गएको सातादेखि नायिका रेखा थापा अमेरिकामा छन् । नेपालका भूकम्प प्रभावितको सहयोगार्थ त्यहाँका दातृ संस्था सँग सहकार्य गर्न रेखा त्यहाँ पुगेकी हुन् । उनले ‘रेखा थापा फाउन्डेशन’ मार्फत रामेछाप जिल्लाका भूकम्प प्रभावित र अपाङ्गता भएकालाई सहयोग पुर्याउने योजना सार्वजनिक गरेकी छन् । निर्माता एवं निर्देशक समेत रहेकी रेखासँग एक अनलाईनले गरेको कुराकानीलाई यहाँ प्रस्तुत गरेको छ ।

अहिले अमेरिकामा के गर्दै हुनुहुन्छ र नेपाल कहिले फर्कनुहुन्छ ? 
रेखा थापा फाउन्डेशनका अमेरिकामा रहेका दातृ संस्थाहरु र सदस्यहरुसँग फाउन्डेशनको आगामी कार्ययोजना र भेटघाटमा व्यस्त रहन्छु । नेपालमा गएको हालैको महाभूकम्प पश्चात मेरो पनि केही रुपमा मानसिक तनावले शारीरिक रुपमा अस्वस्थ महसुस गरिरहेको छु । सायद नेपाल चाँडै नै फर्कन्छु होला । तर मिति चाहिँ पक्का भएको छैन । 

सवै कलाकार अहिले सहयोगमा जुटिरहेको सुन्दा कस्तो लाग्छ ? 
उहाँहरुको उत्साह देखेर ज्यादै खुशी लाग्छ  अनि गर्व पनि । विशेषगरी हाश्यकलाकारहरुले अहिले दुःखको समयमा भएपनि पीडितलाई हँसाएर भएपनि राहत दिनुभएको छ । थोरै हाँसो भएपनि दिनुभएको छ । यो बेला यही ठूलो कुरा हो । सरकारले केही गरेन, विदेशीहरुले केही गरेनन भनेर मुख ताक्ने होइन कि आफूले कहाँ, कसरी योगदान र सहयोग गन सकिन्छ त्यो गर्नुपर्छ । 

रेखा थापा फाउन्डेशनको पनि पीडितहरुको लागि धेरै योजनाहरु बाहिर आएका छन । केही मानिसले त्यो मात्र योजना हो पनि भन्छन ? कहिलेबाट तपाईका योजनाहरु सुरु हुन्छन ?
हेर्नुहोस , यो अलि गम्भीर र संवेदनशील प्रश्न हो ।  अहिलेको नेपालको परिस्थिति हेर्दा जुन प्रश्नको उत्तर त्यति सहज र सरल छैन । अहिले देश नै ठूलो जोखिममा छ । भूकम्प गयो, हामी नेपालीले धेरै कुरा गुमाएका छौँ । धेरै मान्छेको ज्यान गएको छ । हजारौँ घाइते र अंगभंग हुनुभएको छ । जति गुमायौँ, त्यो भन्दा पनि ठूलो महामारीमा परेर धेरै नेपालीहरुले ज्यान गुमाउनुपर्ला भन्ने डर चाहिँ आजको प्रमुख समस्या हो । केही वर्षअघि मात्र हाइटी भन्ने देशमा भूकम्पमा परेर मर्नेहरुको संख्या भन्दा भूकम्पपछि सरकाले विदेशी दातृ राष्टहरुको सहयोगलाई व्यवस्थापन गर्न नसक्नु, नेताहरुको चरम बेवास्ताले देश पुर्ननिर्माणको योजना ल्याउन नसक्नु र भूकम्पपछि मृत्यु भएका मानिसहरुको शव समयमा उद्दार गर्न नसक्नु जस्ता समस्याले हाइटी देशभरी नै हैजाजस्तो भयावह रोगको सामना गर्न नसकेर हजारौँ मानिसले ज्यान गुमाउनुपरेको इतिहास हाम्रो सामु छ । हो, आज सरकार लगायत हामी सवैले त्यो विषयमा नसोच्ने हो भने, अव झनै ठूलो महाविपत्ति हाम्रो सामु आउनेवाला म देख्छु । त्यसैले म हतारमा योजना बनाउदिन । हरेक कुराहरुको लागि उचित समय कुर्नुपर्ने आवश्यकता हुन्छ । अहिले हरेक नेपाली हताश र विचलित अवस्थामा छौँ । आजभोलि  सहयोग गर्ने, पुनःनिर्माण गर्ने सहयोगी हातहरु धेरै नै देखिएका छन । तर उचित सहयोग र वास्तविक पीडितहरुको पहिचान गरेर मात्र उनीहरुलाई यो वर्षाको समयमा व्यवस्थापन गराउन हामी सवै पहिले लाग्नुपर्छ । रेखा थापा फाउन्डेशन सदैव तन, मन बचनले  विनास्वार्थ राष्ट्र सेवा र हितको लागि तल्लिन संस्था हो । कसले के भन्यो र के गर्यो भन्ने कहिल्यै हेर्दैन र सुन्दैन पनि । मैले पहिले ने भने उचित समयमा आफ्नो कार्यतालिका अनुरुप फाउन्डेशनले काम गर्दै जाने छ । कसैलाई देखाउन, नाम कमाउन र चर्चा पाउनको लागि पत्रिकाका पन्नाहरु र फेशबुकका वालमा मात्र घोषणा गरिएको योजना होइन । अनि चामल, चाउचाउ अनि नुन पसलबाट किनेर तुरुन्तै वितरण गर्ने फाउन्डेशनको योजना भएको भए सायद तपाईले सोध्नुभएको प्रश्न झै सजिलै जवाफ दिने थिए । तर फाउन्डेशनको कार्ययोजना अलि फरक र सहज नभएको हुँदा अलि समय लिनेछ । अर्को कुरा, पीडित जनताहरुको लागि जिल्ला जिल्लामा निरन्तर सुरु गरिने योजनामा फाउन्डेशन छ । एक दिनको लागि मात्र गरिने सहयोग त मैले गर्न सकेजति गरिसकेँ । अनि सहयोग निरन्तर गर्न मन मात्र भएर त भएन नि ।  मुखले यो गर्छु र त्यो गर्छु भनेर मात्र पनि भएन ।  हो म अहिले फाउन्डेशनलाई पूर्ण रुपमा स्रोत, साधन र शक्तिको संचय गर्दै सक्षम बनाउँदै छु । कसले के, कति कहाँ, के गर्यो अहिले होइन, अर्को वर्ष छर्लंग देखिन्छ ।

रामप्यारीको कहिले  सुटिंग सुरु गर्ने सोच बनाउनुभको छ ?
अहिले देश रोएको छ । मेरा सुभचिन्तक, दाजुभाईदिदीबहिनी, परिवार र राष्टको घरोहर गुमाएको समय हो । हामी नेपाली राष्टिय विपत्तिमा छौँ । विगत एक महिनादेखि महाविपत्तिको सामना गरिरहेका छौँ । अब भन्नुहोस, मेरो परिवार, शुभचिन्तकहरु गुमाएको अवस्थामा म फिल्मको बिजनेश कसरी गर्न सक्छु ? मेरो देशले वर्षदिनसम्म बरखी बारेको अवस्था छ ।  अब मलाई भन्नुहोस, म रामप्यारीको गीतमा छमछम नाँच्दै गाउँदै, रमाइलो गर्दै कसरी त्यो नेपाली दुःखी मनहरुको लागि २ सय रुपैयाँको टिकट बेच्दै व्यापार गर्न सक्छु होला ? रेथा थापा मात्र कलाकार अनि फिल्म बिजनेश गर्ने मान्छे मात्र होइन, राष्टप्रति जिम्मेवार छोरी पनि हो । त्यसैले अहिलेको नेपालको परिस्थिति हेर्दा म मेरो समय यो वर्ष राष्ट्रको योगदानमा समर्पण गर्ने छु  ।

के योगदान पुर्याउनुभयो त अहिले पीडित कलाकर्मीको लागि ?
महत्वपूर्ण प्रश्न गर्नुभयो । म आफैँले पनि घर गुमाएको छु ।  आम नेपालीले झै कलाकार, निर्माता तथा प्राविधिकहरुले पनि यो पीडा बेहोर्नु परेको छ ।  घरवारविहीन बन्नुपरेको छ । धेरै ठूलो सहयोग र साथ त मैले गर्न सकेको छैन । तर पनि मेरा प्राविधिक साथीहरुको सहयोगार्थ हिजोअस्ती मात्र १ लाख आफ्नै खल्तीबाट सहयोग गरेँ । मैले आजसम्म पनि पशुपति आर्यघाटमा होस या अरु सहयोग होस आफ्नो खल्तीबाट नै सहयोग गर्दै आएको छु । कसैको सहयोग लिएको छैन । र बाँकी सहयोगहरु निरन्तर जारी छ ।  जहिलेसम्म सक्षम रहन्छु । 
साभार : नेपालपाटी डटकम (प्रेम गौतम)