उत्सव रसाईली, आउँदो भदौ ४ गते देखि फिल्म ‘होस्टेल रिटन्र्स’ प्रदर्शनमा आउँदैछ । दुर्गिश ब्यानरमा निर्माता सुनिल रावलले निर्माण गरेको यो फिल्मलाई सुरज भूषालले निर्देशन गरेका हुन् । ‘होस्टेल रिटन्र्स’ बैशाख १२ गते आएको भूकम्प पछि प्रदर्शनमा आउन लागेको पहिलो प्रतिक्षित नेपाली फिल्म हो । नव कलाकारको अभिनय रहेको युवा पुस्ता लक्षित फिल्मले भूकम्प पछि भड्किएका नेपाली फिल्मका दर्शकलाई हलसम्म आकर्षण गर्ने आँकलन गरिएको छ । इञ्जिनियर पढ्न होस्टेल बस्ने विद्यार्थीको कथा वस्तुमा आधारित फिल्म ‘होस्टेल रिटन्र्स’ व्यापारिक रुपमा सवल देखिने केही कारक तत्वलाई यहाँ प्रस्तुत गरिएको छ । 

गुडविल : कुन सामान कहाँ बाट उत्पादन भएको हो ? भन्ने कुरा महत्वपूर्ण हुन आउँछ । ‘होस्टेल रिटन्र्स’ को हकमा कुरा गर्नु पर्दा उत्पादन कम्पनी अर्थात् फिल्म निर्माण गर्ने कम्पनीको फिल्म बजार देखि दर्शकसम्म ख्याती ‘गुडविल’ राम्रो छ । दुर्गिश ब्यानरले निर्माण गरेका यसअघिका दुई फिल्महरु ‘सायद’ र ‘होस्टेल’ हिट भएका छन् ।  

हिट प्रिक्वेल : ‘होस्टेल रिटन्र्स’ लाई अर्को फाइदा भनेको यसको प्रिक्वेल हिट हुनु हो । युवा पुस्तामाझ ‘होस्टेल’ हिट भएको थियो । प्रिक्वेलका दर्शक मात्रै हलमा गएपनि ‘होस्टेल रिटन्र्स’ स्वतहः हिट हुनेछ ।     

प्रचार रणनीति : निर्माता सुनिल रावललाई आफ्नो सामान बजारमा कसरी बिकाउने राम्रो ज्ञान छ । यसअघिका दुई फिल्महरुलाई उनले कलेज क्याम्पियन गरेर युवा पुस्तालाई हलसम्म तानेका थिए, जुन रणनीति ‘होस्टेल रिटन्र्स’ मा पनि अपनाइएको छ । बोल्नेको पिठो बिक्ने शहरमा व्यापक प्रचार गरिएको ‘होस्टेल रिटन्र्स’ हेर्न दर्शक हल सम्म कसो नआउलान् ? 

आकर्षक प्रोमो : दर्शकलाई पूरा फिल्म हेर्न हलसम्म तान्नको लागि प्रोमो आकर्षण हुन आवश्यक छ । जुन आवश्यकतालाई ‘होस्टेल रिटन्र्स’ ले पूरा गरेको देखिन्छ । रमाइला संवाद अनि सुन्दर दृश्यले दर्शकलाई हलसम्म जान करै लगाउन फिल्मी बजारको विश्लेषण छ ।

फ्रेस फेस : ‘एउटै अनुहार’ कति हेर्नु भनेर नेपाली फिल्मलाई गाली गर्ने दर्शकका लागि ‘होस्टेल रिटन्र्स’ ताजा खाजा हो । जुन खाजा खाउँ खाउँ लाग्ने गरी प्रोमोमा सजाइएको छ । तर, खाजा कस्तो छ ? खाएपछि मात्रै थाहा हुनेछ ।

मल्टिप्लेक्समा चहलपहल : फिल्मका पण्डितले अनुमान गरेजस्तो भूकम्प पछि मल्टिप्लेक्समा शून्यता छाइरहेको अवस्था छैन । बलिउडका फिल्म हेर्न मल्टिप्लेक्समा दर्शकको भिड लागिरहंदा तीनै दर्शकलाई लक्षित गरी निर्माण गरिएको फिल्म ‘होस्टेल रिटन्र्स’ हेर्न पनि दर्शकको भिड नफर्केला भन्न सकिन्न । त्यसकारण मल्टिप्लेक्समा यो प्रतिक्षित फिल्मलाई उलेख्य दर्शकको साथ मिल्छ भन्ने अनुमान लगाउन सकिन्छ ।

सुशिलको सिक्स प्याक : फिल्म ‘होस्टेल’ रिलिज ताका अनमोल केसीको ‘लुक्स’ को चर्चा व्यापक भएको थियो । भुवन केसी पुत्र प्रति मरिहत्ते गर्ने युवा पुस्ता माझ यतिबेला भने ‘होस्टेल रिटन्र्स’ का नव नायक सुशिल श्रेष्ठको सिक्स प्याकको चर्चा गाईंगुईं सुनिन थालेको छ ।  तर, सुशिलको सिक्स प्याकले युवा पिडीलाई हलसम्म तान्ने नतान्ने बारे भने ? भदौ ४ सम्म नै प्रतिक्षा गर्न पर्ला । click below link for Trailer :