चलचित्र निर्माता संघ र चलचित्र संघका सदस्य सम्मिलित कार्यदलका ६ सदस्यहरु मध्ये ३ सदस्यले आईतबार उक्त दलबाट राजीनामा दिएका छन् । चलचित्र संघका अध्यक्ष नकिम उद्धिनले पछिल्लो समय निर्माताका लागि ल्याइएको सहुलियत प्याकेजका लागि असहयोग गरेको भन्दै संघका महासचिव मधुसुदन प्रधान, उप महासचिव देवेन्द्र खड्की र उपत्यका सभापति गोपाल कायस्थले आईतबार कार्यदलबाट राजीनामा दिएका हुन् । 

राजीनामा दिने उपत्यका सभापति गोपाल कायस्थले अध्यक्ष उद्धिनको असहयोग प्रति असन्तष्टि व्यक्त गर्दै भने, ‘उहाँको हलमा चार वटै शो भरिभराउ छन् । अरु २ सय ४० वटा हल खालि छन् । आफु चाहिं मासु भात खाएर अरुलाई भोकै राख्न मिल्छ ?’ अध्यक्ष उद्धिनद्वारा सञ्चालित क्यूएफएक्स अन्र्तगतका हलबाट निर्मातालाई पचास प्रतिशत भन्दा बढी सेयर दिन अध्यक्ष उद्धिन तयार नभएको र आफुहरुले नैतिकताका आधारमा कार्यदलबाट राजीनामा दिएको कायस्थको कथन छ । जबकि भूकम्पपछि असार र साउनको बिचमा आफ्नो फिल्म प्रदर्शन गराउने निर्मातालाई हलले दिदै आएको पचास प्रतिशत भन्दा बढी साठ्ठी प्रतिशत सम्मको सेयर र एमजीको समेत सुबिधा दिने भनी कार्यदलले अध्यक्ष उद्धिन समेतको सहमतीमा पारित गरेको थियो । आफ्ना हलबाट निर्मातालाई पचास प्रतिशत भन्दा बढी सेयर दिन नमानेको भन्ने आरोप बारे बुझ्न खोज्दा अध्यक्ष उद्धिन कुरा गर्न अन्कनाए । अध्यक्ष उद्धिनले मोबाइल सम्पर्कमा भने  ‘म भात खाँदै छुृ । एक घण्टा पछि कुरा गरौंला ।’  

त्यस्तै मोफसलका हलबाट असार र साउनमा फिल्म रिलिज गर्ने निर्मातालाई पचास प्रतिशत भन्दा बढी सेयर दिन हिच्किचाएको भन्ने आरोप लगाइएका चलचित्र संघका नि.वर्तमान अध्यक्ष राजकुमार पोखरेलले पछिल्लो समय संघको गतिविधि बारे आफुलाई कुनै पनि जानकारी नभएको बताए । उनले भने, ‘मलाई केही कुराको जानकारी नै छैन त्यसैले सहयोग र असहयोग भन्ने कुरा नै आउँदैन ।’