गैर सरकारी सामाजिक संस्था आशाको ज्योती नेपाल ले काभ्रे पलाञ्चोक स्थित नयाँ गाउँ देउपुरका तीन वटा वडाका भूकम्प प्रभावितलाई राहत वितरण गरेको छ । निर्देशक तथा अभिनेता आकाश अधिकारीको उक्त गाविसमा  एक दिने स्वास्थ्य शिविर समेत सञ्चालन गर्यो । 

‘आशाको ज्योती नेपाल’ ले नयाँ गाउँ, देउपुरका ७, ८ र ९ वडाका भूकम्प प्रभावितलाई पाँच लाख बराबरको खाद्यन्न वितरण गरेको हो । सोमबार साँझ  राजधानीबाट झण्डै ४५ जनाको टोली त्यहाँ पुगेको थियो । निर्देशक एवं अभिनेता आकाश अधिकारीको संयोजकत्व रहेको टोलीमा डाक्टर तथा स्वयंम सेवक सहित अपकमीङ एक्टर आर्यन अधिकारी, सञ्चारकर्मी र संस्थाका सदस्यहरुको सहभागीता  थियो । 

‘आशाको ज्योती नेपाल’ को स्वास्थ्य शिविर एवं राहतबाट तीन वडाका ६ सय ६६ घरधुरी लाभान्वित भए, भने करिब पाँच सय व्यत्तिले आफ्नो स्वास्थ्य जाँच गराए । वडा नं ९ का सबैभन्दा वृद्ध दम्पती (९० वर्ष भन्दा माथि) बाट निर्देशक एवं अभिनेता अधिकारीको हातबाट खाद्यन्न सेवा वितरणको प्रारम्भ गरिएको थियो । भूकम्पले गर्दा हरेक घर तथा भवनमा मान्छे बस्न नहुने गरी क्षति भएको सिङ्गो गाविसमा सरकारी तहबाट हाल सम्म जम्मा ५० वटा त्रिपाल वितरण गरिएको गाविस सहायक रामचन्द्र बजगाँईले बताए । अन्य संस्था तथा व्यक्तिले उक्त गाविसमा राहत पुर्याएपनि आकाशको ‘आशाको ज्योती नेपाल’ ले विरतण गरेको राहत सेवा नै हाल सम्मको सबैभन्दा ठूलो हो ।  

१ सय क्विन्टल चामल, २५ कार्टुन चाउचाउ, ३६ बोरा भुजा, विस्कुट २ कार्टुन, दाल ५० केजी, त्रिपाल २ सय ४५ थान, चिउरा १० बोरा, नुन ६ बोरा, दालमोठ १ कार्टुन, आलु १ बोरा, गुन्द्री प्लास्टिकको १ सय २० थान, म्याट्रेस ९० मिटर तीन वडाका भूकम्प प्रभावितलाई वितरण गरेको गाविस सहायक बजगाँइको रेकर्डमा छ । २१ जनाको ज्यान गएको देउपुरका अधिकाशं मानिस आफ्नो घर छोडेर गोठ, तथा बारीको पाटामा पाल टाँगेर बस्न बाध्य छन् । 

देउपुरका भूकम्प प्रभावितको दुःखद अवस्था देखेपछि निर्देशक तथा अभिनेता आकाश अधिकारीले भने, ‘हामी जुन लक्ष्य लिएर यहाँ आएका थियौं, त्यो पूरा भयो । किनकी हामी भूकम्प प्रभावित कहाँ प्रत्यक्ष रुपमा पुगेर उहाँहरुको घाउमा थोरै भएपनि मल्हम लगाउन चाहान्थ्यौं । उहाँहरुको वास्तविक पिडा महसुश गर्न चाहान्थ्यौं । हामीले सकेको राहत प्रभावित कहाँ स्थानिय अगुवाको रोहवरमा सही ढंगबाट वितरण भएकोमा हाम्रो टिम एक हिसाबले खुसी पनि छौ, तर यहाँका जनताको अवस्था देख्दा जो कोही लाई दुःखी बनाउँछ ।’ भूकम्पबाट ज्यान गुमाएको परिवार र जेष्ठ नागरिकको पिडा सुन्दा आफू निकै भावुक बनेको आकाश बताउँछन् । गाउँमा युवा जनशत्ति नभएकाले पनि यो विपदमा सरकारी, गैर सरकारी तथा व्यक्तिको सहयोग आवश्यक रहेको उनको ठम्याइ छ ।

भूकम्पले क्षति बनाएका घर तथा भवनहरुलाई मात्रै सरकारले पुर्न निर्माण गरेर नहुने आकाशको आग्रह छ । आकाशको भनाईमा ‘राज्यले पुरै भत्किएका घर मात्रै बनाउँने होइन, चर्किएका घरहरुलाई पनि मर्मत गर्नुपर्छ । थप जन धनको क्षति नहोस् भन्नका लागि चर्किएका घर तथा भवनलाई भूकम्प विद् र इञ्जिनियरले परिक्षण गरेर मात्रै बास बस्ने वातावरण सरकारले मिलाउनु पर्छ ।’ 

राहत वितरण तथा भोलिन्टियर जन शक्तिमा सहयोग पुर्याउने आशाको ज्योती नेपाल लाई सहयोग पुर्याउँने संस्थाहरु शनि सगरमाथा समाज (एसएसएस), नेपाल एशोसियशन अफ नर्थन क्यालिफोर्निया, नेपाल चिल्ड्रेन वेल फेयर सोशाइटी, आइ टु विइ, आइब्रो प्लस आइ एनसी, दाउन्ने देवी गाविस तथा जमुनिया गाविस (नवलपरासी) संघ संस्था व्यक्ति सम्पूर्णलाई हार्दिक धन्यवाद दिदैं आगामी दिनमा नुवाकोट, गोर्खा र सिन्धुपाल्चोक जस्ता भूकम्प प्रभावित क्षेत्रमा आशाको ज्योती नेपाल मार्फत राहत तथा स्वास्थ्य शिविर सञ्चालन गर्ने निर्देशक तथा अभिनेता आकाश अधिकारीले बताए । 

आशाको ज्योतीसँगै देउपुरका भूकम्प प्रभावितको स्वास्थ्य शिविरमा सहभागी भएकी ब्रिटिस नागरिक डा.सुसन ह्यामब्लीनले नेपालको यो स्थितिमा  हयोग गर्न पाउँदा निकै खुसी लागेका बताइन् । उनले भनिन्, ‘म यस्तो ठाउँमा पहिलो चोटी गएँ । यस्तो ठाउँमा सेवा गर्न पाउँदा म धेरै खुसी छु । त्यस माथि पनि आशाको ज्योती नेपालले गरेको यो समाजिक काम सहरानिय छ । आगामी दिनमा यस्तै सामाजिक कार्यमा सम्झिएको खण्डमा म अवश्य आउनेछु ।’ स्वास्थ्य जाँच सँगै ओत लाग्ने त्रिपाल र खाद्यन्न समेत पाएपछि त्यहाँका भूकम्प प्रभावित निकै खुसी देखिन्थे । 

शब्द तथा तस्बिर : उत्सब रसाईली