बैशाख १२ गते आएको शक्तिशाली भूकम्प र त्यसपछि आएका कम्पनले जन मानसमा ठूलो त्रास पैदा भएको छ । भूकम्पबाट धेरैको ज्यान गएको छ भने धेरै घाइते भएका छन् । कैयौं घर भत्किएका छन् चर्किएका घर पनि बस्न मिल्ने छैनन् । अझै पनि मानिसहरु घर भित्र ढुक्क साथ बस्न सकिरहेका छैनन् । धेरै जसो मानिसको रात त्रिपाल मुनि बितिरहेको छ । उद्योग कलकारखाना पूर्ण रुपले सञ्चालनमा आउन सकेका छैनन् । मनोरञ्जनको क्षेत्र त अहिले ठप्प जस्तै छ । भूकम्प गएका क्षेत्रमा मानिसको दैनिकी त्रासपूर्ण रुपमा बितिरहेको छ । भूकम्पपछि मानिसको दैनिकी र मनोरञ्जन क्षेत्रलाई कसरी सामान्य तर्फ ल्याउँन सकिन्छ भनेर फिल्म क्षेत्रका केही व्यत्तिलाई गरिएको जिज्ञासामा उनीहरुले यस्तो जवाफ दिएका छन् ।

झरना थापा : यो अवस्थामा सम्हालिएर एक अर्कालाई सहयोग गर्दै अगाडी बढ्नु पर्छ । अब पनि डराएर बाहिर नबसौं । आफ्नो कार्यलाई अगाडी बढाउँ । यदि त्यस्तो भएन भने हामी शून्यतामा झर्नेछौं । सरकारको मात्रै मुख नताकौं, आफ्नो पनि बल लगाएर अगाडी बढौं । 

आकाश अधिकारी : यो विपदमा संघ संस्था र व्यक्तिको सहयोग मात्रै पर्याप्त छैन । प्रभावितको पुर्नस्थापनाको लागि राज्य नै सक्रिय हुनुपर्छ । राज्यले राम्रो नीति ल्याउन आवश्यक छ । स्थानिय तहमा पनि सक्रियता देखाउन आवश्यक छ । हामी मानसिक रुपमा पनि बलियो भएर अगाडी बढ्नु पर्छ ।  

केकी अधिकारी : अब हामीले सामान्य जिवनयापन सुुरु गर्न थाल्नु पर्छ । सबैभन्दा ठूलो समस्या भनेको बस्नलाई थियो । हामी जति पनि गाउँ पुग्यौं, ती गाउँहरुमा बस्ने समस्या बाट सबैजना उठिसक्नु भएको छ । स्वयम् प्रभावितहरुमा पनि अब उठ्नु पर्छ भन्ने भावना जागेको हामीले पाएका छौं । मलाई के लाग्छ भने, पहिला हामीले जति काम गथ्र्यौ, अहिले त्यो भन्दा पनि दोब्बर काम गर्न सुरु गर्नु पर्छ । किनभने हामीमा परेको क्षतिलाई पूर्ति गर्न दोब्बर काम गर्न आवश्यक छ । अब देशलाई पहिला भन्दा पनि अझ सुन्दर बनाउँनु पर्छ । विनाश पछि पनि सुन्दर भएका थुप्रै देशहरु छन् ।

आर्यन सिग्देल : पहिलो कुरो त भूकम्प बाट प्रभावित भएकालाई सामान्य जिवनयापन तर्फ फर्काउनु पर्छ र मानसिक रुपमा पनि हामी बलियो हुन आवश्यक छ । तर हामीमा पिडा अझै कायम छ । हाम्रो क्षेत्र मनोरञ्जनको भएकाले पनि सामान्य दैनिकीमा फर्कन केही समय लाग्छ । स्थिति सामान्य नभएसम्म फिल्म क्षेत्रलाई पनि यसरी अगाडी बढाऔं भनेर भन्न सक्ने स्थिति छैन । 

दीपाश्री निरौला : मान्छेको तरंगीत मनलाई स्थिर बनाउँन गाह्रो छ । तर पनि हामी हसाउँने प्रयास गर्दैछौं । मेरो पनि आमा हुनुहुन्न । लाग्थ्यो, आमा बिना बाँच्न सक्दिनं । तर, मनलाई काम र साधनामा लगायो भने अवश्य पनि अगाडी बढ्न सकिंदो रहेछ । फिल्म क्षेत्र अहिले जर्जर देखिएको छ । रात पछि दिन अवश्य आउँछ । फिल्म क्षेत्रलाई गाह्रो छ तर मनोरञ्जन सबैलाई चाहिन्छ । मनोरञ्जनले मनलाई दरिलो बनाउँछ भन्ने हाम्लाई लाग्छ त्यसैले हामी यतिबेला मन दरिलो बनाउने बाटोमा छौं । 

केदार घिमिरे ‘माग्ने बुढा’ : पहिलो भनेको राहत, उद्धार र पुर्नस्थपना थियो, यी कार्यहरु हुँदैछन् । अब भनेको जिवनमा सरलीकरण ल्याउनु हो । । मानिसको जिवनमा सरलीकरण नुहनु जस्तो भयावह समस्या अरु केही पनि होइन । ज्याला मजदुरी गर्ने, जसको बैङ्कमा ब्यालेन्स छैन र जसलाई उधारो पनि पत्याउँदैनन् उनीहरुलाई अहिले धेरै नै समस्या छ । अब हामीले विस्तारै सामान्य जिवन यापन सुरु गर्नुपर्छ ।
सुनिल कुमार थापा : हामी एक हुनुपर्यो । एकले अर्कालाई साथ दिन आवश्यक छ । पहिला मान्छेको मनमा शान्ति ल्याएर फिल्म क्षेत्रलाई अगाडी बढाउनु पर्छ । 

दीपकराज गिरी : होसियार रहँदै अब हामी सामान्य हुनुपर्छ । होसियार यस अर्थमा कि सामान्य धक्काहरु गइरहेको छ । ठूला विपत्ती, हाँसो, खुसी भनेको जिन्दगीको एउटा पाटो नै हो । त्यसैले एउटैमा अल्झेर बस्नु राम्रो हुन्न । अहिले हामी पूर्णतय उच्छृखल हाँसोको कार्यक्रम चाहिं निर्माण गर्दैनौं होला तर, सामान्य हाँसो, विकास र सन्देशका कुराहरु जोडेर कार्यक्रम बनाउँछौ ।  

नन्दिता केसी : जे हुनु भइहाल्यो । हल्लाको पछाडी नलाग्न पनि म आग्रह गर्दछु । हामी कलाकारले पनि प्रभावितलाई खुसी पार्न कार्यक्रम गर्न आवश्यक छ । अहिले देशको लागि एकताको जरुरी छ । तुरुन्तै घर निर्माण गर्न सम्भव पनि छैन । अब घर निर्माण गर्दा चाहिं भूकम्प रहित घर निर्माण गर्नु पर्छ  । हामीले अस्थायी घर निर्माण गरिरहेका छौं यसमा सबैलाई जुट्न आग्रह गर्दछु ।  

वेनिशा हमाल : अझै पनि मान्छेहरुमा ठूलो भूकम्प आएर तहसनहस हुने हो कि भन्ने डर छ । धेरैको ज्यान गएको छ, धेरै घाइते भएका  छन् । सामान्य जिवन यापनमा फर्कन केही गाह्रो त पक्कै होला । तर पनि विस्तारै सामान्य जिवनमा फर्कनु पर्छ । बजार बन्द छ, सामानको अभाव छ । हामीले अब सामान्य जिवनमा फर्कने चेतना फैलाउन पनि आवश्यक छ ।