दीपाश्री निरौला नेपाली हाँस्य व्याङ्ग्य क्षेत्रमा चिनाइ रहनु पर्ने नाम होइन । झण्डै दुई दशक देखि नेपाली हाँस्य व्याङ्ग्य क्षेमा क्रियाशील दीपाश्रीलाई दर्शकले पनि उत्तिकै चिन्दछन् । दीपाश्री अविवाहित छिन् । झण्डै एक दशक देखि हाँस्य व्याङग्य साप्ताहिक टेलिभिजन कार्यक्रम ‘तीतो सत्य’ मा दीपाश्री लाई दिपकराजको श्रीमतीको भूमिकमा देख्न पाइन्छ । यो पर्दाको दम्पती देश तथा विदेशका स्टेज कार्यक्रममा पनि सोही भूमिकमा प्रस्तुत हुन्छ । न्यूजपेजथ्री डटकमका उत्सब रसाईलीले साउनको व्रत लिइरहेकी दिपाश्री सँग कुराकानी गरेका छन्, जसलाई उनकै शैलीमा प्रस्तुत गरिएको छ । 

साउनको महत्व भनेको शिव भगवान् हो । शिव भगवान्को आरधाना, उहाँको पूजा गर्यो भने मनमा शान्ति, उत्साह, उमंग आउँछ । आफ्नो करिअरलाई राम्रो हुन्छ । सबै कुरा राम्रो हुन्छ । म जति वर्ष भएँ त्यति नै वर्ष देखि शिव भगवान्को पूजा गरिरहेको छु । मेरो वर्ष चाहिं आफैं हिसाब गर्नुस् । म जहिले पनि भेजिटेरियन (साहाकारी) हुँ । साउनको महिनामा म भेज नै खानुस् भनेर अनुरोध गर्दछु । साउनमा लगाउने हरियो, रातो र पंहेलो पहिरनले जिन्दगी रंगीन बनाउँछ जस्तो मलाई लाग्छ । भगवान् लाई पूजा गर्नु माया गर्नु भनेको उर्जा मिल्नु हो । उर्जा भनेको जिवनमा पाइरहनु पर्दछ । साउनको व्रत चाहिं पतीको लागि भनिन्छ । मेरो पति छैन म कसको लागि व्रत बस्छु ? भन्ने प्रश्नको उत्तर मैंले हरेक साउनमा दिनु पर्छ । मलाई पनि लाग्छ मेरो कुरा किन शिवजीले सुन्नु भएन ? यो प्रश्नको उत्तर किन अन्त्य गरिदिनु हुन्न ? शिब भगवान् लाई नै सोध्न चाहान्छु । सायद मेरो लागि कोही तयार नै भएका छैनन होला । मन पराउने त हजार भेटिन्छन् तर जुनी काट्ने एउटै हुन्छन् । अर्को कुरा सायद विवाह नभएको भए यति धेरै चर्चा हुँदैन्थ्यो कि ? त्यसैले शिवलाई धन्यवाद पनि दिन्छु । अब जिन्दगी भरी गुनासो नै गर्ने भन्ने त हुँदैन । लेखेको छ भने त पुग्छ, पुग्छ । सायद विवाह गरेको भए यो करिअर मैंले पाउँदिनथें कि ? 

वास्तवमा बिहे भनेकै वृद्ध भएपछि हो जस्तो मलाई लाग्छ । किनभने यतिखेर तामझाममा त कोही पनि चाहिंदैन । उमेर ढल्केपछि नै चाहिने हो कोही हेरचाह गर्ने मान्छे । अहिले त जे पनि आफ्नै तरिकाले गर्न सकिन्छ । पचास पछि चाहिं बिहे गर्दा राम्रो हुन्छ कि ? जहिले पनि काम गर्न सकिदैंन । असी वर्षको उमेरमा लठ्ठी टेक्दै कसले अभिनय गरोस् ? जिवनमा आराम भन्ने कुरा पनि त हुन्छ । मान्छे भएपछि सबै कुराको अनुभव लिनु पर्छ । म दश वर्ष पछि आराम लिन्छु ।

दिपक रिलमा मेरो श्रीमान हो । रियलमा होइन् । उसले किन बिहे गर्यो भन्नेमा मलाई पछुतो पनि छैन । मनको कुरा मिल्ने साथीसँग बिहे हुँदा ‘लाइफ’ राम्रो त हुन्थ्यो होला । तर त्यो चाहिं भगवान् लाई सोध्नु पर्छ । दिपकले बिहे गरेको हुँदैन्थ्यो भने बिहे हुन्थ्यो । यत्रो वर्ष सँग सँगै काम गरेपछि पक्कै पनि बिहे हुन्थ्यो ।  शब्द तथा तस्बिर : उत्सब रसाईली