चलचित्र संघ र नेपाल चलचित्र निर्माता संघको आग्रह बमोजिम आज (आइतबार) देखि राजधानीका हलवालाले आफ्ना हललाई सञ्चालनमा ल्याएका छन् । भूकम्पबाट क्षति नपुगेका राधजानीका अधिकाशं हलहरु सञ्चालनमा आएको कार्यदलका सदस्य गोपालकाजी कायस्थले बताए । 

कार्य दलका सदस्य कायस्थाका अनुसार राजधानीका क्यूएफएक्स अन्र्तगतको सिभिल मल अनि सिटिसी मल, अष्टनारायण, गंगा, हिरारत्न हल भने क्षतिका कारण खुल्न सकेका छैनन् । त्यस्तै गुण र गोपिकृष्णका पनि एक एक वटा हल क्षतिका कारण खुल्न सकेका छैनन्, जसको मर्मत कार्य जारी छ । भूकम्प आएको पन्ध्र दिनपछि सञ्चालनमा आएका फिल्म हलमा दर्शकको उपस्थिति भने निकै न्यून छ । भूकम्प जाँदा प्रदर्शनरत फिल्म ‘रेशम फिलिली’ स्थगित भएपछि हलवालाले पुनः ‘नाईं नभन्नू ल ३’ र ‘हवल्दार सुन्तली’ लाई प्रदर्शनमा ल्याएका छन् । मल्टिप्लेक्समा ‘सेता बाघ’ र ‘एभेन्जर्स एज अफ अल्ट्रन’ लगाइएको छ ।

त्यस्तै मोफसलमा भने भूकम्पले क्षति नपुर्याएका हललाई गएको शुक्रबार देखि नै सञ्चालनमा ल्याइएको छ । त्रासका कारण हलमा दर्शकको उपस्थिति भने निकै न्यून भैरहेको छ । तर, हल बन्द नै गर्नु पर्ने स्थिति नआएको मोफसलका वितरक एवं हल सञ्चालक नरेन्द्र महर्जनले बताए ।
समाचारमा प्रयोग गरिएको तस्बिर फाइल हो ।