‘फिल्ममै करिअर बनाउँछु’ भनेर आए पनि एक÷दुई फिल्म, भिडियोमा अभिनय गरेपछि हराएका हिरोइन थुप्रै छन् । ‘इन्ट्री’ धमाकेदार गरे पनि केही समयमै सेलाएर गएका पनि कम छैनन् । हिरोइन मात्र किन, यस प्रकारका हिरोको पनि कमी छैन उद्योगमा । यो लेखमा चाहिं हिरोइनको कुरा गरिंदै छ, जो आँधीसरि आए, तर रत्तिभरमै हराए । पूर्ण लगावका साथ निरन्तर मिहिनेत गरिएन भने जुनसुकै पेसामा पनि दीर्घकालीन हुन सकिंदैन । अझ, फिल्म त हाइलाइटको दुनियाँ, यसमा चलायमान भइरहन सधैं चर्चामा छाइरहनैपर्छ । नत्र निर्माता, निर्देशकले मात्र होइन, दर्शकले समेत बिर्सिहाल्छन् । अनि गणनामा परिहालिन्छ– ‘डेट एक्सपायर’ मा ।

दीपक श्रेष्ठको निर्देशनमा डिक खड्काले निर्माण गरेको ‘मजबुर’ फिल्मबाट नयाँ हिरोइन उदाइन्–अनुष्का ढकाल । स्लिम सुन्दरी अनुष्काले फिल्म नगरीमा केही धमाका मच्चाउने आस धेरैको थियो । तर, त्यसो भएन । ‘मजबुर’ फिल्ममा उनी तत्कालीन स्टार विराज भट्ट र उनका भाइ कृष्ण भट्टका साथ सोलो हिरोइन थिइन् । फिल्म अभिनयमा आउनुअघि उनले केही म्युजिक भिडियो तथा टिभी एडमा पनि अभिनय गरेकी थिइन् । फिल्म ‘मजबुर’ रिलिज नहुंदै शोभित बस्नेतको फिल्म ‘प्लान’ मा अभिनय गरे पनि त्यसपछि भने उनी फिल्ममा देखा परिनन् । अभिनेत्री सृजना बस्नेत र सुरज प्रजापतिसँगको पार्टनर सिपमा जोरपाटीमा केही समय ब्युटीपार्लर सञ्चालन गरेकी अनुष्काले अन्ततः अभिनय त्यागिन् । र, बिहे बन्धनमा बाँधिइन् । बिहेपछि उनी फिल्म तथा सञ्चारकर्मीको सम्पर्क बाहिर छिन् । तीन वर्षअघि बिहे गरेकी अनुष्काले उप्रान्त फिल्म अभिनय नगर्ने घोषणै गरेकी थिइन् । उनी अभिनीत ‘मजबुर’ र ‘प्लान’ दुवै असफल फिल्म हुन् । अनुष्काझैं सञ्चिता गुरुङ पनि आउँदा आउँदै हराइन् । सञ्चिताले विमल पौडेलको ‘नागरिक’, रञ्जित रानाको ‘बाटुली’ र शोभित बस्नेतको ‘धूम’ फिल्ममा अभिनय गरेकी थिइन् । केही म्युजिक भिडियोमा समेत अभिनय गरेकी उनलाई पनि सम्भावना बोकेकी हिरोइनका रूपमा हेरिएको थियो । तर, उनी पनि पलायन भइन् । 

त्यसैगरी, ‘बन्धकी’ फिल्मकी सह नायिका गीता शाहीलाई पनि लामो समय अभिनयमा देख्न पाइएन । टेलिफिल्म र म्युजिक भिडियोमा पनि राम्रो चलेकी गीता जापान उडिन् । केही समयअघि स्वदेश फर्किएकी उनी उचित भूमिका पाए पुनः अभिनयमा फर्कने धुनमा छिन् । नवल खड्काको निर्माण र दयाराम दाहालको निर्देशनमा बनेको ‘दशगजा’ बाट हिरोइनका रूपमा परिचित भएकी रञ्जिता गुरुङले त्यसअघि शोभित बस्नेतका केही फिल्ममा सानोतिनो भूमिका निर्वाह गरिसकेकी थिइन् । ‘दशगजा’ पछि पनि उनले हिट फिल्म ‘गोर्खा पल्टन’ मा अभिनय गरिन् । फिल्मसँगै म्युजिक भिडियोमा समेत चल्तीमा हुँदाहुँदै रञ्जिताले पनि झ्याइँ पारिन् । त्यसपछि भने उनी पहिला जस्तो अभिनयमा सक्रिय छैनन् । यद्यपि, तीजका गीतमा भने झुल्किएको देखिन्छ । शोभित बस्नेतको ‘दुलही रानी’ फिल्मबाट सहनायिका बनेकी पेशला कटुवाललाई पनि आशावादी हिरोइनका रूपमा हेरिएको थियो । तर, उनले पनि निरन्तरता दिन सकिनन् । ‘दुलही रानी’ पछि विजयविक्रम बस्नेतको ‘प्ले गर्ल’ फिल्ममा अभिनय गरेकी पेशलाको सो फिल्म अहिलेसम्म रिलिज भएको छैन । धेरैजसो भारत बस्ने गरेकी पेशला अचेल भने काठमाडौंमै रहेको बताइन्छ । हिरोइनका रूपमा जम्ने चाहना अधिक छ– सारिका घिमिरेमा । राजु गिरीको ‘हत्याकाण्ड’, ‘जंगल यात्रा’ र ‘रक्षा’ मा अभिनय गरेकी उनी त्यसपछि मदन घिमिरेको ‘आगो–२ मा’ मुख् हिरोइन बनिन् । तर, उनी अभिनीत फिल्मले कुनै कमाल देखाउन सकेका छैनन् । पछिल्लो समय ‘ठेगनी देवी’ को शीर्ष भूमिकामा अभिनय गरेकी उनी आफूलाई स्थापित गर्न संघर्षरत छिन् । उनको अर्काे फिल्म परिणामको भने सुटिङ पूरा भएको छैन । 


शोभित बस्नेतले ‘दुलही रानी’ फिल्मबाट हिरोइनका रूपमा डेब्यु गराएका रागिनी खड्गीले त्यसपछि ‘प्लान’, ‘मेरो जीवन साथी’, ‘सिसा’, ‘तनाव’, ‘गहिराइ’ लगायतका फिल्ममा अभिनय गरिन् । तर, पछिल्लो समय उनी अभिनयबाट टाढिएकी छिन् । केही समय फिल्म नखेल्ने सोच उनको छ । अलि पुरानो कुरा गर्ने हो भने फैसला फिल्मकी सह नायिका प्रेरणा शर्मा धेरै समय टिकिनन् । ‘फैसला’ पछि अन्य केही फिल्ममा अभिनय गरे पनि विदेश प्रोग्राममा धेरै हिंड्ने भएकाले उनले अभिनयलाई निरन्तरता दिन सकिनन् । दीपक श्रेष्ठको ‘वाचा’ फिल्मकी हिरोइन सिम्रन पोखरेल भने आफू हिरोइन भएको फिल्म रिलिज नभइ दिनाले तनावग्रस्त भइरहिन् । अन्ततः केही महिनाअघि उनले फोटोग्राफर तथा लुट कम्पनी फिल्मका निर्देशक सुरजचन्द ठाकुरसँग बिहे गरिन् । अब उनी पति सुरजले बनाउने फिल्ममा हिरोइन बन्ने सम्भावना भने देखिन्छ । ‘युज’ फिल्ममा अभिनय गरेकी सीमा केसीको फिल्मी करिअर पनि त्यस्तै भयो । ‘युज’ पछि पनि अन्य केही फिल्ममा अभिनय गरेकी उनी पनि हाल अभिनयमा सक्रिय छैनन् । उनी पनि विदेशी प्रोग्राममा धेरै व्यस्त हुने गर्दछिन् । ‘जिन्दगी रक्स’ ले उधुम मच्चाउँछ र आफू हिरोइनका रूपमा स्थापित हुन्छु भन्ने कल्पनामा रहेकी अकेशा विष्टको सपना फिल्म फ्लपसँगै चकनाचुर भयो । सान र डी कम्पनीकी हिरोइन अनुष्का शर्मा पनि त्यसपछि अरू फिल्ममा देखिएकी छैनन् । मौसमी मल्लको समय फिल्मबाट डेब्यु गरेकी सुरभी जैन विष्टलाई गोविन्द राईको ‘नागबेली’ र हिमाल केसीको ‘किल्ला’ ले पनि कुनै फाइदा दिलाएन । अब उनको आस समिर बलामीको ‘द फेमस’ मा छ । ‘द फेमस’ को रिलिज मिति भने हालसम्म अन्यौलमा छ । यद्पी नायिका जैन फिल्म अभिनयबाट सन्यास लिएको स्टाटस हाल्न भने पछि पर्दिनन् । करिब दुई दर्जन फिल्ममा अभिनय गरेकी सुमिना घिमिरेले रंगिन दुनियाँबाट टाढिएर गृहस्थ जीवन रोजिन् । गत फागुनमा बिहेबन्धनमा बाँधिएकी सुमिनाले अब उप्रान्त फिल्म दुनियाँमा नफर्कने घोषणै गरेकी छिन् । सुमिनाकी हितैषी कल्पना शाही पनि गृहस्थ जीवन बिताइरहेकी छिन् । अभिनेता मुकेश आचार्यसँग प्रेमविवाह गरेकी उनी हाल छोरी हुर्काउनमा व्यस्त छिन् । कल्पनाले सुमन दाहालको ‘मन परेपछि’, किशोर ढकालको ‘खोज’, विजयविक्रम बस्नेतको ‘हात लाग्यो शून्य’, ग्याम्लरलगायतका फिल्ममा अभिनय गरेकी छिन् । 

‘मानव’, ‘खोज’, ‘रंग’, ‘इच्छा’ लगायत केही फिल्ममा अभिनय गरेकी दीपशिखा शाहीको करिअर पनि जम्न सकेको छैन । ‘कान्छी मट्याङट्याङ’ मा शीर्ष भूमिका निर्वाह गरेकी सारिका केसी भने मिलन आले मगरको नयाँ फिल्म लक्ष्यमा सहायक भूमिकामा अभिनय गर्ने भएकी छिन् । ‘अन्तराल’ की अशिष्मा नकर्मीले त्यसपछि ‘तोरी लाहुरे’ र ‘अधकट्टी’ मा अभिनय गरिन् । ‘होस्टेल’ हुँदै ‘यो कथा हो तिम्रो मेरो’, ‘एउटा साथी’, ‘अधकट्टी’ र ‘आधी पेज’ मा अभिनय गरेकी रिस्ता बस्नेतको हातमा त्यसपछि फिल्म छैन । दुई/चार फिल्ममा देखिएर हराएका हिरोइनको संख्या बग्रेल्ती छ । 

-लक्ष्मण सुवेदी