यही साता नायिका नन्दिता केसी अमेरिका उडदैछन् । भूकम्प प्रभावितको सहयोगार्थ अमेरिकाका विभिन्न शहरमा ‘नाफ्का’ नामक संस्थाले आयोजना गर्न लागेको कार्यक्रमका लागि आफ्नो प्रस्तुती लिएर नन्दिता अमेरिका उड्न लागेकी हुन् । करिब दुई महिनासम्म चल्ने कार्यक्रममा नायिका केसी सहित गायकद्धय धिरज राई र हिमाल सागर पनि सँगै हुनेछन् । नेपालका विभिन्न भूकम्प प्रभावित जिल्लामा समेत पुगेर प्रत्यक्ष रुपमा राहत वितरणमा संलग्न भएकी नायिका नन्दिता केसीसँग न्यूजपेजथ्री डटकमका लागि उत्सब रसाईलीले गरेको कुराकानी लाई यहाँ प्रस्तुत गरिएको छ ।  

अमेरिकामा हुने कार्यक्रमको बारेमा छोटकरीमा बताइ दिनुस् न । 

बैशाख १२ गते गएको भुकम्प बाट प्रभावित भएकाहरुको लागि अमेरिकाको क्यालिफोर्नियामा ‘नेपाल डे २०१५’ भन्ने इभेन्ट हुँदैछ, त्यसमै सहभागी हुँन त्यहाँ जाँदैछु । क्यालिफोर्निया बाहेक अन्य शहर न्यूयोर्क, टेक्ससा, बाल्टिमोर लगायत ८ वटा शहरमा हाम्रो कार्यक्रम हुँदैछ । यसको संयोजन चाहिं अनिल पाण्डेले गर्दै हुनुहुन्छ ।

अमेरिका तपाईंको पहिलो उडान हो क्यारे, कत्तिको उत्साहित हुनुहुन्छ ? 

मलाई चाहे अमेरिका होस्, चाहे दुबई होस् या कतार नै किन नहोस् । बाहिरको कार्यक्रम भनेपछि एकदमै उत्साहित हुन्छु । किनभने नेपालको भन्दा पनि बाहिर बस्ने दर्शकले अझ बढी माया र सहयोग गर्नुहुन्छ । सिनियर आर्टिस्ट बाट सुनिन्छ अझ अमेरिकामा त दर्शकको माया धेरै नै पाइन्छ रे । अर्को कुरा राम्रो कार्यको लागि कार्यक्रम लिएर जाँदैछु त्यसैले पनि धेरै नै उत्साहित छु ।

तपाईंको प्रस्तुती कस्तो रहनेछ ?

बाहिर बस्नु हुने दर्शकहरु युट्युवमा आएका मेरा भिडियो फिल्महरु बाट पनि नजिक त हुनुहुन्थ्यो । तर मेरो प्रत्यक्ष प्रस्तुती कतिपयले हेर्नु भएको छैन होला । यसपालिको इभेन्टमा म डान्स गर्दैछु । तर डान्समा नेपालको अहिलेको अवस्थालाई पनि देखाउँछु । शोकलाई शक्तिमा बदल्नु पर्छ भन्ने प्रकारको राष्ट्रिय गीतमा डान्स कम्पोज गरिरहेको छु । सँगै डान्सिङ नम्वर पनि छ । भिसा आएको तीन साता जति भयो म दुई साता देखि प्राक्टिसमा छु ।

अमेरिकाको भिसा पाउँन त्यति सजिलो छैन होला है ? 

अमेरिकाको भिसा पाउनु भनेको चाहिं ‘इक्जाम’ जस्तै हो । ‘इक्जाम’ मा पास फेल दुवै हुन सकिन्छ । अब अमेरिकाले भिसा दे दिन्छ नदिए दिदैंन । भिसा पाएन भने रुने कराउने कुरा पनि आउँदैन । तर, यसपालिको हाम्रो उद्धेश्य राम्रो थियो र हाम्रो डकुमेन्ट्स पनि बलियो थियो । त्यसैले भिसा पाइयो । 

फर्कनु हुन्छ अमेरिका पुगेपछि ?

हन्ड्रेड प्रतिशत फर्कन्छु । अमेरिकाबाट कार्यक्रमको लागि क्यानडा पनि जाने कुरा छ करिब दुई महिना पछि म नेपाल फर्कन्छु । किनभने नेपाल फर्केपछि मेरो ब्याङ्कक, ल्हासा र साउथ अफ्रिकाको इभेन्ट छ, त्यसैल म नेपाल फर्कन्छु ।

तर, कार्यक्रममा गएका थुप्रै कलाकार उतै बसेका उदाहरण छन् नि ? 

मान्छेको आफ्नो सोचाइ हुन्छ । परिवारीक योजना हुन्छ तर म चाहिं फर्कन्छु नै । त्यहाँ हुने ग्लोबल फेस्टिभलमा प्रस्तुती दिएर म नेपाल फर्कन्छु ।

के तपाइको अमेरिका बस्ने योजना नभएकै हो त ? 

म यहाँ पनि विजी छु । फिल्महरु पनि पाइरहेको छु । म्युजिक भिडियो पनि गरि नै रहेको छु । बाहिरको कार्यक्रमको लागि अफर आइरहेको छ । 

अमेरिकामा खास मान्छे पनि हुनुहुन्छ भन्ने सुनिन्छ नि ?

हा हा हा..एकदमै गलत हो । यो शतप्रतिशत झुठो हो । मैंले अरु बाट पनि सुनेको थिएँ, म के स्पष्ट पार्न चाहान्छु भने अमेरिकामा मेरो कोही खास मान्छे हुनुहन्न । बरु मेरो त्यहाँ दाइ भाउजु र मेरो मिल्ने साथी छ । म अहिलेसम्म सिङ्गल नै छु ।

अब 'मिङ्गल' हुने बेला भएन ?

बेला त मेरो एसएलसी दिइसके पछि भएको हो । एसएलसी दिइसकेपछि नै मलाई विवाहको प्रस्ताव आएको हो । अहिलेसम्म आइ नै रहेको छ । तर कुरा के हो भने विवाह भन्ने कुरा चाहिं लेखेको हुने रहेछ । त्यसैले अब जहिले लेखेको छ त्यहिले नै होला ।

तर एक प्रकारको योजना त हुन्छ नि होइन ?

हाम्रो क्षेत्रमा चाहिं के हुँदो रहेछ भने जति काम गर्यो त्यति थपिने हुँदो रहेछ । अब यो काम सकेर विवाह गर्छु भन्यो फेरी अर्को राम्रो काम आउने । अहिले नै किन विवाह गर्नु पर्यो र एक दुई वर्ष पछि नै गरौंला भन्ने हुँदो रहेछ । अझै एक दुई वर्ष काममा व्यस्त हुन्छु । राम्रो फिल्मको पनि कुरा हुँदैछ । हेरौं त्यसपछि कोही राम्रो मान्छे भेटियो मन मिल्यो भने गरौंला ।

उमेर ढल्केपछि हिरोइनको घरजम गर्न समस्या परेको देखिएको छ नि ?

त्यस्तो नहोला । आफुले विवाह गर्छु भनेपछि कुनै समस्या आउला जस्तो लाग्दैन । विवाह गर्ने समय आएपछि जो मान्छे राम्रो लाग्छ उही सँग गर्छु ।

तपाई राहत बाँड्न पनि हिड्नु भयो क्यारे होइन ? 

हो विभिन्न भूकम्प प्रभावित क्षेत्रमा राहत बाँड्न गयौं । भूकम्प प्रभावित क्षेत्रको अवस्था  दर्दनाक छ । सेतो कपडा लगाएका व्यक्ति देख्दा साँच्चै आँखा बाट आँसु आयो । शोकमा रहेका व्यक्ति देख्दा आफ्नै परिवार गुमेको महसुश भयो । हामीले वि फर् अल भन्ने संगठन सँग मिलेर राहत वितरण कार्य गर्यौं । अहिले हाम्रो टिमले काभ्रेपलाञ्चोक जिल्लाको पोखरी चौंरी गाविसमा तीन वटा प्राथमिक विद्यालय बनाउँदै छ । वि फर् अल बाट हामीले भूकम्प प्रभावितको लागि आफ्नै पकेटबाट पनि पैसा निकालेर काम गरेका छौं । पछि चाहिं अस्थायी घर निर्माणको लागि सहयोग भैरहेको छ । राम्रो सन्देश जाओस् भनेर हामीले यो कार्य गरिरहका हौं ।

फिल्म करिअरलाई लिएर कस्तो योजना बनाउनु भएको छ ?

प्रस्ताव आएका राम्रो राम्रो फिल्महरु गर्छु । अहिले पनि एक दुई राम्रो फिल्महरुको कुरा भैरहेको छ ।

फिल्म निर्माण र निर्देशनमा के योजना बनाउनु भएको छ ? 

फिल्म निर्माण र निर्देशन दुवैमा अहिले केही पनि योजना छैन ।

फिल्म क्षेत्रमा विगत एक दशक देखि हुनुहुन्छ, आफुलाई कुन स्थानमा उभ्याउनु हुन्छ ?

मान्छे भन्दा पनि मान्छेले गरेका कामहरु सफल हुने हुन् । मेरो कतिपय कामहरु सफल भए कतिपय असफल भएका छन् । र, म अहिले पनि संघर्ष नै गरिरहेको छु । किनभने जति म अगाडी बढ्छु त्यति नै नयाँ कुरा सिक्दै जान्छु । जन्मिदैं कसैले पनि सिकेर आएको हुँदैन । हरेक पाइलामा नयाँ कुरा सिक्दै गइन्छ, सिक्नु भनेकै संघर्ष गर्नु हो ।

फिल्म क्षेत्रमा हिरोइन बिच कत्तिको प्रतिस्पर्धा देख्नुहुन्छ ? 

एकदमै प्रतिस्पर्धा छ । तर मेरो स्वभाव चाहिं प्रतिस्पर्धामा जाने खालको छैन । म आफ्नो कामसँग प्रतिस्पर्धा गर्छु । हिजो मेरो काम कस्तो थियो, आज मैंले त्यसलाई कसरी सच्याउँनु पर्छ भनी केलाउँदै जान्छु । तर, प्रतिस्पर्धा चाहि ‘टफ’ नै छ ।

भनेपछि अरुलाई पछारेर आफु अगाडी बढ्नु पर्ने भो ? 

म मा चाहिं जेरो प्रतिशत पनि आउदैन कि अरुलाई पछारेर आफु अगाडी जाउँ । घर एक जनाले मात्र चलाएर चल्दैन । फिल्म क्षेत्रमा भनेको घर हो । हामी सबै घरका सदस्य हौं । मेरो घरलाई समाज चिनाउनु पर्यो भने मैंले मात्रै राम्रो गरेर चिनिदैन । घरको सबै सदस्यले राम्रो काम गर्नुपर्छ । त्यसैले मैंले अरुलाई पछार्ने काशिस गरें भने मेरो क्षेत्र कसरी बाहिर राम्ररी चिनिन्छ । फिल्म क्षेत्रलाई अन्तर्राष्ट्रिय स्तरमा लैजानु पर्यो नि । अन्तर्राष्ट्रिय स्तरमा लैजाँदा सबैले राम्रो काम गर्नुपर्छ । एकले अर्कालाई पछार्ने भन्दा पनि एकले अर्कालाई सहयोग गर्नुपर्छ ।

जे होस्, वर्तमान फिल्म क्षेत्रमा कुन हिरोइन अगाडी बढि रहेको देख्नु हुन्छ ?

रेखा दिदी (थापा) त फिल्म क्षेत्रको खम्बा नै हो । व्यस्तताको हिसाबले चाहिं प्रियंका (कार्की) अगाडी छ जस्तो लाग्छ । त्यस्तै केकी बैनी (अधिकारी) उसले पनि राम्रो नै गरिरहेको छ । नम्रता (श्रेष्ठ) को पनि राम्रो भइरहेको छ ।

अन्त्यमा के भन्नुहुन्छ ? 

बैशाख १२ गतेको भूकम्पले हाम्रो सुन्दर नेपाललाई तहसनहस पारेको छ । वृद्धा देखि बालकसम्म खुला आकाशमा बस्न बाध्य छन् । हामीले एकले अर्कालाई सहयोग गरिरहेका छौं । स्वदेशी तथा विदेशी सबैले सहयोग गरिरहनु भएको छ । जति सक्दो हामीले सहयोग गरौं । अर्को मलाई चित्त दुखेको कुरा चाहिं हामीले घर निर्माण गर्यौं । त्यसमा विभिन्न खालको प्रतिक्रियाहरु आए । फेसबुकमा फोटो राख्दा पनि फोटो खिचेर राख्ने होइन काम गर् भन्ने खालका प्रतिक्रियाहरु आए । जब आफुले केही पनि गर्न सक्नु हुन्न भने अरुलाई केही पनि नभन्नुस् । घरमा पानी चुहिएला रे..उडाएर लैजाला रे... जस्ता कमेन्ट आएका थिए । त्यो देख्दा खेरी चाहि चित्त दुख्थ्यो । हामी बिहान ६ बजे उठेर हिड्थ्यौं । जो प्रभावित हुनुहुन्छ उहाँहरुलाई सहयोग मिलोस्, रातमा चयनले सुत्न पाउन् भनेर हामी त्यो काममा लागेका थियौं । तर, त्यस्तो कमेन्ट देख्दा चाहिं एकदमै चित्त दुख्थ्यो । एकले अर्कालाई खुट्टा तान्ने बानी नगरौं, सक्छौं भने सहयोग गरौं, कोठा भित्र बसेर कमेन्ट गर्न बानी छोडौं । गर्न सक्छौं काम गरौं होइन भने चित्त नदुखाउँ यही भन्न चाहान्छु ।