गएको शनिबार मध्यान्ह् आएको शक्तिशाली भूकम्पबाट प्रभावित भएकाहरु प्रति नायिका रेखा थापा र निर्देशक हिमग्याप लामा ‘टासी’ ले सहयोगी एवं साहसी मन देखाएका छन् । यी दुईले भूकम्प प्रभावित प्रति आर्थिक एवं भावनात्मक सहयोग गरेका हुन् ।

भूकम्प गएको साँझ देखि नै प्रभावित रहेका स्थलमा पुगेर अवलोकनका साथै सहयोग गर्दै आइरहेका रेखा र हिमग्यापले बुधबार भने अस्पतालहरु देखि पशुपती आर्याघाट सम्म भूकम्पबाट घाइते भएका तथा निधन भएकाहरुलाई भावनात्मक, नैतिक एवं आर्थिक सहयोग गरे । नायिका रेखा थापा र निर्देशक हिमग्याप लामा ‘टासी’ ले बुधबार मध्यान्ह् विर अस्पताल पुगेर घाईते भएकाहरुको अवस्था नियाल्दै उनीहरुलाई सान्त्वाना दिए । यी दुईले त्यहाँ भने, ‘दुर्घटनालाई शत्तिमा बदल्नुस् ।’

पशुपती आर्यघाटमा राखिएका भूकम्पबाट निधन भएका बेवारिसे तथा आर्थिक अभावले गर्दा सद्गत गर्न नपाइएका शवलाई रेखा र हिमग्यापको आर्थिक सहयोगमा सदगद् गरिएको थियो । भूकम्प आएको दिन शनिबार देखि बुधबार सम्म गरी यी दुईले झण्डै एक दर्जन बढी शवको दाहसंस्कार गर्न आर्थिक सहयोग गर्दै आइरहेका छन् । सहयोग गर्दा पर्न गएको संजोग बारे हिमग्याप भन्छन्, ‘दुई वटा शव त मेरै जिल्ला मुगु को पनि रहेछन् । आफ्नै जिल्लावासी निधन हुँदा म भावुक भएँ ।’ सोही जिल्लाका सभासद् मोहन बाँनियाले राज्यको ध्यान नगएको यस प्रकारको सहयोगमा जिम्मेवार व्यत्तिले गरेको यो सहयोगलाई उदाहरणीय रहेको बताउँदै राज्य लाचर भएको भाव प्रकट गरे ।  

स्वयम् दुई समेत ७ तल्लाको अपार्टमेन्ट बाट बाँच्न सफल भएका रेखा र हिमग्यापले शत्तिशाली भूकम्प पछि आफुले पुर्नजिवन पाएको र गरिरहेको यो सहयोगलाई नितान्त व्यक्तिगत भनेका छन् । आफ्नै रेखा थापा फाउन्डेशन मार्फत विभिन्न सामाजिक सेवा गर्दै आइरहेकी चर्चित एवं हिम्मतवाली नायिकाले हालको सहयोग बारे भनिन्, ‘यस्तो आपकालिन् अवस्थामा जो कोहीले पनि सहयोग गर्न आवश्यक छ । मैंले आफ्नो क्षमताले सकेसम्म सहयोग गर्दै आइरहेको छु ।’ त्यस्तै निर्देशक हिमग्याप लामा ‘टासी’ थप्छन्, ‘यो अवस्थामा हामी सरकारको मात्रै मुख ताकेर बस्नु उचित हुँदैन् । जसले जसरी सहयोग गर्न सक्छ, त्यसरी गर्नु नै उत्तम हुन्छ । मेरो सहयोगमा देश तथा विदेशमा रहनु भएका साथीहरुले पनि साथ दिने वाचा दिनु भएको छ ।’ भूकम्प पछि काठमाण्डूमा संक्रमण फैलने आशंका भैरहंदा रेखा र हिमग्याप स्वयम्ले राजधानीका विभिन्न ठाउँमा माक्स समेत बाँडेका थिए । यी दुईले एकै दिन दुई हजार बढी माक्स सर्वसाधरणलाई बाँडे । 

करिब ५ हजारको ज्यान लिने गरी गएको शनिबार मध्यान्ह् आएको ७.८ रेक्टरको भूकम्पले हजारौं व्यत्तिलाई घाईते बनाएको छ भने लाखौं व्यत्तिलाई घरवार विहिन बनाएको छ । नेपालको यो दुःखद घडीमा देशी तथा विदेशी सरकार, दाता र व्यत्तिले सहयोग गर्दै आइरहेका छन् । यसमा नेपाली फिल्म क्षेत्रबाट नायिका रेखा थापा र निर्देशक हिमग्याप लामा ‘टासी’ प्रत्यक्ष रुपमा सक्रिया भएर लागि परेका छन् ।