नेपाल चलचित्र निर्देशक समाज र चलचित्र पत्रकार संघको संयुक्त संयोजकत्वमा बिहिबार  राजधानीमा रक्तदान कार्यक्रम आयोजना गरिएको छ । शक्तिशाली भूकम्पमा परी घाईते भएकाहरुको लागि आयोजना गरिएको उक्त रक्तदान कार्यक्रममा चलचित्र निर्देशक, कलाकार एवं पत्रकार गरी झण्डै एक सयले रगत दान गरेका थिए । 

भृकुटी मण्डपस्थित ब्लड बैङ्कमा कलाकारहरु रमेश उप्रेती, झरना थापा, आर्यन सिग्देल, नम्रता श्रेष्ठ लगायतले आफ्नो रगत दान गरे । कतिपय निर्देशक, कलाकार एवं सञ्चारकर्मीले भने स्वास्थ्य अवस्था बेठिक भएको र अन्य विविध कारणले रगत दान गर्न पाएनन् । निर्देशक आकाश अधिकारीले अस्वस्थता र हास्य व्याङ्ग्य अभिनेत्री दीपाश्री निरौलाले औषधी सेवन गरिरहेका कारण रगत दान गर्न सकेनन् भने रगत भण्डारण गर्ने ठाउँ भरि भएका कारण कतिपय त्यसै फर्किएका थिए ।

रगत दान सँगै भूकम्पबाट घाईते भएका व्यक्ति एवं प्रभावित क्षेत्रमा नेपाली फिल्मकर्मीले आ आफ्नै तवरबाट साथ र सहयोग दिदैं आएका छन् । सरसफाई, स्वास्थ्य शिविर सञ्चालन, खाद्यन्न वितरण देखि भूकम्पले गर्दा निधन भएकाहरुको शवलाई दाहसंस्कार गर्न आर्थिक सहयोग समेत फिल्मकर्मीले गर्दै आएका छन् । 

गएको शनिबार मध्यान्ह् आएको ७.८ रेक्टरको भूकम्पले नेपालका विभिन्न जिल्लाहरुमा ५ हजार बढीको ज्यान लिइसकेको छ भने हजारौंलाई घाईते बनाएको छ । भूकम्पबाट लाखौं व्यक्ति घरवार बिहिन भएका छन् । यस्तो आपत्कालिन घडीमा फिल्मकर्मीले समेत विभिन्न माध्यमबाट सहयोग गर्दै आइरहेका छन् ।