निर्माता समेत रहेकी नायिका रेखा थापा र चलचित्र निर्माता संघका अध्यक्ष राजकुमार राईले विगतको तिक्ततालाई भुल्दै एक आपसमा मित्रताको हात अगाडी बढाएका छन् । गएको दशैंमा रेखाले निर्माण गरेको फिल्म ‘हिम्मतवाली’ प्रदर्शन ताका उब्जिएको खटपट बिहिबार साँझ भूकम्पबाट ज्यान गुमाएकाको नाममा बालिएको मैनबत्तीसँगै सकिएको भान निर्माता र निर्माता संघका अध्यक्षले गराएका छन् ।
कमलादीस्थित प्रज्ञा प्रतिष्ठान भवनमा आयोजना गरिएको भूकम्पबाट निधन भएकाको नाममा बालिने मैनबत्ती कार्यक्रममा रेखा र राजकुमार आमने सामने भएका थिए । यी दुई पुर्व दुश्मनले मौन कार्यक्रमको अन्त्य तिर मित्रताको हात मिलाउँदै अंकमाल समेत गरे । झण्डै ९ महिनापछि सार्वजनिक कार्यक्रममा भेटेर एक आपसमा मिल्दा लाग्थ्यो रेखा र राजकुमार बिच यसअघि कुनै खटपट नै भएको थिएन् । दिवंगत आत्माको चिर शान्तिको कामना गरिएको मैनबत्ती एकातिर बल्दै गर्दा अर्कातिर भने रेखा र राजकुमार बिच पुर्नमिलनको दृश्य देखिएको थियो । त्यहाँ निर्माता संघका अध्यक्ष राईलाई ‘अब नयाँ ढंगबाट अगाडी बढ्नु पर्छ’ भन्ने सुझाव समेत रेखाले दिंदा राजकुमारले ‘हुन्छ’ भन्ने संकेत गरेका थिए ।  

०७१ सालको फूलपातीमा रेखाले निर्माण गरेको फिल्म ‘हिम्मतवाली’ को काठमाण्डू प्रदर्शन रोक्न निर्माता राजकुमार राईले विभिन्न हलवालालाई पत्र काट्दै सञ्चारमन्त्रीलाई समेत गुहारेका थिए । बुधबार फिल्म प्रदर्शन गर्न नपाइने नियम केलाउँँदै अध्यक्ष राईले रेखाप्रति उक्त कदम चालेका थिए । यद्पी रेखाले सोही दिनमा काठमाण्डू सहित मोफसलमा आफ्नो फिल्म रिलिज गर्दा निर्माता संघले रेखालाई साधारण सदस्यबाट बहिस्कार नै गरेको थियो । यही काण्डबाट रेखा र राजकुमार बिच  दुश्मनी सुरु भएको थियो, जुन अहिले सकिए जस्तो देखिएको छ ।