको एक्सनले एक समय नेपाली दर्शकलाई हलसम्म तान्थ्यो ।तर, अहिले यी दुई अभिनेता फिल्ममा उति सारो सक्रिय छैनन् । राजेश हमाल पर्दा भन्दा पर्दा बाहिर ज्यादा व्यस्त छन् । पछिल्लो समय यी दुईले फिल्म ‘बाग्मती’ मा एकसाथ अभिनय गरेका छन्, जसको तस्बिर सार्वजनिक गरिएको छ । सार्वजनिक तस्बिरमा राजेश र शिव मारपिटको अवस्थामा देखिन्छन् । फिल्ममा नायिका केकी अधिकारीको पनि महत्वपूर्ण भूमिका रहेको छ । 

सन्नी (केरला) को लेखन तथा निर्देशन रहेको फिल्म ‘बागमती’ मा राजेश, शिव र केकीसँगै कञ्चन ठकुरी, ध्रुब कोइराला लगायतका कलाकारहरुको अभिनय रहेको छ । भारतको केरला स्थित हरिश कुमार एमके र फिल्म निर्माण कम्पनी ट्री इन्टरटेन्टमेन्ट प्रा.लि बीच फिल्म भारतभर प्रचार प्रसार एवं प्रदर्शन गर्नका लागि लिखित सम्झौता समेत भएको छ । सम्झौतामा फिल्मका तर्फबाट कार्यकारी निर्माता अनिश नपित र वितरकको तर्फबाट हरिश कुमारले हस्ताक्षर गरेका हुन । बताइए अनुसार भारतमा फिल्मको ब्यापक प्रचार गरि रिलिज गरिनेछ । 

त्यस्तै फिल्मलाई भारतभर रिलिजका लागि विभिन्न भाषाहरुमा डबिङ पनि गरिने जनाइएको छ । भारतका विभिन्न प्रदेशमा प्रचलित मलायलम, तमिल, कन्नड, तेलुगु, ओलिया, बंगाली, भोजपुरी, हिन्दी, गुजराति, पञ्जाबी, मराठि, काश्मीर लगायत भाषामा फिल्म स्वरांकन हुनेछ । फिल्म ‘बागमती’ लाई ट्री इन्टरटेन्मेन्टको ब्यानरमा निर्माण गरिएको हो । फिल्मका निर्माता दिनेश दर्शनधारी र विजय सत्याल हुन् । यस फिल्ममा अधिकांश दक्षिण भारतिय प्राविधिक प्रयोग गरि छायांकन गरिएको छ ।