भूकम्प प्रभावित चलचित्र प्राविधिकको सहयोगार्थ नेपाली फिल्म ‘अधकट्टी’ को च्यारेटी गरिने भएको छ । आउँदो असार १ गते देखि काठमाण्डू र मोफसलका झण्डै आधा दर्जन स्टेशनमा ‘अधकट्टी’ को च्यारेटी गरिने कार्यकारी निर्माता प्रदीपकुमार उदयले जानकारी दिए । 

कार्यकारी निर्माता उदयका अनुसार फिल्म ‘अधकट्टी’ को असार १ गते काठमाण्डूको कुमारी हलमा च्यारेटी गरिनेछ भने असार महिना भर मोफसलका धनगडी, बुटवल, पोखरा, नारायणघाट र हेटौंडाका स्टेशनमा फिल्मको एक एक च्यारेटी शो गरिनेछ । अन्तर्राष्ट्रिय कलाकार मञ्चले आयोजना गर्न लागेको ‘अधकट्टी’ को च्यारेटी शो नायिका ऋचा शर्माको संयोजनमा हुन लागेको हो । काठमाण्डू सहयोगीका रुपमा भने क्यूएफएक्स सिनेमाज् रहनेछ । झण्डै ४० जना भूकम्प प्रभावित प्राविधिकको सहयोगार्थ पन्ध्र लाख रकम सम्म च्यारेटी मार्फत संकलन गर्ने लक्ष्य रहेको प्रदीप कुमार बताए । 

सञ्चारकर्मी सुव्रत आचार्य निर्देशित फिल्म ‘अधकट्टी’ यही जेठ ८ गते देखि सार्वजनिक प्रदर्शनमा आउने तयारीमा थियो । तर, बैशाख १२ गते शक्तिशाली भूकम्प आएपछि यो फिल्म तोकिएको मितिमा प्रदर्शन हुन सकेन । डार्क कमेडी यो फिल्ममा विल्सन विक्रम राई, संयम पुरी, गौरव पहारी, रिस्ता बस्नेत, अशिष्मा नकर्मी लगायतको अभिनय रहेको छ ।