एक समय थियो, जनवादी गीतलाई सञ्चार माध्यममा प्रतिबन्ध लगाइन्थ्यो । जनवादी सर्जकहरु द्धन्द्धकालमा भूमिगत शैलीम आफ्ना सृजनालाई जनता समक्ष पस्कने गर्दथे । जनवादी गीतका सर्जकलाई मात्रै नभएर दर्शक तथा श्रोतालाई समेत आर्मी, पुलिसले समात्छ कि भन्ने ठूलो भय हुने गर्दथ्यो ।

द्धन्द्धरत तत्कालिन माओवादी शान्ति प्रक्रियामा आएसँगै जनवादी गीतहरु सञ्चार माध्यममा घन्किन थालेका छन् । देश संघिय लोकतान्त्रिक गणतन्त्रमा गएपछि  जनताको घर दैलोमा धाउने जनवादी गायकहरु आर्मी ब्यारेकसम्म पुग्न थालेका छन् । सिस्नुपानी नेपालले गत शुक्रबार साँझ सिन्धुपाल्चोकस्थित भीमकाली ब्यारेक मेलम्चीमा राखेको हास्याव्यङ्ग्य कार्यक्रममा यस्तै एक दृश्य देख्न पाइयो ।

कुनै समय आर्मीको तारो  बनेका जनवादी गायक जीवन शर्मा करिब तीन सय आर्मीका जवान माझ सुनिए । जीवनले गाएको ‘सिमली छायाँमा’ जनवादी गीतमा जवानले नृत्य गर्दा रातको महोल गर्मिएको थियो । मेजर प्रेम हमालले पनि शर्माको जनवादी गीतमा खुबै मनोरञ्जन लिए । थपडी बजाउँदै मेजर हमालले आफ्ना जवानलाई नाच्न प्रोत्साहन गरे ।  जनवादी गायक जीवन शर्मासँगै मेलम्चीको आर्मी ब्यारेकमा हाँस्यब्याङ्ग्यकार मनोज गजुरेल, कवि अर्जुन पराजुली लगायतले  आफ्नो प्रस्तुती मार्फत ब्यारेकका जवानलाई मनोञ्जन दिलाए । 

बैशाख १२ गते आएको शक्तिशाली भूकम्प बाट पिडित मनमा मल्हम लगाउने कार्य सिस्नुपानी नेपालले गर्दै आइरहेको छ । देशका विभिन्न भूकम्प प्रभावित क्षेत्रमा पुगेर मानिसका घाईते मनमा उर्जा थप्ने कार्यमा सिस्नुपानी नेपाल सक्रिय भएर लागिरहेको छ ।