आठौं संस्करणको नेफ्टा अवार्ड कतारमा आयोजना हुने भएको छ । शनिबार राजधानीमा औपचारिक कार्यक्रम गर्दै नेफ्टाले यो संस्करणको अवार्ड पनि मुलुक बाहिर हुने घोषणा गरेको हो । यसअघि दुई संस्करणको नेफ्टा अवार्ड मलेसिया र हङकङमा सम्पन्न भएको थियो । चलबचित्र प्राविधिक सँग अन्तर्राष्ट्रिय कलाकार फोरम कतारको सहकार्यमा अवार्ड आयोजना हुन लागेको हो । 

शनिबारको कार्यक्रममा करिश्मा मानन्धर, जीवन लुईंटेल, नन्दिता केसी, ऋचा शर्मा, केकी अधिकारी, वेनिशा हमाल, यशराज, सरिता गिरी, शोभिात सिंखडा, गजित बिष्ट, शिल्पा पोख्रेल, सुरक्षा पन्त, गौरव पहारी लगायत कलाकारले संयुक्त रुपमा केक काटेर ८ औं नेफ्टा अवार्डको औपचारिक रुपमा घोषणा गरे । चलचित्र विकास बोर्डका अध्यक्ष राजकुमार राइले पुराना सँगै नयाँ पुस्ताका फिल्म कर्मीलाई पनि जुरीमा समावेश गर्नुपर्ने आवश्यकता औलाए भने नेफ्टा प्रमुख एवं प्राविधिक संघका अध्यक्ष मनोज केसीले कुरा काट्नेहरुले काट्दै गरेपनि आफुहरुले काम गर्न नछाड्ने बताए ।

जुरीका तर्फबाट निर्देशक नारायण पुरीले अवार्डलाई विवादबाट टाढा राख्न नसकिएपनि यसलाई कम गर्न प्रयास गर्ने बताए । नायिका करिश्मा मानन्धरले नेफ्टा हरेक बर्ष माथि उक्लदै अवार्ड गर्न सक्षम भएको बताइन् । अवार्डका संयोजक शिव पुरीले सबैको सहयोगको अपेक्षा गरे । अन्तर्राष्ट्रिय कलाकार मञ्च कतारका उपाध्यक्ष रित श्रेष्ठले सबै तयारी आफुहरुले गरिरहेकोले अवार्ड सफल हुनेमा विश्वास व्यक्त गरे ।

कार्यक्रममा स्वागत मन्तव्य प्राविधिक संघका महासचिव अनन्त तिमिल्सिनाले राखेका थिए भने नेफ्टाले यसै संस्करण देखि सञ्चारकर्मी विजय सुवेदी ‘आवाज’ लाई मिडिया संयोजकका रुपमा नियुक्ति गरेको छ । अवार्डका लागि ७५ वटा नेपाली फिल्मले भाग लिएका छन् । जुरीले आइतबार बाट चलचित्र संघको हलमा फिल्म हेर्न सुरु गरिइसकेको छ । जुरी सदस्यमा विशेष श्रेष्ठ, नारायण पुरी, रक्षा सिंह राणा, भरत शाक्य, करुण थापा, विरेन्द्र हमाल छन् । वि.सं २०७१ साल वैशाख १ गतेबाट वि.सं २०७१ साल चैत्र मसान्तसम्म प्रदर्शनमा आएका फिल्मलाई अवार्डमा सहभागी गराइनेछ ।