अभिनेत्री सुस्मिता बम्जनले फिल्म निर्माण गर्ने भएकी छन् । अनमोल क्रियशन ब्यानरमा बाट ‘म त तिम्रै हुँ’ निर्माण गर्न लागिएको अभिनेत्री बम्जनले न्यूजपेजथ्री डटकमलाई जानकारी दिइन् । नव निर्देशक श्रीराम महतले निर्देशन गर्न फिल्ममा छोरा अनमोल केसीको भने अभिनय नरहने उनले बताइन् । फोन संवादमा उनले भनिन्, ‘अनमोल निर्माताको रुपमा रहनेछ ।’

प्रि प्रोडक्सनको अन्तिम चरणमा रहेको फिल्म ‘म त तिम्रै हुँ’ मा सुस्मिताको पनि मुख्य भूमिका रहनेछ । साथमा प्रशान्त ताम्रकार र नव कलाकार जीवन भट्टराईले फिल्ममा महत्वपूर्ण भूमिका निर्वाह गर्नेछन् । फिल्मको कथा सुस्मिता स्वयम्को हो । कृष्ण आचार्यको पटकथा एवं संवाद रहेको फिल्म प्रेम अनि पारिवारीक कथावस्तुमा आधारित रहेने उनले खुलाइन् । झण्डै चार वर्षको अन्तराल पछि रजतपटमा पुनरागमन गर्न लागेकी सुस्मिताले भनिन्, ‘म एकदमै उत्साहित छु । राम्रो फिल्म बनाएर दर्शकलाई खुसी दिन्छु ।’ पछिल्लो पटक सुस्मिताले पुर्व पति (अभिनेता) भुवन केसीको फिल्म ‘साथी म तिम्रो’ मा कथा लेखेकी थिइन् । फिल्मको छायाँकन एवं पोष्ट प्रोडक्सनमा पनि उनले अभिनेता केसीलाई सघाएकी थिइन् ।

सञ्चार माध्यममा आए जस्तो पुर्व पतिलाई चुनौती दिन आफुले फिल्म निर्माण गर्न नलागेको समेत सुस्मिताले बताइन् । उनले भनिन्, ‘उहाँले आफ्नै काम गरिरहनु भएको छ । म आफ्नै काम गर्दैछु । अहिले साइत जुर्यो त्यसैले फिल्म बनाउन लागेको हुँ । उहाँलाई चुनौती दिन म आएको होइन ।’ आफ्नो फिल्ममा पुर्व पतिको कुनै भूमिका नरहने समेत सुस्मिताले स्पष्ट पारिन् । अनमोल लाई लिएर भुवनले भर्खरै ‘ड्रिम्स’ नामक फिल्मको छायाँकन सकाएका छन् । जसमा निर्देशन पनि उनकै छ ।

‘म त तिम्रै हुँ’ मा हर्क्यूलस बस्नेतले संगीत सृजना गरेका छन् । निर्मात्री बम्जनका अनुसार फिल्ममा पाँच वटा गीतहरु रहनेछन् । भदौको अन्तिम साता देखि फिल्मको छायाँकन सुरु हुनेछ । भारतको दिल्ली, सिलगुडी र नेपालको इलाम, पोखरा, काठमाण्डू लगायत क्षेत्रमा फिल्मको छायाँकन हुनेछ ।