चर्चित बाल कलाकार अनुभव रेग्मीको आज जन्मदिन हो । वि.स २०६४ साल असार १८ गते राजधानीको एक अस्पतालमा जन्मिएका अनुभव आजबाट ८ पार गरेर ९ वर्षमा प्रवेश गरेका छन् । अनुभवकी माता कविता रेग्मी र पिता अरुण रेग्मी पनि नेपाली फिल्म क्षेत्रसँग आवद्ध छन् । 

नेपाली फिल्म ‘भिसा गर्ल’ बाट अभिनय यात्रा सुरु गरेका अनुभव रेग्मी वर्तमान नेपाली फिल्म क्षेत्रका चर्चित बाल कलाकार हुन् । अनुभवलाई रुचाउनेमा बालक देखि बृद्ध सम्मका नेपाली दर्शक छन् । अनुभव अभिनित ‘रिदम’, ‘काली’, ‘नाईं नभन्नू ल २’ र ‘नाईं नभन्नू ल ३’ सुपरहिट फिल्महरु हुन् ।

जसमध्ये , ‘नाईं नभन्नू ल २’ र ‘नाईं नभन्नू ल ३’ मा अनुभवको शिर्ष भूमिका छ । ‘नाईं नभन्नू ल ४’ मा पनि अनुभव मुख्य भूमिकामा अनुबन्धित भैसकेका छन् । उक्त फिल्मको लागि उनी यतिबेला नृत्यको प्रशिक्षणमा छन् । जन्मदिनको अवसर पारेर नेपाली फिल्मका चर्चित बाल कलाकारका ७ वटा रहस्य लाई न्यूजपेजथ्री डटकमले यहाँ प्रस्तुत गरेको छ । 

१. बलिउड स्टार सलमान खानको फिल्म ‘दबंग’ हेरेपछि अनुभव रेग्मी अभिनय तर्फ आकर्षित भएका हुन् । अनुभव आफ्नो ‘आइडियल पर्सन’ सलमान खानलाई मान्छन् । ‘दबंग’ नहेर्दा अनुभव नेपाली फिल्म ‘आचार्य’ को सुटिङ सेटमा पुगेर अभिनय नै नगरी फर्किएका थिए । 

२.निर्देशक विकास आचार्यले ‘रियो पुन्टे’ को विज्ञापनमा अनुभवलाई देखेर फिल्म ‘नाईं नभन्नू ल २’ मा अभिनयको लागि प्रस्ताव राखेका थिए । पहिलो पटक लिड रोलमा अभिनय गरेको फिल्म नै सुपरहिट भएपछि अनुभव एकाएक सेलिव्रेटी बन्न सफल भए । 

३.अभिनय सँगै अनुभव पढाईमा पनि अब्बल छन् । राजधानीको एक बोर्डिङ स्कूलमा कक्षा ३ मा अध्ययनरत अनुभव हालसम्म कक्षामा पहिलो या दोश्रो हुँदै आइरहेका छन् । 

४.अनुभव अब खेलाडी पनि बन्दै छन् । केही साता देखि उनी तेक्वन्दो सिक्नमा अभ्यस्त छन् । पढाई र अभिनय सँगै अनुभवको रुची खेलकुदमा पनि छ ।  

५.अनुभव लाई आइसक्रिम र बर्गर अत्याधिक मन पर्छ  । उनलाई मन नपर्ने परिकार खासै छैनन् । 

६.नायिका प्रियंका कार्की अनुभवकी मिल्ने साथी हुन् । प्रियंकालाई उनी लुकीलुकी फोन  गर्छन् । ‘नाईं नभन्नू ल २’, ‘नाईं नभन्नू ल ३’ र ‘आवरण’ मा प्रियंका र अनुभवले एकसाथ काम गरेका छन् । ‘नाईं नभन्नू ल ४’ मा पनि उनीहरु सँगै देखिदै छन् ।  

७.रेखा फिल्मस् बाट निर्माण हुने ‘राम प्यारी’ पछिको नयाँ फिल्ममा अनुभव खेल्दैछन् । जहाँ उनी नायिका रेखा थापाको ब्योयफ्रेन्डको भूमिकामा प्रस्तुत हुनेछन् ।